ၜဳကလေၚ်၊ ဖေဖဝ်ဝါရဳ ၉
ဟိုတ်နူပရိုၚ် ဒပ်ပၠန်ဂတးတံ လုပ်စိုပ်ဗ္တိုက်ဏောၚ်ဂှ်တုဲ ပ္ဍဲကဵုဗ္ဒိုပ်ဒပ်ကံၚ်ဇြဳပၞာန် နွံပွိုၚ်ဍုၚ်ၜဳကလေၚ် တွဵုရးဍုၚ်မန်တံဂှ် ထပ်ဗပေၚ်ဒၟံၚ်ဇြဟတ်တုဲ ပလေဝ်ဒၟံၚ်ပၞာန်ဒုၚ်တံရောၚ် ဂၠိုက်ဂၠါဲဂွံတီကေတ် ဇရေၚ်ညးမစုက်လုက်ကဵု ဒပ်ပၞာန်တံရ။
ကုန်ဗျူဟာကံၚ်ဇြဳပၞာန် ဖျေံသ္ဇိုၚ်ကွာန်မေဝ်ပလဳ ပွိုၚ်ဍုၚ်ၜဳကလေၚ်ဂှ် ကြဴနူဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ ဗ္တိုက်သီဂွံလဝ်တုဲဂှ် ပလေဝ်ကၠုၚ်ဒၟံၚ်ပၞာန်ဒုၚ်ရ။
အခိၚ်လၟုဟ် ပ္ဍဲတမ်ဒပ်ကံၚ်ဇြဳပၞာန် ဖျေံသ္ဇိုၚ်ၜဳကလေၚ်တံဂှ် ဗဂပ်စုတ်လဝ် ကွဳစက်ခြပ်ပသဲတံ၊ လွဟ်ဇၞော်ဟံၚ်ဝေတ်သာတံတုဲ မွဲမွဲတမ်ဒပ်မ္ဂး ထပ်ဗပေၚ်လဝ်ဇြဟတ် ၂၀၀ ပြၚ်ရ။
ပ္ဍဲကဵုဗ္ဒိုပ်ဒပ်နာတ်ကျဳ၊ သၞေဟ်ကၚ် BGF (မဲလံ) ၊ ပ္ဍဲသၞေဟ်ကၚ်စၟဳတ်ဇာဒိသိုၚ်ၜါ ဂၠံၚ်တိတ်ၜဳကလေၚ်−နာတ်ကျဳတံဂှ်လေဝ် ဂလိုၚ်ပ္တိုန်ဖျေံလဝ်ဇြဟတ်တံတုဲ သ္ပကၠုၚ်အပြံၚ်အလှာဲ စနူကဵုသ္ကိုပ်ဗျူဟာတံဂှ် တမ်ရိုဟ်ပရိုၚ်ဒပ်ပၞာန်တံ ဟီုရ။
သ္အာၚ်နူဂှ်ပၠန် လ္တူက္ဍဟ်ဒဵု ဂွံညာတ်ကေတ်ဒၟံၚ်ဍုၚ်ၜဳကလေၚ်ဂှ်လေဝ် ဖျေံလဝ်လွဟ်ဇၞော်တံတုဲ ပန်ပှော်ဒၟံၚ် ကဵုလွဟ်ဇၞော် သီုတ္ၚဲသီုဗ္တံ နွံဒၟံၚ်ရ။
ဒပ်ကံၚ်ဇြဳပၞာန် ပလေဝ်ကၠုၚ်ဒၟံၚ်ပၞာန်ဒုၚ်ကီု၊ သီုကဵုပရိုၚ်ပေါဲဗ္တိုက်ဒှ်ကၠုၚ်မာန်တံဂှ်ကီုတုဲ ညးဒေသဂၠိုၚ်ကဵုကၠံ နူကွာန် ( ရင်းအုံ၊ နတ်ကြီး၊ ကျားကွင်း၊ မဲလံ၊ တောင်ကလေး၊ သူဌေးကုန်း) တံဂှ်ဝွံ ဒစးဒုၚ်ပါဲဒလေတ်ဒၟံၚ် လ္ပာ်လ္တူဍုၚ်ၜဳကလေၚ်ကဵု လ္ပာ်ကွာန်ဗၠးဘဲ မထေၚ်ကေတ်တံဂှ်ရ။
တုဲကၠုၚ် ပ္ဍဲဂိတုဖေဖဝ်ဝါရဳ ၇ တေံဂှ်လေဝ် ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ် ကုဂကောံကွာန်ယှိုဲလံၚ်အေန် ပွိုၚ်ဍုၚ်ၜဳကလေၚ် နကဵုက္ၜၚ်ကျာ ၆ ဝါတုဲ သ္ၚိၜါမကဵု ဘာဗ္တောန်လိက်မွဲမ ဇီုကပိုက်လီုလာ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ