ကွာလာလာမ်ပူ၊ ဖေဖဝ်ဝါရဳ ၁၈
ကမၠောန်ကျာဖျ နွံပ္ဍဲဍုၚ်ပယျဵုသေံ−ဗၟာ၊ ပ္ဍဲကာမ္ဗောဒဳယျ၊ ကဵု ပ္ဍဲလာအိုဝ်တံဂှ် သြန်မကလိဂွံနၚ်နူကမၠောန်တံဏံ နနဲဟွံဗဗွဲသၞောဝ်တံဂှ်ဝွံ ညံၚ်ပၞာန်အပ္ဍဲဍုၚ်ဗၟာ ဂွံဂဵုထၞာန်ကၠုၚ်ဂှ် စုတ်ဒၟံၚ်ပရက်ပၟတ်တံရောၚ် သ္ကိုပ်ဝန်ဇၞော်သေံတြေံ တက်ဇြေန် ယှေန်နာဝါထရာ ဟီုလဝ်ရ။
သြန် ဂိုန်လီဠာန်သြန်လ္တူလပှ်ကျာတံ မကလိဂွံဒၟံၚ်ဂှ်ဝွံ ဒှ်သြန်ဟွံသ္အးဇ္ၚးဂှ် တက်ဇြေန် ဟီုရ။
သြန်ဟွံသ္အးဇ္ၚးသာ်ဏံဂှ် ကံၚ်ဇြဳပၞာန်ဗၟာ ကေုာံ ဂကောံရပ်လွဟ်ဗွဲမဂၠိုၚ် ရပ်စပ်ဒၟံၚ် သွက်ပရေၚ်ဗ္တိုက်တံဂှ်တုဲ အရာဏံဝွံ စၞောန်ထ္ၜးဒၟံၚ် အရာမထုဲထံၚ် ပ္ဍဲပၞာန်အပ္ဍဲဍုၚ်ဂှ်တုဲ ဒဒှ်ရနွံပၟိက် ဒးဖအိုတ်ကၠေံ ပၞာန်အပ္ဍဲဍုၚ်ဂှ်ဏောၚ်ဂှ် ညးဟီုရ။
စပ်ကဵုဂိုန်မကလိလောန်ဒၟံၚ် အမှုရာဇဝတ်တတ်ကၠောံပယျဵု အပ္ဍဲဒေသဂှ်တုဲ ဍုၚ်အာဇြဳယာန်ဂမၠိုၚ် ဂွိၚ်ဒၟံၚ်အိုတ်ရောၚ် တက်ဇြေန် အာယုက်မၞုံ ၇၅ သၞာံဂှ် ဟီုရ။
ကမၠောန်ကျာဖျ မစွံဒၟံၚ်ပွန် ကုမၞိဟ်အလုံဂၠးမွဲဂှ် သွက်ဂွံဗ္တိုက်သရိုဟ်ဂှ်တုဲ ပ္ဍဲဂိတုဖေဖဝ်ဝါရဳ ၅ တေံ ဍုၚ်သေံ ထပိုတ်ကၠုၚ်လဝ် ပရေၚ်မပလံၚ်ဗစိုပ်ကဵုဒၟံၚ် ဇြဟတ်ဓာတ်၊ အေန်တာနိတ်၊ စၞပၟတ် ကုဍုၚ် နွံပယျဵုသေံ−ဗၟာ ၅ ဍုၚ်ဂှ်ရ။
ကြဴနူဒးဒုၚ်ထပိုတ်ကၠုၚ် ဇြဟတ်ဓာတ်တုဲဂှ် ကမၠောန်ပရေၚ်ပိုန်ဒြပ်ကြုက် နွံပ္ဍဲဍုၚ်ကျာ်ပိတံ ဒဒှ်ရတိတ်စၞးအာဂှ် ဌာန်ပရိုၚ် Bangkok Post ထ္မံက်ထ္ၜးလဝ် ပ္ဍဲဂိတုဖေဖဝ်ဝါရဳ ၁၃ တေံရ။
ဟိုတ်နူအရာမလာပ်ပထုဲသာ်ဏံတုဲ ညးဒေသတံ ဇီုကပိုက်ကီုလေဝ် ကမၠောန်မ္ဒးကၠောန်ဂှ် အလဵုအသဳသေံ ကၠောန်ကၠုၚ်လဝ်ရောၚ် တက်ဇြေန် သ္ဂးရ။
ဒပ်မၚ်ပယျဵုကရေၚ် မထိၚ်ဒက်လဝ် ပယျဵုဍုၚ်ဗၟာဂှ်တှ်ေ ကၠာဂိတုဖေဖဝ်ဝါရဳဟွံဂွံအိုတ်ဏံ ညံၚ်ဂိုန်လီဠာန်သြန်လ္တူလပှ်ကျာတံ ဂွံတိတ်စၞးအာအိုတ်ဂှ် စၞောန်ပ္ညုၚ်လဝ်ဂှ်ကီု၊ သၟာကမၠောန်နူကဵုဂိုန်ကျာဖျ ၁၀၀၀၀ ဂှ် သွက်ဂွံလှဲပြံၚ်ကဵု ဇရေၚ်သၞာဲဒဴသေံတံဂှ် ပလေဝ်ပလေတ်လဝ်ရောၚ် သ္ဂးလဝ်ရ။
ညံၚ်ကမၠောန်ကျာဖျာတံဏံ၊ ကမၠောန်လီဠာန်ဝေၚ်ၛှၚ်လံၚ်သြန်တံ ကေုာံ ကမၠောန်ချဳဒရာၚ် အရာဟွံလုပ်သၞောဝ်တၞဟ်ဟ်ဂမၠိုၚ် ဂွံအိုတ်အးအာဂှ် ဍုၚ်သေံ ပံၚ်တောဲရေၚ်တၠုၚ်အာ ကရောံဍုၚ်ကြုက်၊ ဍုၚ်ဇိုၚ်ဝုတ်ဒိုဟ်ဂမၠိုၚ်ဏောၚ်ဂှ် သ္ကိုပ်ဝန်ဇၞော်သေံ ဗဴဓေါန်ဓါန် ယှေန်နာဝါထရာ ကောန်ဟဒေံတက်ဇြေန် ဟီုလဝ်ရ။
ကြဴနူသၞာဲဒဴသေံတံ ရီုဗၚ်ကဵုလဝ် ကောန်သၟိၚ်ထ္ၜးရုပ်ဍုၚ်ကြုက်မွဲတၠ နူကဵုကမၠောန်ကျာဖျ ပ္ဍဲဍုၚ်ဗၟာတုဲဂှ် သွက်ဂွံဗ္တိုက်သရိုဟ် ကမၠောန်ကျာဖျဂှ် သေံကဵုကြုက် ပံၚ်တောဲတုဲ သၠုၚ်ပ္တိုန်အသိၚ် ကၠောန်ကၠုၚ်လဝ်ရ။
စရၚ်သၞာဲဒဴအလဵုအသဳသေံ ကဆံၚ်သၠုၚ်ဂမၠိုၚ် မပါလုပ်ဆက်စပ်ဒၟံၚ် ပ္ဍဲကမၠောန်ကျာဖျတံဂှ်လေဝ် ဂၠိုက်ဂၠါဲထ္မံက်ပ္တိတ်အာဏောၚ်တုဲ သွက်ဂွံကေတ်အရေဝ် နွံဒၟံၚ်ရောၚ် ဂွံတီကေတ်ရ။
Ref: Bernama