သဵု၊ ဖေဖဝ်ဝါရဳ ၁၉
DeepSeek မရေၚ်တၠုၚ်ကဵုပရေၚ်သၟာန်သၟုက်ဟီုဂးတက်ကျာ နူကဵုကမ္ပဏဳညာန်ပတောံ ဖျေံသ္ဇိုၚ်ဍုၚ်ကြုက် မခၞံဗဒှ်လဝ်ဂှ် ပလံၚ်ဗစိုပ်ဒၟံၚ် တၚ်နၚ်ကောန်ဍုၚ်ကိုဝ်ရဳယျာသၠုၚ်ကျာ ညးမသုၚ်စောဲဂမၠိုၚ် ဇရေၚ်ကမ္ပဏဳကြုက် ByteDance မဒှ်ကမ္ပဏဳပိုၚ်ပြဳလဝ် Tik Tok ဂှ်ရောၚ် ဂကောံကောပ်ကာဲ ပရေၚ်စဵုဒၞါတၚ်နၚ်ကိုဝ်ရဳယျာ ဟီုလဝ်ရ။
ကဝ်မယှေန်စဵုဒၞါတၚ်နၚ်ပူဂဵု PIPC ဂှ်တှ်ေ ဟိုတ်နူပရေၚ်ဒှ်ဓဝိၚ် စပ်ကဵုလၟေၚ်ကမၠောန်ပ္ကောံတၚ်နၚ်တံဂှ်တုဲ ဒဒှ်ရဒေါအ်အာ ပွမတံၚ်ဂြဲ DeepSeek တံ ဗွဲယာယဳတုဲ ဂွံမွဲတ္ၚဲဂှ် လလောၚ်ပ္တိတ်ကၠုၚ် တၚ်သ္ပဒတန်သာ်ဏံရ။
သၞာဲဒဴ PIPC မွဲတၠဂှ်တှ်ေ ဒဒှ်ရ DeepSeek ဆက်စၠောံဒၟံၚ်ကဵု ByteDance ဂှ် သ္ပဒတန်ဂွံလဝ်ရောၚ် ဟီုလဝ်ရ။ ဆ္ဂး တၚ်နၚ်သာ်လဵု ဒဵုဗၞတ်ၜိုတ်လဵု လှဲပြံၚ်ကဵုမာန်ရောဟီုဂှ်တှ်ေ နကဵု PIPC သ္ပဒတန်ဟွံမာန်ဏီပုဟ်ဂှ် သၞာဲဒဴဂှ် ဟီုရ။
တၚ်နၚ်ညးမရပ်စပ် DeepSeek တံ စိုပ်အာတဲ ဂကောံတတိယမာန်ရောၚ် ဂကောံထိၚ်ဒဝ်စေဝ်ပၞောန် သ္ပဒတန်ကၠုၚ်ဂှ်တှ်ေ ဣဏံ ဒှ်အလန်ပထမကၠာအိုတ်ရ။
အတိုၚ်သၞောဝ်ကိုဝ်ရဳယျာသၠုၚ်ကျာဂှ်မ္ဂး ယဝ်ကဵုတၚ်နၚ်ပူဂဵုညးမရပ်စပ်ကပေါတ်တံဏံ ဇရေၚ်ဂကောံမ္ၚးမွဲမွဲဂကောံ ဇရေၚ်ဂကောံတတိယတံဂှ်မ္ဂး ဒးကေတ်အခေါၚ် ဇရေၚ်ညးမရပ်စပ်တံဏံဏောၚ် မဒှ်ရ။
နကဵု DeepSeek သွက်ဂွံလလောၚ်ပ္တိတ်သောၚ်ကလးကဵု ဗီုပြၚ်ညးတံကောပ်ကာဲ၊ ဂိုၚ်စွံတၚ်နၚ်ဒေတာ နွံဒၟံၚ်ပ္ဍဲညးတံဂှ် လ္ပာ် PIPC အာတ်မိက်လဝ် ဗွဲမလုပ်သၞောဝ်ရ။
သွက်ဂွံခၠေဝ်ပလန်အရာဏံဂှ် ပ္ဍဲကိုဝ်ရဳယျာသၠုၚ်ကျာ DeepSeek ခါန်ကၞက်ပ္တိုန်လဝ် ညးစၞးမွဲတၠတုဲ ပ္ဍဲကဵုစၚ်ခြၚ်သ္ၚဳဂၠိပ်ကၠုၚ် သၞောဝ်ဒေသတံဂှ် တၚ်ဍိုန်လျဂမၠိုၚ် နွံဒၟံၚ်ဂှ် ဒဒှ်ရညးတံသ္ပစၟတ်သမ္တီဂှ်ကီု၊ ဒဒှ်ရပံၚ်တောဲရေၚ်တၠုၚ်အာ ကရောံကဝ်မယှေန် ဗွဲမကတိုၚ်ကၟိုဟ်ဏောၚ်ဂှ် ဟီုပ္တိတ်ကၠုၚ်လဝ်ရ။
Ref: Yonhap