ဂျေရူသလေန်၊ ဖေဖဝ်ဝါရဳ ၁၅
ၜိုတ်လဒေါဝ်သၞာံဏံ အေဿရေ သ္ဂောံဗ္တိုက်အာ ကိုန်စဳမာန်နျူကလဳယျာအဳရာန် နွံဂှ် ထံၚ်ပရိုၚ်အမေရိကာန် ကဵုလဝ်သတိဂှ် နိဿဲကေတ် ပရိုၚ်ထံၚ်ပရိုၚ်ဂမၠိုၚ်တုဲ လိက်ပရိုၚ် Washington Post ထ္မံက်ထ္ၜးလဝ်ရ။
ယဝ်အေဿရေ ဗ္တိုက်ကၠုၚ်သာ်ဏံမ္ဂး အပ္ဍဲဒေသ ပရေၚ်ကြံၚ်မ္ၚိုဟ် အသိၚ်သ္ကာတ်ကၠုၚ်ဏောၚ်တုဲ အန္တရာယ်ပေါဲပၞာန်မသၠဲလးမွဲ ဒှ်ကၠုၚ်မာန်ဂှ်လေဝ် နွံဂှ် အခိၚ်အလဵုအသဳဗိုၚ်ဒေန်စှ်ေတုဲ အလဵုအသဳထြာမ် မတိုန်ကၠုၚ်ဂှ် ပရိုၚ်ထံၚ်ပရိုၚ်မမံက်တိတ်ကၠုၚ်တံဂှ် နိဿဲကေတ်တုဲ လိက်ပရိုၚ်ဂှ် ထ္မံက်ထ္ၜးလဝ်ရ။
ယဝ်ရဗ္တိုက်ကၠုၚ်သာ်ဏံမ္ဂး ကိုန်စဳမာန်နျူကလဳယျာ အဳရာန်ဂှ်လေဝ် မ္ဒးဆုတ်ယောၚ်အာ တၟာလအ်ဏောၚ် မဒှ်ရ။
ပရိုၚ်ဏံဂှ် ဌာန်ပရိုၚ်ရိုက်တာ ဟွံဂွံသ္ပဒတန်ဏီတုဲ သ္ၚိဗုလေဝ် ဂွံဟီုကၠုၚ်မမိက်ကဵုမွဲမွဲဂှ် ကယျာန်ပါဲလဝ်ရ။
အလဵုအသဳအေဿရေ၊ သဳအိုၚ်အေ၊ အေဂျေန်ဇြဳပရေၚ်စဵုဒၞါ ကေုာံ ပရေၚ်ထံၚ်ပရိုၚ်၊ ရုၚ်သ္ကိုပ်စၞောန်ပ္ညုၚ် ထံၚ်ပရိုၚ်ကောန်ဂကူတံ သွက်ဂွံသ္ပကဵုတၚ်စၟတ်ဂှ် ကယျာန်ပါဲလဝ်ရောၚ် ထ္မံက်ထ္ၜးလဝ် ပ္ဍဲ Washington Post ရ။
နကဵုသမ္မတအမေရိကာန် ဒဝ်နေဝ်ထြာမ် ညံၚ်အဳရာန် သ္ဂောံပိုၚ်ပြဳလွဟ်လက်နက်နျူကလဳယျာဂှ် ကဵုအာအခေါၚ်ဟွံသေၚ်ပုဟ်ဂှ် ဘရိုၚ်ယာန်ဟုတ် ညးမၞုံအခေါၚ်ဟီုဂး ကံၚ်ဇြဳဂီုကၠီုကောန်ဂကူ သ္ၚိဗု ဟီုလဝ်ရ။
နကဵုအဳရာန် စပ်ကဵုကိုန်စဳမာန်နျူကလဳယျာညးတံတုဲ သွက်ဂွံပ္ညဳပ္ညပ်အာဂှ် ဆန္ဒဟွံမွဲပုဟ်ဟီုမ္ဂး နကဵုထြာမ် မၚ်အာအခိၚ်ဟွံသေၚ်ပုဟ်ဂှ် ဘရိုၚ်ယာန် ညးမၞုံအခေါၚ်ဟီုဂး ဟီုရ။
ပရိုၚ် ထံၚ်ပရိုၚ်တံဏံဝွံ မံက်တိတ်ကၠုၚ်လဝ် ပ္ဍဲဂိတုဂျာန္နဝါရဳတေံတုဲ အေဂျေန်ဇြဳပရေၚ်စဵုဒၞါ ပရေၚ်ထံၚ်ပရိုၚ်တံ ကေုာံ ဌာနသ္ကိုပ်စၞောန်ပ္ညုၚ် ပရေၚ်ထံၚ်ပရိုၚ် ရုၚ်သ္ကိုပ်က္ဍိုက်ပ်ပၞာန်တံ လလောၚ်ပ္တိတ်လဝ်ဂှ် ဌာန်ပရိုၚ် Washington Post ထ္မံက်ထ္ၜးလဝ်ရ။
ပ္ဍဲကဵုလိက်ဒုၚ်စဳရေၚ်ထံၚ်ပရိုၚ်ဏံဂှ်တှ်ေ အေဿရေ ဗ္တိုက်ကၠုၚ် ရုၚ်စက်နျူကလဳယျာအဳရာန် Fordow ကဵု Natanz မာန်ဂှ် ထ္မံက်ထ္ၜးလဝ်ရ။
သၞာံတုဲကၠုၚ် ပ္ဍဲဂိတုအံက်တဝ်ဗာတေံ အေဿရေ ထောံမခတိုဟ်ဗ္တိုက်ကၠုၚ် ကုအဳရာန်ဂှ်ဝွံ သွက်ဂွံထပ်ကၠောန်ကၠုၚ်ပရေၚ်ဗ္တိုက်တံမာန် ညံၚ်အစောံဇြဟတ်အဳရာန် စပ်ကဵုပရေၚ်စဵုဒၞါပၞာန်ကျာတံ ဇြဟတ်ဂွံဍိုန်စှ်ေအာဂှ်တုဲ ဗ္တိုက်လဝ်ရောၚ် သၞာဲဒဴထံၚ်ပရိုၚ်အမေရိကာန် လၟုဟ်ကဵု သၞာဴဒဴတြေံတြေံတံ ဟီုလဝ်ရ။
စပ်ကဵုပရေၚ်အေဿရေ ဗ္တိုက်ဒၟံၚ် ပ္ဍဲဂါဇြာဂှ်တုဲ အခိၚ်ပရေၚ်ကြံၚ်မ္ၚိုဟ်ဇၞော်ကဵုဇြဟတ်တံ နွံဒၟံၚ်ဂှ် သၞာံတုဲကၠုၚ်တေံ အေဿရေ ကေုာံ အဳရာန် ဗ္တိုက်ကၠုၚ်လဝ်ညးသ္ကအ် ညးမွဲဣဝီု အဲမွဲဣဝီုရ။
Ref: Reuters