ကိဗ်၊ ဖေဖဝ်ဝါရဳ ၁၃
ပ္ဍဲကဵုပရေၚ်ပ္ညဳပ္ညပ် မပတုဲဒှ်ကၠေံပေါဲပၞာန် မဒှ်ကၠုၚ်မာန်ဏံဂှ် တိဍာ်သီဂွံလဝ်ညးသ္ကအ်တံဂှ် သွက်ဂွံလှာဲကဵုရုယှာ သမ္မတယူကရုၚ် ဗလာဒဳမာဇြဳလာန်သကဳ ပ္တိုန်လဝ်ဂလာန်ရ။
သၞာံတုဲကၠုၚ် ဂိတုအဝ်ဂါတ်တေံ အပ္ဍဲကဵုပရေၚ်မကၠတ်လုပ်စိုပ်ဗ္တိုက်လဝ်ဂှ် ဒပ်ယူကရုၚ် သီဂွံလဝ် ဒေသကာသ် ဍုၚ်ရုယှာ ညိညရ။
ယဝ်ကလေၚ်ကဵု တိဍာ်ယူကရုၚ် နူရုယှာမသီဂွံလဝ်ဂှ်မ္ဂး နကဵုရုယှာ ကလိဂွံအာအခေါၚ်ထိၚ်ဒက် ဒေသကာဿ်ဏောၚ်ဂှ် သမ္မတ ဇြဳလာန်သကဳ ဟီုလဝ် အပ္ဍဲဆဵုဂဗသၟာန်သၟုက် ကုဌာန်ပရိုၚ် ဂါဒဳယာန်ရ။
သွက်ဒေသကာသ် ယူကရုၚ်တံ မသီဂွံလဝ်ဂှ် လှာဲအာကဵုတိဍာ်ဒေသ ယူကရုၚ်မသီဂွံလဝ် သ္ကုတ်လဵုရောဟီုဂှ် ညး ဟီုကၠုၚ်လဝ် ဟွံမွဲရ။
အခိၚ်ရုယှာ သီကေတ်လဝ် တိဍာ်ယူကရုၚ် ဗွဲမဂၠိုၚ်ဂၠေၚ်ဂှ် နကဵုယၟု ပၞာန်ထ္ပက်သၠုၚ်ပ္တိုန်စိုတ်ဓာတ်ဂှ် ယူကရုၚ် လုပ်ဗ္တိုက်သီကေတ်လဝ် ဒေသကာသ် ရုယှာဂှ်ရ။
လၟုဟ်ဂှ်တှ်ေ ပ္ဍဲဒေသဏံဂှ် ကောန်ပၞာန်ကိုဝ်ရဳယျာသၟဝ်ကျာတံ ဘိုၚ်ဗ္တိုက်ကဵုဒၟံၚ် လ္ပာ်ရုယှာရ။
သမ္မတအမေရိကာန် ဒဝ်နေဝ်ထြာမ်ဂှ်တှ်ေ ဟီုကြီုလဝ် ဖအိုတ်ကၠေံပေါဲပၞာန်ယူကရုၚ်ဂှ်ဏောၚ်တုဲ ချပ်ဂၞန်ဒၟံၚ် သွက်ဂွံပ္ညဳပ္ညပ်အာ အကြာရုယှာကဵု ယူကရုၚ်ဂှ်ရ။
ထြာမ်ဂှ်တှ်ေ ညံၚ်ယူကရုၚ် ဂွံဗလးကၠုၚ်တဲ တိဍာ်မသီဂွံလဝ်နူရုယှာ လၟုဟ်ဂှ် ပ္ညဳပ္ညပ်ကၠုၚ် နကဵုဂလာန်ပ္တိုန်သာ်ဏံမာန်ရောၚ် သၞာဲဒဴဂမၠိုၚ် ဟီုလဝ်ရ။
ရုယှာဂှ်တှ်ေ ပ္ဍဲဒေသခရိုၚ်မဳယျာကဵု ဗွဲဒိုဟ်ဗၟံက်ယူကရုၚ်ဂှ် သီဂွံလဝ် တိဍာ် ၂၀ တၟံကၠံရ။
သမ္မတ ဗလာဒဳမာပူတေန်ဂှ်တှ်ေ တိဍာ်ရုယှာသီဂွံလဝ်ပန်ဂှ် ဒှ်တိဍာ်ညးတံ မပိုၚ်ပြဳလဝ်ရောၚ် လ္ပာ်ယူကရုၚ် သွက်သ္ဂောံသ္ပကဵုစၟတ်သမ္တီ မပါလုပ် ညံၚ်ပေါဲပၞာန်ဂွံတုဲဒှ်အာဂှ် အာတ်မိက်လဝ် နွံရ။
သမ္မတအမေရိကာန် ဒဝ်နေဝ်ထြာမ် မဟီုကြီုလဝ် အပ္ဍဲပွိုၚ် ၂၄ နာဍဳ မဖအိုတ်ကၠေံပေါဲပၞာန်ရုယှာ−ယူကရုၚ်ဂှ်လေဝ် အပ္ဍဲပွိုၚ် ၁၀၀ တ္ၚဲ ညံၚ်ပေါဲပၞာန်ဂှ်ဂွံတုဲဒှ်ဂးတုဲ ကလေၚ်ဟီုကၠုၚ်လဝ်ရ။
ဂကောံညးစၞးအမေရိကာန် ပါလုပ်သီုကဵုဒုသမ္မတအမေရိကာန် ကေုာံ ဝန်ဇၞော်ကာဍုၚ်သ္အာၚ်တံဂှ် အာစိုပ်ဥရဝ်ပတုဲ ဂွံဆဵုဂဗ ကုသမ္မတဇြဳလာန်သကဳ နွံဒၟံၚ်ရ။
Ref: THE HILL