ဟဏဳ၊ ဖေဖဝ်ဝါရဳ ၂၁
အကြာဍုၚ်ကောန်မျူနေတ်ၜါဍုၚ် ညံၚ်ပရေၚ်ဆက်စၠောံ ဇြဟတ်ဂွံခိုဟ် ညံၚ်ပရေၚ်သွံရာန်ဗၞိက် သ္ဂောံကလိတ်ကလောတ်ဂှ် ပ္ဍဲဂိတုဖေဖဝ်ဝါရဳ ၁၉ တေံ ကၠတ်ထဝ်ဗဳယေတ်နာမ် ကဵုလဝ်အခေါၚ် သွက်ဂွံကၠောန်ဂၠံၚ်ကွဳပၟတ် ၚုဟ်မးမၞုံ ၈ ဗဳလျာန် ဆက်စၠောံအာ ဍုၚ်ဗဳယေတ်နာမ်သ္ကုတ်သၟဝ်ကျာ ဍုၚ်သၞေဟ်က္ၜၚ်ဇၞော်အိုတ်ဂှ်ကဵု ပယျဵုဍုၚ်ကြုက်ရ။
ဂၠံၚ်ကွဳပၟတ်တၟိဏံဝွံ ဒှ်ဌာန်ဒတန် သွက်ကမၠောန်ကၠောန်ပ္တိတ်ဗၞိက်ကဆံၚ်ဂၠးတိဂမၠိုၚ် မပ္တံကဵု Samsung ၊ Foxconn၊ Pegatron တံ ကောံမံၚ်မွဲတုဲ ကမၠောန်ကၠောန်ပ္တိတ်ဗၞိက်တံဏံဝွံ ဒးသ္ပပဓာန်ဒၟံၚ်ကဵု ကပေါတ်ဗၞိက်ဒကုတ် မကၠုၚ်နူကြုက်တံရ။
ဂၠံၚ်ကွဳပၟတ်ဏံဝွံ ဇမၠိၚ်ဍေံမၞုံ ၃၉၀ ကဳလောမဳတာတုဲ ဖံက်အာဂၠံၚ်ကွဳပၟတ်ဏံ နူဍုၚ်သၞေဟ်က္ၜၚ် ဍုၚ်ဟိုၚ်ဖံၚ် စဵုစိုပ်ဍုၚ်ပယျဵု ဍုၚ်လံၚ်ဇျှာဲ မဒှ်ဍုၚ်ပယျဵု စုက်ဒၟံၚ်ကဵုတွဵုရးယူနာန် ဍုၚ်ကြုက်ဂှ်တုဲ ဂၠံၚ်ကွဳပၟတ်ဏံဝွံ တတ်အာ သီုဍုၚ်ဇၞော်ဗဳယေတ်နာမ် ဍုၚ်ဟဏဳကီုဏောၚ် မဒှ်ရ။
အစဳဇန်ဖံက်အာဂၠံၚ်ကွဳပၟတ်ဏံဂှ် ကၠတ်ထဝ်ဗဳယေတ်နာမ် ၜိုတ် ၉၅ တၟံကၠံ ထံက်လဝ်ဂလာန်ရောၚ် အ္စာပရိုၚ်အာစိုပ်ကေတ်လဝ်ပရိုၚ် အပ္ဍဲကၠတ်ထဝ်ဂမၠိုၚ် သ္ဂးရ။
သွက်ကိုန်စဳမာန်ဏံ မရပ်စပ်အာ အမေရိကာန်ဒဝ်ဠာ ၈ ဗဳလျာန်ပြၚ်ဏံဂှ် ကြုက် ပ္တိတ်ကဵုသြန်ဓလေံဏောၚ်ဂှ် ကဵုလဝ်ကတိရ။
ဂၠံၚ်ကွဳပၟတ်အကြာၜါဍုၚ်ဏံ နွံၜါတၞုၚ်တုဲ တၞီလုပ်ပ္ဍဲကိုန်စဳမာန်ကြုက် Belt and Road Initiative (BRI) ဂှ် ဂၠံၚ်ကွဳပၟတ်ဏံဝွံ ပါလုပ်မွဲကီုရ။
သွက်ဂွံတာဒၞါ ပရေၚ်အမေရိကာန် ဇၞော်ဒၟံၚ်သြဇာညးတံ လ္တူဗဳယေတ်နာမ်ဂှ် အခိၚ်ဗေကျေန် ပ္တိတ်ကၠုၚ်ဒၟံၚ်ဇြဟတ်ဂှ် သမ္မတကြုက် ယှဳကျေန်ဖျေန် ကၠုၚ်စိုပ်ဍုၚ်ဟဏဳတုဲ တုပ်စိုတ်လဝ် သ္ဂောံသၠုၚ်ပ္တိုန်အသိၚ် ပရေၚ်ဆက်ဆောံအကြာၜါဍုၚ်ဂှ်တုဲ ဂွံမွဲသၞာံဂှ် လ္ပာ်ဗဳယေတ်နာမ် ကဵုလဝ်အခေါၚ် အစဳဇန်ဂၠံၚ်ကွဳပၟတ်ဏံရ။
စမြိုၚ်ဍုၚ်ဗဳယေတ်နာမ် စပ်ကဵုပရေၚ်ပလံၚ်ဗစိုပ်တံဂှ်ဝွံ ဍိုန်လျဒၟံၚ်ရောၚ် ဟီုဂွံတုဲ သၞောတ်ဂၠံၚ်ကွဳပၟတ်ဂှ်လေဝ် ဟွံဖောအ်ဗြေဝ်၊ ဂၠံၚ်ပလံၚ်ဗစိုပ်ဂၠံၚ်ကုန်ဂှ်လေဝ် ဗက်ဒြဟတ်မိက်ဂွံသုၚ်စောဲတအ်ဟွံဂတာပ် ဒှ်ဒၟံၚ်ရ။
ကုဍုၚ်ဗဳယေတ်နာမ် ကၠောန်ပ္တိတ်ဒၟံၚ် ကပေါတ်ဗၞိက် ဗွဲမဂၠိုၚ်ဂၠေၚ်ဂှ် ဍုၚ်ကြုက် ပလံၚ်ပ္တိုန်ဒၟံၚ် ဗၞိက်အပြောံဂမၠိုၚ်ဂှ်ရ ဂၠံၚ်ကွဳပၟတ် ဖံက်ကၠောန်အာလၟုဟ်ဏံဂှ်တှ်ေ ဒှ်အထံက်အပၚ် ညံၚ်ပရေၚ်ဗၞိက်ဂေတ်ဂြိပ်အကြာၜါဍုၚ်ဂွံကလိတ်ကလောတ်ရ။
ဗဳယေတ်နာမ်ဝွံ အတိက်တေံ ၜိုန်သ္ပဒတန်ကိုန်စဳမာန်စမြိုၚ်သ္ဇိုၚ်ဂမၠိုၚ်တုဲကီုလေဝ် ကေၚ်လဇုဲလဇကၠုၚ်လဝ်နွံတုဲ ဆ္ဂး ဂၠံၚ်ကွဳပၟတ်လၟုဟ်ဂှ်တှ်ေ ကၠောန်ပတုဲအာ ပ္ဍဲသၞာံ ၂၀၃၀ တေံဏောၚ်ဂှ် သ္ဂးလဝ်ရ။
ဂၠံၚ်ကွဳပၟတ်ဏံ တတ်အာ တွဵုရး ကေုာံ ဍုၚ်ဇၞော် ၉ ဍုၚ်တုဲ ဂၠံၚ်ကွဳပၟတ်ဏံဂှ်တှ်ေ ဒုၚ်သ္ဇိုၚ်ကဵုလ္တူဂၠံၚ်ကွဳပၟတ် ပ္ဍဲခေတ်ကဝ်လဝ်နဳပြၚ်သေတ်တေံဂှ်တုဲ ကၠောန်အာဏောၚ်ဂှ် ဂွံတီကေတ်ရ။
အပ္ဍဲကဵုလၟေၚ်တရဴ သမ္မတယှဳကျေန်ဖျေန် ကၠုၚ်စိုပ်ဍုၚ်ဟဏဳဂှ် ထ္ပက်လဝ်စၟတ်တဲ တၚ်တုပ်စိုတ်အကြာၜါဍုၚ် ၜိုတ် ၃၀ ပါလုပ်သီုကဵုဂၠံၚ်ကွဳပၟတ်ရ။
Ref: AFP