ဂျဳနဳဗာ၊ ဖေဖဝ်ဝါရဳ ၁၄
အလဵုအသဳတြေံ ဗေန်ဂလာန်ဒေတ် ပ္ဍဲသၞာံတုဲကၠုၚ်တေံ အခိၚ်ပ္တိတ်ကၠုၚ်ဇြဟတ် သ္ဂောံဆက်ထိၚ်အာအဝဵုဂှ် ပ္ဍဲကဵုပရေၚ်ဗ္တိုက် ပြိုက်ဂစိုတ်လဝ် ကုညးထ္ၜးဆန္ဒတံ ဗွဲမစှ်ေကဵုသၞောတ်ဂှ် ပါလုပ်လဝ် လ္ပာ်လက္ကရဴဂှ် ကုလသမဂ္ဂ ဟီုလဝ် ပ္ဍဲဂိတုဖေဖဝ်ဝါရဳ ၁၂ တေံတုဲ ပရေၚ်ဖံက်ပ္ကဝ်သၞောဝ်ဏံဂှ်ဝွံ ဒှ်ဂဗုတ်ရာဇဝတ် ကလိလောန် လ္တူဂကူမၞိဟ်တံဏောၚ်ဂှ် ကဵုလဝ်သတိရ။
ကၠာသ္ကိုပ်ဝန်ဇၞော် ယှုက်ဟာသဳနာ ဟွံဂွံဒးဒုၚ်ပလှ်ဖျေံဏီ နကဵုပေါဲထ္ၜးဆန္ဒ ကွးဘာဂမၠိုၚ်အာက္ဍိုပ် ပ္ဍဲဂိတုအဝ်ဂါတ်တုဲကၠုၚ်တေံဂှ် အလဵုအသဳညးဝွံ ပါ်ထ္ကးလဝ် ညးထ္ၜးဆန္ဒတံ ဗွဲမစှ်ေကဵုသၞောတ်ကီု၊ ပြိုက်ဂစိုတ်လဝ် မ္ၚးသၞောဝ်တံကီု ပရေၚ်ဂစိုတ်မၞိဟ်တၞဟ်သ္အာၚ် ဗွဲမဂၠိုၚ်ဂၠေၚ် ကလိလောန်လဝ်ရောၚ် ကုလ ဟီုရ။
သွက်ပရေၚ်ပရူ မက္တဵုဒှ်လဝ် ပ္ဍဲဗေန်ဂလာဒေတ် ပ္ဍဲသၞာံတုဲကၠုၚ် အကြာဂိတုဂျူလာၚ် ၁ ကဵု အဝ်ဂါတ် ၁၅ ဂှ် ထ္မံက်ထ္ၜးကၠုၚ် တၚ်နၚ်ဂွံဂၠါဲဆဵုကေတ်လဝ်ဂှ်တုဲ အလဵုအသဳတြေံ ဗေန်ဂလာဒေတ်ဝွံ ဒဒှ်ရကလိလောန်လဝ် ပရေၚ်ဂစိုတ်မၞိဟ် မကလိလောန်လဝ် လ္တူဂကူမၞိဟ်တံ၊ ပရေၚ်ဍဵုဍိုက်ပျဲပျာံ၊ ပရေၚ်ဖျေံထံၚ် ကေုာံ ပရေၚ်ဘပဠ နကဵုနဲကဲ မဟွံမွဲကဵုဗ္စာရဏာမၞိဟ်တံဂှ် သက်သဳဂမၠိုၚ် နွံဒၟံၚ်ရောၚ် ကုလသမဂ္ဂ ထ္မံက်ထ္ၜးလဝ်ရ။
ပ္ဍဲကဵုဖံက်ပ္ကဝ်သၞောဝ်ဥပဒေသာ်ဏံဂှ် သၞာဲဒဴအလဵုအသဳဟာသဳနာ၊ ညးပကီုပရာပ် နူကဵုဗော်ညး၊ ဒပ်ဂီုကၠီု ကေုာံ ထံၚ်ပရိုၚ် ဗေန်ဂလာဒေတ်တံ ပါလုပ်လဝ်ရောၚ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
သ္ကိုပ်ဝန်ဇၞော်တြေံ ဟာသဳနာ အာယုက်မၞုံ ၇၇ သၞာံ ဂြိပ်တိတ်အာ လ္ပာ်ဍုၚ်အိန္ဒိယ ဍုၚ်ဇိုၚ်ဝုတ်ဒိုဟ်ဂှ် ဍုၚ်ဗေန်ဂလာဒေတ် စောဲလဝ်ဒုဟ် နကဵုအမှုရာဇဝတ် မကလိလောန် လ္တူဂကူမၞိဟ်တံဂှ်တုဲ သွက်ဂွံကလေၚ်လှဲပြံၚ်ကဵုဂှ် အာတ်မိက်လဝ်ကီုလေဝ် လ္ပာ်နျူဒေလဳ ဟွံဂွံလှဲပြံၚ်ကဵုဏီရ။
ပ္ဍဲလက်ထက်ဟာသဳနာ ပွိုၚ် ၄၅ တ္ၚဲဂှ် ပြိုက်ဂစိုတ်လဝ် လၟိဟ်မၞိဟ် ၁၄၀၀ တုဲ မၞိဟ်ဂၠိုၚ်ကဵုလ္ၚီ ဇီုကပိုက်ကလိဂွံလဝ်ဝပ်ရောၚ် ထ္မံက်ထ္ၜးလဝ် ပ္ဍဲပရေၚ်ဂၠိုက်ဂၠါဲစၟဳတ် သၟဝ်သ္ကိုပ်သ္က အလဵုအသဳယာယဳ ဗေန်ဂလာဒေတ်ဂှ်ရ။
ညးမဒးချိုတ်အာ ဗွဲမဂၠိုၚ်ဂှ်ဝွံ ဒှ်ဟိုတ်နူပရေၚ်ဒပ်ဂီုကၠီုဗေန်ဂလာဒေတ်တံ ပန်ပှော်ဏောၚ်ဂှ် ဂွံတီကေတ်ရ။
မၞိဟ်ဒးဒုၚ်ဂစိုတ် မ္ၚးသၞောဝ်ဂှ်လေဝ် နွံဂၠိုၚ်ကဵုကၠံတုဲ ညးဒးဒုၚ်ရပ်ပျဲပျာံ မွဲလ္ပာ်ဓဝ်တံဂှ် နွံဒၟံၚ် ဗွဲမဂၠိုၚ်ဂၠေၚ်ရောၚ် ဂွံတီကေတ်ရ။
Ref: AFP