မျူနေတ်၊ ဖေဖဝ်ဝါရဳ ၁၆
ကၠာဟွံဂွံဆဵုဂဗ ကုသမ္မတ ဗလာဒဳမာ ဇြဳလာန်သကဳဂှ် သွက်ဂွံဖအိုတ်ကၠေံ ပေါဲပၞာန်ယူကရုၚ်ဂှ် အမေရိကာန် သွက်ဂွံကဵုဇြဟတ်ဂရိုဟ် ကုရုယှာဂှ် ဒစးဒုၚ်ပလေဝ်ပလေတ်လဝ်ရောၚ် ဒုသမ္မတ ဂျေဒဳဗာန် ဟီုလဝ် ပ္ဍဲဂိတုဖေဖဝ်ဝါရဳ ၁၄ တေံရ။
ပ္ဍဲကဵုပေါဲသဳကၠဳ စပ်ကဵုပဋိပက္ခ လအ်ကၠုၚ်ကြပ်ပေၚ်ပွိုၚ်ပိသၞာံဂှ် ဍုၚ်ယူရောပ် မဒှ်ဒၟံၚ်ဓဝိၚ် ဖေက်ဒးဒုၚ်ပသှ်ေၜက်အာ နူကဵုပေါဲသဳကၠဳတံဏံဂှ်လေဝ် ဒဒှ်ရညးတံ ဂွံပါလုပ်သဳကၠဳအာဏောၚ်ဂှ် ဒုသမ္မတအမေရိကာန် ဟီုလဝ်ရ။
ဆ္ဂး နကဵုယူရောပ် ဒဒှ်ရနွံပၟိက် ဒးပါ်ပရအ်ကဵုလျိုၚ်ပရေၚ်စဵုဒၞါညးတံဏောၚ်ဂှ် ဒုသမ္မတ ဂျေဒဳဗာန် ဟီုလဝ်ရ။
ပရေၚ်ဗၠးၜးယူကရုၚ်ဂှ် ဒဒှ်ရညးထံက်ဂလာန်ဂှ်ကီု၊ သွက်ဂွံတာဒၞါရုယှာဂှ် ပ္ဍဲကဵုဝါယှေန်တာန် အစောံဇြဟတ်ပရေၚ်ပၞာန် သ္ဂောံရပ်စပ်တံ နွံဂှ်လေဝ် ညးဟီုလဝ်ရ။
သွက်ပေါဲပၞာန်ဂွံတုဲဒှ်အာဂှ် ကရောံအမေရိကာန်၊ ယူရောပ်တံဂှ် ညးတံကလိဂွံတၚ်တုပ်စိုတ်မွဲတုဲမ္ဂး သွက်ဂွံသဳကၠဳအာ ကုရုယှာ တိုက်ရိုက်ဂှ် ဒှ်ဒၟံၚ်ဒတုဲရောၚ် ကၠာဟွံဂွံဆဵု ကုဒုသမ္မတဗာန် ပ္ဍဲဍုၚ်မျူနေတ်ဂှ် သမ္မတယူကရုၚ် ဇြဳလာန်သကဳ ဟီုလဝ်ရ။
ဆ္ဂး နကဵုယူရောပ် မလုပ်ဂကောံနေတိုဝ် ဒှ်ဍုၚ်မဟာမိတ် အမေရိကာန်ဂှ်တှ်ေ ရန်ကဵုသွက်ပရေၚ်ၜိုဟ်လလမ်ယူကရုၚ် အနာဂတ်တေံတုဲ နကဵုပရေၚ်စဵုဒၞါညးတံအပိုၚ်ဂှ် ဒးကၠောန်ဂလိုၚ်ပ္တိုန်အာနူဏံဏောၚ်ဂှ် ဝန်ဇၞော်ကာစဵုဒၞါအမေရိကာန် ပိဟက်သိုတ် ဟီုလဝ်ရ။
အမေရိကာန် ရီုဗၚ်ကဵုအာ ထာဝါရမာန်ဟွံသေၚ်တုဲ နကဵုမဟာမိတ်ညးတံ ဍုၚ်မလုပ်ဂကောံနေတိုဝ်တၞဟ်ဟ်ဂမၠိုၚ်လေဝ် သွက်ဂွံကၠောန်သ္ပ ပရေၚ်ဓလိုက်တမ်ရိုဟ် ပ္ဍဲပရေၚ်စဵုဒၞါဂှ် စိုပ်အခိၚ်ယျဂှ် ဝန်ဇၞော် ဟက်သိုတ် ဟီုလဝ်ရ။
နကဵုယူကရုၚ် သွက်သ္ဂောံဂွံပရေၚ်ၜိုဟ်လလမ်ဂှ် ဒဒှ်မပ္တိတ်ဒၟံၚ်ဇြဟတ် ညံၚ်ဂွံဒှ်ဍုၚ်မလုပ်ဂကောံနေတိုဝ်ဂှ် ဒးဒေါအ်ဒေၚ်အာဏောၚ်တုဲ တိဍာ်ဒးဗလးလဝ်တဲလ္ၚဵုတံဂှ်လေဝ် ဒးကဵုအာရုယှာမာန်ရ။
ပ္ဍဲကောံဓရီုဍုၚ်မျူနေတ်ဂှ် ဒုသမ္မတအမေရိကာန် လလောၚ်တြးကၠုၚ် ဒဒှ်ရဒပ်အမေရိကာန် ဆုတ်ကလေၚ်အာနူယူရောပ်မာန်ဂှ် ဇၞော်သ္ကိုပ်ကောံဓရီုဂမၠိုၚ် ဟီုလဝ်ရ။
နကဵုဍုၚ်မလုပ်ဂကောံနေတိုဝ်ဂမၠိုၚ် သွက်ပရေၚ်စဵုဒၞါဂှ် သွက်ဂွံရပ်စပ်ၚုဟ်မးဗၞိက်ကၠောန်ပ္တိတ်အပ္ဍဲဍုၚ်ညးတံ ဂျဳဒဳပဳ စဵုကဵု ၅ တၟံကၠံဂှ်လေဝ် အမေရိကာန် အာတ်မိက်အာဏောၚ်ဂှ် စၟဳကေတ်လဝ်ရ။
ဝန်ဇၞော်ကာစဵုဒၞါဂျာမနဳ ဗဝ်ရေတ် ပေတ်ထရဳယာတ်ဂှ်တှ်ေ ဒၞါဲဒပ်အမေရိကာန် နွံဒၟံၚ်ပ္ဍဲယူရောပ်တံဂှ် ဂွံထ္ပက်စုတ်အဇာ ဒပ်ယူရောပ်တံ လွာဲဂှ်ဂှ် ဒှ်ဟွံမာန်တုဲ စပ်ကဵုပရေၚ်ဒပ်အမေရိကာန်တံ ဆုတ်အာဂှ်တုဲ ဗီုတိထ္ၜးဂၠံၚ် ဒးနွံထေက်ဂှ် ကဵုလဝ်သတိရ။
ဒုသမ္မတ ဂျေဒဳဗာန်ဂှ်တှ်ေ တိဍာ်ယူကရုၚ် ဗၞတ်ၜိုတ်လဵု ဆက်စွံအာပ္ဍဲတဲရုယှာဂှ်ရော ဟွံသေၚ်မ္ဂး အမေရိကာန် ကေုာံ မဟာမိတ်ညး ဍုၚ်ပလိုတ်ဂမၠိုၚ် ဗီုလဵုဒုၚ်ကဵုလျိုၚ်ပရေၚ်ဂီုကၠီု သွက်ယူကရုၚ်ရောဟီုဂှ် ဂွံဟီုဂှ်ပြဟ်ဒၟံၚ်ဏီရောၚ် ဟီုလဝ်ရ။
အခိၚ်စဳဇန်ဒၟံၚ် သ္ဂောံသဳကၠဳသာ်ဏံဂှ် ဟိုတ်နူရုယှာ ဆက်ကၠောန်ဒၟံၚ်ပရေၚ်ဗ္တိုက်တံဂှ်တုဲ နကဵုသမ္မတပူတေန် ရန်လဝ်သွက်ဂွံသဳကၠဳဟွံမွဲ ဒဒှ်ရထ္မံက်ထ္ၜးဒၟံၚ်ဂှ် ဇြဳလာန်သကဳ ဟီုလဝ်ရ။
Ref: AFP