နေဗျဳဒဝ်၊ ဖေဖဝ်ဝါရဳ ၈
ကံၚ်ဇြဳပၞာန် နကဵုနဲကဲနာနာသာ် မပ္တိတ်ဒၟံၚ်ဇြဟတ် သွက်သ္ဂောံဂွံညးမလုပ်ယိုက်လျိုၚ်ပၞာန်ဂှ် ကုညးအာယုက်ဟွံပေၚ် ၁၈ တံဂှ် လ္ပကော်ကဵုလုပ်ပၞာန်ဂှ်ကီု၊ ယဝ်ရစၟဳတ်ဂွံဆဵုကေတ် ကောန်ဒပ်အာယုက်ဟွံပေၚ်တံဂှ်မ္ဂး သွက်ဂွံပအပ် ဇရေၚ်ညးအုပ်ဓုပ်မိမတံဂှ် ဟီုကၠုၚ်ရ။
ပ္ဍဲကဵုကောံဓရီု ကမ္မတဳထိၚ်ဒဝ်စဵုဒၞါ ကောန်ၚာ်သၟတ်အာယုက်ဟွံပေၚ်ဏီတံ နူကဵုပွမလုပ်ယိုက်လျိုၚ်ပၞာန် မကၠောန်ဗဒှ်လဝ် ပ္ဍဲနေဗျဳဒဝ် ပ္ဍဲဂိတုဖေဖဝ်ဝါရဳ ၆ ဂှ် ဝန်ဇၞော်ကာစဵုဒၞါကံၚ်ဇြဳပၞာန် သ္ကိုပ်ဗိုလ်ဇၞော် မာၚ်ၚ်အေ ဟီုကၠုၚ်လဝ်ရ။
သ္ကိုပ်ဗိုလ်ဇၞော် မာၚ်ၚ်အေ ဂှ်တှ်ေ ပ္ဍဲဂိတုဂျာန္နဝါရဳ ၂၃ ဂှ် စၞောန်ပျးသ္ပဒတန်ကၠုၚ်လဝ် နဲသၞောဝ်ဥပဒေသၞောဝ်ယိုက်လျိုၚ်ပၞာန်ဂှ်တုဲဂှ်ရ ပ္ဍဲအရာလုပ်ယိုက်လျိုၚ်ပၞာန်ဂှ် ညးအာယုက်ဟွံပေၚ် ၁၈ တံ ညံၚ်ဟွံဂွံပါ သွက်ဂွံကောပ်ကာဲအာ ဗွဲမစှ်ေကဵုသၞောတ်ဂှ် နွံပၟိက်ရောၚ် သ္ဂးရ။
သ္အာၚ်နူဂှ်ပၠန် ညံၚ်ဟွံဂွံရပ်စပ်၊ ညံၚ်ဟွံဂွံပကောံကၠုၚ်ကောန်ပၞာန် ကုကောန်ၚာ်သၟတ် အယုက်ဟွံပေၚ်ဏီတံ အပ္ဍဲဒပ်ပၞာန်တံဂှ်ကီု၊ သၟတ်လုပ်စိုပ်ကၠုၚ် သ္ဂောံယိုက်တာလျိုၚ် မဒှ်သံသယတံဂှ် ညံၚ်ဂွိုအ်ဒုၚ်လဝ်တဲ သွက်ဂွံစၟဳတ်အိုတ်ဂှ် ဟီုကၠုၚ်ရ။
ဒံက်တာသဳရိမန်ဆာန် ညးမၞုံအခေါၚ်ဟီုဂး ဒပ်စဵုဒၞါဍုၚ်မန် MSDF ဂှ်တှ်ေ ကံၚ်ဇြဳပၞာန် ၜိုန်ဟီုဒၟံၚ် လ္ပကော်ဘိက်ညးအာယုက်ဟွံပေၚ်တံ သွက်ဂွံလုပ်ပၞာန်ဂှ်ကီုလေဝ် ပ္ဍဲအကာဲအရာဗလးတိဏံဂှ်တှ်ေ ကောန်ဒပ်ကံၚ်ဇြဳပၞာန် မဒးပြဟ်လလုဲအာ အာယုက်ဟွံပေၚ်ဏီတံဂှ် ဂွံဆဵုကေတ်ဒၟံၚ် ဗွဲမဂၠိုၚ်ဂၠေၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကံၚ်ဇြဳပၞာန်ဂှ်တှ်ေ သွက်ဂွံလုပ်ပၞာန်ဂှ် မၞိဟ်တြုံတှ်ေ အကြာအာယုက် ၁၈ ကဵု ၃၅၊ မၞိဟ်ဗြဴတှ်ေ အကြာ အာယုက် ၁၈ ကဵု ၂၇ ဂှ် ကော်ဒၟံၚ်သ္ဂောံလုပ်ပၞာန်ဂှ် ဟီုလဝ်ရ။ ပ္ဍဲဗလးတိတေံကီု ပ္ဍဲကဵုပေါဲဗ္တိုက်ဆေၚ်မုက် ကုဒပ်ပိုယ်တံဂှ် ကောန်ဒပ်တၟိတၟိ အာယုက်ဟွံပေၚ် တၚ်ဆဵုဂဗဟွံမွဲ မဒးပြဟ်လလုဲအာတံဂှ် ပါလုပ်ဒၟံၚ်တၟာဂလိုၚ်ဂှ် ပ္ဍဲကဵုလိက်ဒုၚ်စဳရေၚ်ပရေၚ်ပၞာန် ဒပ်ပိုယ်တံဂှ် ဂွံဆဵုကေတ်တၟာဂလိုၚ်ရ” သာ်ဝွံ သ္ဂးရ။
အခိၚ်လၟုဟ်ဂှ်လေဝ် ကံၚ်ဇြဳပၞာန်ဝွံ ဟိုတ်နူရဲတိုန်စိုပ်တန်ဗ္တောန်ကွတ်ပၞာန်တံ အောန်ကၠုၚ်တုဲ နူဒေသနာနာဂှ် ပကောံကၠုၚ်ဒၟံၚ်သၟတ်အာယုက်ဟွံပေၚ်ဏီတံ နဒဒှ်ကောန်ပၞာန် ဗွဲအတေၚ်အဓမ္မဂှ် ဂွံဆဵုကေတ်ဒၟံၚ်ရောၚ် ညးဆက်ဟီုရ။
ဆ္ဂး လ္ပာ်ကံၚ်ဇြဳပၞာန်ဂှ်တှ်ေ နူသၞာံ ၂၀၁၂ စဵုကဵုတ္ၚဲဏံဂှ် ဟိုတ်နူမှာရာ ပကောံဒးလဝ် ကောန်ပၞာန်ကောန်ၚာ် ၁၀၅၇ တၠဂှ်ရ ကဵုနုက်တိတ်နူဒပ်ပၞာန်တုဲ ကလေၚ်လှဲပြံၚ်ကဵုလဝ် ဇရေၚ်ဂြောဝ်ဂတာညးတံရောၚ် သ္ဂးလဝ်ရ။
ပ္ဍဲကဵုပေါဗ္တိုက်အလုံဍုၚ်မွဲတံဂှ် ဒပ်ကံၚ်ဇြဳပၞာန် မကျဒၟံၚ်ပၞာန်ဂှ်ဝွံ ညံၚ်ဂွံဂွံကောန်ဒပ်တၟိတၟိဂှ် ရပ်စပ်ကၠုၚ်နဲကဲနာနာသာ်တုဲ စၞောန်ပျးကၠုၚ်လဝ် သီုနဲသၞောဝ်ဥပဒေယိုက်လျိုၚ်ပၞာန် မဒှ်သၞောဝ် ကၟာတ်လဒဵုအာ ကောန်ဍုၚ်အာယုက်စိုပ်တုဲတံ နူကဵုအခေါၚ်တိတ်ဍုၚ်သ္အာၚ်တံဂှ်တုဲ မဒှ်သၞောဝ် မတံၚ်ဂြဲပၠောပ်ဏာ ပ္ဍဲဒပ်ပၞာန်ဍေံတံဂှ်ရ။
ပရိုၚ်−သြၚ်လောန်တိုၚ်(မ်)
ဗီု−SAC