ဘာအၚ်၊ ဖေဖဝ်ဝါရဳ ၉
တွဵုရးကရေၚ် လ္တူဍုၚ်ဘာအၚ်ဂှ် မွဲအရာပ်မ္ဂး သွက်ဂွံကဵုတန်ဗ္တောန်ကွတ်ပၞာန်မွဲတၠ သွက်တန်ဗ္တောန်ကွတ်ပၞာန် လၟေၚ် ၁၀ ဂှ် ဂကောံကော်ဘိက်သ္ဂောံလုပ်ပၞာန် ကဆံၚ်ပွိုၚ်ဍုၚ် စၞောန်ပ္ညုၚ်ကၠုၚ်တုဲ ယဝ်ရကဵုကောန်တန်ဗ္တောန်တၟိတၟိတံဟွံမာန်မ္ဂး မွဲသ္ၚိ ဒးကဵုသြန် ၅၀၀၀ ဒ္ကေဝ်ဏောၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အကြာဏံ ပ္ဍဲဍုၚ်ဘာအၚ် အရာပ်လ္ၚဵုတံဂှ် ဂကောံကော်ဘိက်သ္ဂောံလုပ်ပၞာန်ကဆံၚ်ပွိုၚ်ဍုၚ် လ္ပာ်ကံၚ်ဇြဳပၞာန်တံ ကၠုၚ်စိုပ်ကဵုသမ္တီ သဳကၠဳကဵုအာ ကုညးဍုၚ်ကွာန်ကောန်အရာပ်တံ ပရေၚ်မဆက်စပ်ကဵုသၞောဝ်ယိုက်လျိုၚ်ပၞာန်ဂှ်ဏောၚ်ဂးတုဲ နူသ္ကိုပ်အုပ်ဓုပ်အရာပ်တံမွဲကဆံၚ် မွဲအရာပ်မ္ဂး သွက်ဂွံကဵုကောန်တန်ဗ္တောန်မွဲတၠဂှ် ဟီုကၠုၚ်ရ။
သွက်တန်ဗ္တောန်ကွတ်ပၞာန် လၟေၚ် ၁၀ ဏံဂှ် မွဲအရာပ် ဒးကဵုမၞိဟ်မွဲတၠဏောၚ်တုဲ ယဝ်ကဵုဟွံမာန်မ္ဂး မွဲသ္ၚိ ကံက်ကေတ်အာ သြန် ၅၀၀၀ ဒ္ကေဝ်ဏောၚ်တုဲ ကော်အာညးလုပ်စၞးတံဏောၚ်ဂှ် ညးဒေသဍုၚ်ဘာအၚ်မွဲတၠ ဟီုရ။
လၟေၚ် ၉ တုဲကၠုၚ်တေံဂှ်လေဝ် ပ္ဍဲအရာပ်လ္တူဍုၚ်ဘာအၚ်တံကဵု ပ္ဍဲကွာန်လ္ၚဵုတံဂှ် မွဲမွဲအရာပ် ဒးကဵုလဝ်ကောန်တန်ဗ္တောန်ကွတ်ပၞာန်တၟိတၟိတံဂှ်တုဲ ယဝ်ကဵုညးလုပ်ယိုက်လျိုၚ်ပၞာန်တၟိတၟိတံဟွံမာန်မ္ဂး မွဲသ္ၚိ အောန်အိုတ် ၅၀၀၀ ဒ္ကေဝ်၊ သ္ၚိလ္ၚဵုတံဂှ်တှ်ေ ဒးကဵုဒၟံၚ် ၁၀၀၀၀ ဒ္ကေဝ်ပြၚ်ရ။
လၟေၚ်တုဲကၠုၚ်တေံ အပ္ဍဲတွဵုရးကရေၚ် သၟတ် ၁၀၀ ပြၚ် ဒးဒုၚ်ပကောံပလဝ် နဒဒှ်ကောန်ဒပ်တၟိတၟိတံတုဲ တန်ဗ္တောန်ကွတ်ပၞာန်ဂှ်တှ်ေ ဒးအာစိုပ်လဝ် ပ္ဍဲဘာတန်ဗ္တောန်ကွတ်ပၞာန်သ္ဇိုၚ် ကံၚ်ဇြဳပၞာန် မၞုံပ္ဍဲပွိုၚ်ဍုၚ်သဓီုကဵု ပွိုၚ်ဍုၚ်ဇြပ်ဗုဂှ်ရ။
တွဵုရးကရေၚ် ဍုၚ်ဘာအၚ်၊ ဍုၚ်လိုၚ်ဗၠဲ မပါလုပ် ပ္ဍဲကဵုဍုၚ်လ္ၚဵုတံဂှ်တှ်ေ အခိၚ်ကံၚ်ဇြဳပၞာန် ကော်ကေတ်ဒၟံၚ်ကောန်ဒပ်တၟိတၟိတံဂှ် ဒပ်မၚ်ပယျဵု BGF ဂှ်လေဝ် ဂိတုတုဲကၠုၚ်တေံ ကော်ကေတ်လဝ်သၟတ် ပ္ဍဲပွိုၚ်ဍုၚ်လ္ၚဵုတံ ဗွဲမဂၠိုၚ်ဂၠေၚ်တုဲ ကဵုကေတ်လဝ်တန်ဗ္တောန်ကွတ်ပၞာန် နဒဒှ်ကောန်ဒပ် BGF ရ။
သၟတ်နူတွဵုရးကရေၚ် ညးဟွံမိက်ဒ္ဂေတ်ဗက် အတိုၚ်ကံၚ်ဇြဳပၞာန် မကော်ဘိက်ကၠုၚ်သ္ဂောံလုပ်ယိုက်လျိုၚ်ပၞာန်တံ ဗွဲမဂၠိုၚ်ဂှ်ဝွံ တိတ်အာဍုၚ်သ္အာၚ်ကီု ပါဲဒလေတ်စိုပ်အာ လ္ပာ်တိဍာ်ဒေသဗၠးၜးတံကီု နွံတုဲ သၟတ်လ္ၚဵုတံဝွံ လုပ်စိုပ်ကၠောန်ၜိုတ်ဒၟံၚ် ပ္ဍဲဂကောံရပ်လွဟ်ကရေၚ် ညံၚ်ရဴဂကောံ KNU, DKBA, BGF, PC တံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media