ဗရာဇြဳလဳယာ၊ ဖေဖဝ်ဝါရဳ ၂၀
သမ္မတဗရာဇြဳတြေံ ဂျာယျာ ဗိုဝ်သိုဝ်နာရိုဝ်ဝွံ ကြဴနူမ္ဒးကျဗြံအာ ပ္ဍဲပေါဲရုဲမာဲသမ္မတ သၞာံ ၂၀၂၂ တုဲဂှ် ပ္တိတ်ကၠုၚ်လဝ်ဇြဟတ် သွက်ဂွံသီအဝဵုရောၚ် နကဵုတၚ်စောဲစပ်သာ်ဏံဂှ် ဂအုပ်ညးရေၚ်တၠုၚ်ဂဗုတ်အလဵုအသဳ စောဲလဝ်ဂဗုတ်ရ။
လုပ်ပြိုၚ်လဝ် ပ္ဍဲပေါဲရုဲမာဲတုဲဂှ် သမ္မတတြေံ ဗိုဝ်ရိုဝ်နာရိုဝ် အာယုက်မၞုံ ၆၉ သၞာံ ကၠောန်ပတာဒၞါလဝ် ညံၚ်သမ္မတ လူလာဒါသေပါ တိုန်ကၠုၚ်လက္ကရဴဏံ ကေတ်တာလျိုၚ်ဟွံဂွံဂးတုဲ စပ်ကဵုတၚ်စောဲစပ်ဏံတုဲ ဒးဒုၚ်စောဲလဝ် ၅ ဂဗုတ်ရ။
ပ္ဍဲကဵုတၚ်စောဲစပ်ဂမၠိုၚ်ဂှ် အရာမစောဲစပ်လဝ် ဒဒှ်ရညးစုတ်လဝ်ထံၚ် ကုသမ္မတလူလာတုဲ ပ္တိတ်ကၠုၚ်လဝ်ဇြဟတ် သွက်ဂွံပန်ဂစိုတ် ဂအုပ်နာဲဗ္စာ အလက်သာန်ဒရဳ မိုဝ်ရေ သာ်ဝွံလေဝ် ပါလုပ်ရ။
သမ္မတတြေံ ဗိုဝ်သဵုနာရိုဝ်ဂှ်တှ်ေ နကဵုညး ကၠောန်လဝ်ဗၠေတ်တ်ဟွံမွဲပုဟ်ဂှ် တးပါဲလဝ်တုဲ ညးဝွံ ဒှ်ပရန် အရၚ်ဂွံဍဵုဍိုက် သွက်ပရေၚ်ဍုၚ်ကွာန်ရဂှ် ဟီုလဝ်ရ။
ပရေၚ်ဂအုပ်ညးရေၚ်တၠုၚ်ဂဗုတ်အလဵုအသဳ စောဲစပ်လဝ်ဂှ် အခိၚ်လၟုဟ် ရုၚ်သၞောဝ်ဓဝ်သၠုၚ်အိုတ်ဂှ် စၟဳစၟတ်သ္ဂုတ်သွာတ်ကဵုအာဏောၚ် မဒှ်ရ။
ယဝ်ရုၚ်သၞောဝ်ဓဝ်ဏံ ဒုၚ်တဲမ္ဂး ဗိုဝ်သဵုနာရိုဝ် ကေုာံ မၞိဟ် ၃၃ တၠ ဒးဒုၚ်စောဲဂဗုတ် ဗွဲမလုပ်သၞောဝ်တုဲ ဒးတိုန်စိုပ်ရုၚ်သၞောဝ်ဓဝ်ဏောၚ် မဒှ်ရ။
သၞောတ်ကဵုမာဲ အဳလက်ထရဝ်နေတ် မရပ်စပ်လဝ် သွက်ပေါဲရုဲမာဲသမ္မတ သၞာံ ၂၀၂၂ ဂိတုအံက်တဝ်ဗာဂှ်ဝွံ ဂွံကၠတ်လုပ်ဇာဇၞိက်တံဂှ် လောဲသွာတုဲ လီဠာန်လေဝ်ဂွံဂှ် ဗိုဝ်သဵုနာရိုဝ် သ္ဂးတုဲ ဟိုတ်နူကၠောန်သ္ပလဝ် ညံၚ်ဒဳမဝ်ကရေဇြဳဍုၚ်ဗရာဇြဳ ဇြဟတ်ဂွံဍိုန်ဂှ်ရ ဒးဒုၚ်တာဒၞါလဝ် အခေါၚ်လုပ်ပြိုၚ်ပေါဲရုဲမာဲ ပွိုၚ် ၈ သၞာံရ။
ပ္ဍဲကဵုပေါဲရုဲမာဲဏံဂှ် သမ္မတလူလာ ဂွံဇၞးကေတ်လဝ် နကဵုမမာဲညိညဓဝ်ဟေၚ်ရ။
သမ္မတတြေံ ဗိုဝ်သဵုနာရိုဝ် ဒဒှ်ရညးမ္ဒးကျဗြံအာဂှ် ဟွံဒုၚ်ဝန် ဂတမတ်ညးဂမၠိုၚ်မွဲသာ် ကၠာသမ္မတလူလာ ဟွံဂွံယဵုဒုၚ်သစ္စာဂှ် အာစိုပ်လဝ်အမေရိကာန် ပွိုၚ်ၜါတ္ၚဲရ။
ပ္ဍဲသၞာံ ၂၀၂၃ ဂိတုဂျာန္နဝါရဳ ၈ ဂှ် ညးထံက်ဂလာန်လ္ပာ်ညးဂမၠိုၚ်ဝွံ လုပ်စိုပ်ပလီုပလာ်လဝ် စမြိုၚ်အလဵုအသဳ ပ္ဍဲဍုၚ်ဇၞော် ဗရာသဳလဳယာဂှ်တုဲ ဒပ်ဗၠာဲသၟိၚ်တံ ရပ်ဒက်ဂွံလဝ် မၞိဟ်မပါလုပ် ပ္ဍဲအဓိကိုရ် ၁၅၀၀ တၠရ။
မဳဒဳယျာဗရာဇြဳတံဂှ်တှ်ေ ကၞောတ်သၞာံဏံ ရုၚ်သၞောဝ်ဓဝ် ပ္တိုန်ရုၚ်စၟဳတ်ကၠုၚ်ညးမာန်ရောၚ် ထ္မံက်ထ္ၜးလဝ်ရ။
ညးထံက်ဂလာန်အလဵုအသဳဂမၠိုၚ် ဒုၚ်တၠုၚ်ကေတ်ပရိုၚ်ဏံ ဗွဲမမိပ်မြဟ်တုဲ အခိၚ်ဟီုဂးဒၟံၚ်ညးသ္ကအ် သမ္မတတြေံ ထေက်ကြိုက်ကဵု ဒဏ်ထံၚ်ဂှ် ညးလ္ပာ်ဒစဵုဒစးတံဂှ်တှ်ေ ဗိုဝ်သဵုနာရိုဝ် ဒုဟ်ဟွံမွဲပုဟ်ဂှ် ခၠေဝ်ကၠုၚ်လဝ်ရ။
အတိုၚ်လိက်ကံက်ကပှ်တၚ်နၚ်လၟုဟ်မ္ဂး ဒဒှ်ရညးဍုၚ်ကွာန် ထံက်ဂလာန် ကုသမ္မတလူလာ စှ်ေကၠုၚ်ဒၟံၚ်ဂှ် ထ္မံက်ထ္ၜးဒၟံၚ်တုဲ တၚ်သ္ဂုတ်သွာတ်ရုၚ်သၞောဝ်ဓဝ်ဂှ်တှ်ေ သွက်ပေါဲရုဲမာဲသမ္မတ သၞာံဂတဏံဂှ် အာဇီုကပိုက် တၟာဂလိုၚ်မာန်ရ။
Ref: BBC