ဝါယှေန်တာန်၊ ဖေဖဝ်ဝါရဳ ၁၁

သွက်ဂွံဖအိုတ်ကၠေံ ပေါဲပၞာန်ယူကရုၚ်ဂှ် သဳကၠဳလဝ် ကုသမ္မတရုယှာ ဗလာဒဳမာပူတေန် နူကဵုဖုၚ်ရောၚ် သမ္မတအမေရိကာန် ဒဝ်နေဝ်ထြာမ် ဟီုလဝ်ဂှ် ဌာန်ပရိုၚ် New York Post ထ္မံက်ထ္ၜးလဝ်ရ။

ဣဏံဝွံ ကြဴနူသၞာံ ၂၀၂၂ မံက်တုဲဂှ် အကြာသမ္မတအမေရိကာန်ကဵု ပူတေန်ဂှ် ဒှ်ပရေၚ်သဳကၠဳ ကဵုလဝ်သမ္တီ ဗွဲမလုပ်သၞောဝ် ကိုပ်ကၠာအိုတ်ရ။

ညံၚ်ပေါဲပၞာန်ယူကရုၚ် ဂွံတုဲဒှ်အာဂှ် ကၠောန်အာဏောၚ် ကဵုလဝ်ကတိကီုလေဝ် သမ္မတထြာမ် မဟွံဂွံလလောၚ်ပ္တိတ်ကၠုၚ် အစဳဇန်ညးဏီဂှ် ညံၚ်ပဋိပက္ခဂမၠိုၚ် ဂွံပြေလာဲအာဂှ် သဳကၠဳဒၟံၚ်ကဵု ရုယှာ၊ ယူကရုၚ် သီုၜါဍုၚ်ဏောၚ် တုဲကၠုၚ်သတ္တာဟတေံ ဟီုလဝ်ကီုလေဝ် တၚ်နၚ်ဗွဲလစှ်ေတံဂှ်တှ်ေ ဟီုပ္တိတ်လဝ်ဟွံမွဲရ။

အပ္ဍဲကဵုအေန်တာဗျူ မကၠောန်ဗဒှ်လဝ် လ္တူက္ၜၚ်ကျာ Air Force One ပ္ဍဲဂိတုဖေဖဝ်ဝါရဳ ၇ ဂှ် သမ္မတထြာမ်ဂှ်တှ်ေ မူစိအလန် သဳကၠဳလဝ်ကဵုပူတေန်တုဲယျဟီုဂှ် လ္ပဟီုတှ်ေ ခိုဟ်ဂၠိုၚ်ဏောၚ် သာ်ဝွံ ဟီုလဝ်ကဵု ဌာန်ပရိုၚ် New York Post ရ။

ဆက်စၠောံသဳကၠဳလဝ် လက္ကရဴအိုတ်ဂှ် အခိၚ်လဵုရောဟီုဂှ်လေဝ် ထြာမ် ဟွံဟီုပ္တိတ်လဝ်ရ။ မၞိဟ်တံ မ္ဒးချိုတ်ဒၟံၚ်တံဂှ် သမ္မတပူတေန် ဒဒှ်ရဟွံမိက်ညာတ်ရပုဟ်ဂှ် ထြာမ် ဟီုလဝ်ရ။

ဒဳမဳထရဳ ပက်သကပ် ညးမၞုံအခေါၚ်ဟီုဂး နန်ကရေမ္မလေန် သမ္မတရုယှာဂှ်တှ်ေ ပရေၚ်ဆက်စၠောံ အရာမတၞဟ်ခြာတံ မံက်တိတ်ကၠုၚ်ဒၟံၚ် ဗွဲမဂၠိုၚ်ရောၚ် ဟီုလဝ်ကဵု ဌာန်ပရိုၚ် TASS ရ။

အကြာသမ္မတၜါဂှ် ပရေၚ်သဳကၠဳမွဲ ဟွံသေၚ်မ္ဂး ဂၠိုၚ်နူဂှ် နွံကၠုၚ်လဝ်ဟာဟီုဂှ် သွက်ဂွံသ္ပဒတန်ဟီုကဵုဂှ် မိုက်ဝတ် ညးကဵုကသပ်ပရေၚ်ဂီုကၠီုကောန်ဂကူအမေရိကာန် တးပါဲလဝ်ရ။

မိက်ဂွံဖအိုတ်ကၠေံ ပေါဲပၞာန်ဂှ်ရောၚ် ထြာမ် ဟီုလဝ်တုဲ အာဆဵုဂဗကဵု ပူတေန် အလဵုပူဂဵုဏောၚ်ဂှ် သ္ဂးလဝ်ကီုလေဝ် ဒၞါဲဆဵုဂဗသဳကၠဳကဵု အခိၚ်တံဂှ် လလောၚ်တြးလဝ် ဟွံမွဲဏီရ။

လ္ပာ်ရုယှာဂှ်တှ်ေ ညာတ်လဝ် သဝ်ဒဳအာရေဗဳယျာကဵု ယူအေအဳ နဒဒှ်ဍုၚ်သ္ဂောံဒုၚ်တဲကၠောန်ဗဒှ်အာ ပေါဲသဳကၠဳတံဂှ် ထ္မံက်ထ္ၜးလဝ် ပ္ဍဲပရိုၚ်ရိုက်တာရ။

ခြာဟွံလအ်ဏံ စပ်ကဵုပေါဲပၞာန်ယူကရုၚ်တုဲ သွက်ဂွံသဳကၠဳအာဂှ် ဂကောံညးစၞး ဝန်ဇၞော်ကာဍုၚ်သ္အာၚ် အမေရိကာန်၊ ဝန်ဇၞော်ကာစဵုဒၞါ၊ ညးစၞးတၟေၚ် အမေရိကာန် စပ်ကဵုပေါဲပၞာန်ယူကရုၚ် ကေုာံ ဒုသမ္မတတံ  သ္ကိုပ်သ္ကတုဲ သ္ဂောံအာစိုပ်ယူရောပ် နွံဒၟံၚ်ရ။

ညံၚ်သမ္မတပူတေန် ဂွံစိုပ်ကၠုၚ် ပ္ဍဲဝိုၚ်တက်ကျာပေါဲသဳကၠဳဂှ် ထြာမ် သ္ဂောံရပ်စပ်အာ ပရေၚ်ကၟာတ်လဒဵုကေတ်အရေဝ်တံကဵု အကံက်အခေါန်တံ သွက်သ္ဂောံကဵုဇြဟတ်ဂရိုဟ်ဂှ် ဆန္ဒနွံဒၟံၚ်ရောၚ် ညးကဵုကသပ်ဂီုကၠီုကောန်ဂကူ မိုက်ဝတ် ဟီုလဝ်ရ။

သွက်အရီုဗၚ် မ္ဒးကဵုလဝ် ယူကရုၚ်တံဂှ် အမေရိကာန် သဳကၠဳအာ ညံၚ်သ္ဂောံဂွံအခေါၚ်ရပ်စပ် rare earth ပ္ဍဲယူကရုၚ်တံဂှ်ဏောၚ်ဂှ်လေဝ် ဟီုလဝ်ရ။

Ref: Reuters  

Leave a Reply

Your email address will not be published. Required fields are marked *