ၜၚ်ကံက်၊ ဖေဖဝ်ဝါရဳ ၉
သ္ကိုပ်ဝန်ဇၞော်သေံတြေံ တက်ဇြေန်ယှေန်နာဝါထရာဝွံ ကြဴနူဆဵုဂဗသဳကၠဳကဵု ဥက္ကဌအာဇြဳယာန်လၟုဟ် သ္ကိုပ်ဝန်ဇၞော်မလေဝ်ယှာ အာန်ဝါ အဳဗရာဟာမ်တုဲဂှ် ဂွံသောၚ်ကလးပဋိပက္ခဍုၚ်ဗၟာ မွဲဝါပၠန်ဂှ် ကၠောန်အာပရေၚ်သဳကၠဳဗွဲပလး ကုက္ဍိုပ်သ္ကိုပ်အာဇြဳယာန်တံဏောၚ်ဂှ် လလောၚ်ပ္တိတ်ကၠုၚ် ပ္ဍဲဂိတုဖေဖဝ်ဝါရဳ ၇ တေံရ။
ပ္ဍဲဂိတုဏံမံက်တေံ တက်ဇြေန် မအာစိုပ်လဝ် ဍုၚ်မလေဝ်ယှာဂှ်တှ်ေ သ္ကိုပ်ဝန်ဇၞော် အာန်ဝါ ကေတ်လဝ်ကသပ်နူကဵုညး စပ်ကဵုမူဝါဒ သမ္မတအမေရိကာန် ဒဝ်နေဝ်ထြာမ် ပရေၚ်သြန်လှုဲဒေတ်ဂျေတ်ဒဴတံကီု၊ သီုပရေၚ်မဆက်စပ်ကဵုပဋိပက္ခဍုၚ်ဗၟာတံဂှ်ရောၚ် သ္ဂးရ။
အာဇြဳယာန် သောၚ်ကလး ပရေၚ်ဍုၚ်ဗၟာဟွံမာန်ဂှ်ဝွံ အာဇီုကပိုက်ကဵု ကဆံၚ်အလံၚ်ဂကောံဇၞော် အပ္ဍဲဒေသဏံဂှ်ကီု၊ အကြာဗွိုၚ်ဍုၚ်သ္အာၚ်တံဂှ်လေဝ် အာဇီုကပိုက်ကဵု ဓဝ်ပတှ်ေလ္တူဂကောံဏံဂှ်ကီု၊ သ္အာၚ်နူဂှ်ပၠန် ညးဝွံ ဟိုတ်နူဍုက်ကေဝ်ကဵု က္ဍိုပ်သ္ကိုပ်အာဇြဳယာန်လ္ၚဵုတံဂှ်တုဲ သ္ကိုပ်ဝန်ဇၞော် အာန်ဝါ ဒဒှ်ရဟီုကၠုၚ် သွက်ဂွံဘိုၚ်ရီုဗၚ်ကဵုညးဂှ်ကီု၊ အနာဂတ်တေံလေဝ် သွက်ဂွံဆဵုဂဗကဵု က္ဍိုပ်သ္ကိုပ်တံဏံဂှ် ကေတ်အခိၚ်တုဲကၠောန်အာဏောၚ်ဂှ် တက်ဇြေန် ဟီုလဝ်ရောၚ် ပရိုၚ် Thai PBS ချူလဝ်ရ။
ပ္ဍဲဍုၚ်ဗၟာလၟုဟ်ဏံ အကြာဒပ်ကံၚ်ဇြဳပၞာန်ကဵု ဂကောံပၠန်ဂးတံ ဗ္တိုက်ဒၟံၚ်ညးသ္ကအ်ဂှ်ဝွံ ဒဒှ်ရသြန်မကလိဂွံလဝ် နကဵုကမၠောန်ပရေၚ်ပိုန်ဒြပ်ဟွံလုပ်သၞောဝ် ညံၚ်ရဴသေန်တာ လီဠာန်သြန်လ္တူလပှ်ကျာတံ ထံက်ပၚ်ကဵုဒၟံၚ် မွဲဒကုတ်မွဲဒကဴဂှ်ကီု၊ ဒၞါဲထပိုတ်ရိုဟ်ကၞက် သြန်ထံက်ပၚ်တံဏံဂှ် ပရေၚ်ဗ္တိုက်သရိုဟ် ကမၠောန်ဟွံလုပ်သၞောဝ် မကၠောန်ဒၟံၚ်လၟုဟ်တံ ရီုဗၚ်ကဵုမာန်ရောၚ် တက်ဇြေန် ထပ်ဟီုလဝ်ရ။
ပွမထပိုတ်လဝ် ပၟတ်ဓာတ်လလဳ၊ ကၠေၚ်စၞပၟတ် ကေုာံ အေန်တာနိတ်တံဂှ်ဝွံ ပြဟ်ဟ်ဏံ ဇီုကပိုက်ကဵုညးဍုၚ်ကွာန်ဍုၚ်ဗၟာတံ ဗွဲမဂၠိုၚ်မာန်ကီုလေဝ် ကြဴနူဗ္တိုက်သ္အး သေန်တာလီဠာန်သြန်တံတုဲဗက် ကလေၚ်ထံက်ပၚ်ကဵုအာ ဒဒှ်မထပိုတ်လဝ်တံဏံဏောၚ်ဂှ် သ္ဂးလဝ်ရ။
Ref: ThaiPBS