ဝါယှေန်တာန်၊ ဖေဖဝ်ဝါရဳ ၂၂
ဍုၚ်ကြုက် မဒှ်ပွန်ဍုၚ်အမေရိကာန် ပ္ဍဲကဵုမူဝါဒကံက်ဂလိုၚ်ပ္တိုန်အခေါန်ဖလှာညးတံဂှ် သွက်ဂွံကေတ်အာတၚ်တုပ်စိုတ်ပရေၚ်သွံရာန်ဗၞိက် ကုဍုၚ်ကြုက်နွံဂှ် သမ္မတထြာမ် ဟီုလဝ်ရ။
သၞာံ ၂၀၂၀ တေံ ဂွံဂွံတၚ်တုပ်စိုတ်ပရေၚ်သွံရာန်ဗၞိက် ကုကြုက်ဂှ် အမေရိကာန် တုပ်လဝ်စိုတ်ရ။ လၟုဟ် ဂွံဂွံတၚ်တုပ်စိုတ်တၟိမွဲ ဒှ်မာန်ဒၟံၚ်ဏီဂှ် သမ္မတထြာမ် ဟီုဂးကၠုၚ်လဝ်ကဵု အ္စာပရိုၚ်ဂမၠိုၚ် ပ္ဍဲဂိတုဖေဖဝ်ဝါရဳ ၂၀ တေံရ။
စပ်ကဵုပရေၚ်ဟီုဂးသာ်ဏံတုဲ ပ္ဍဲအခါသၟာန်သၟုက်ကၠုၚ်ဂှ် ဌာနဝန်ဇၞော်ကာဍုၚ်သ္အာၚ်ကြုက်ဂှ်တှ်ေ ပရေၚ်ကြံၚ်မ္ၚိုဟ်စပ်ကဵုပရေၚ်သွံရာန်ဗၞိက် အကြာၜါဍုၚ်တံဂှ် ထေက်ကဵုဒးသောၚ်ကလး နကဵုဓဝ်ရှ်ေသှ်ေရဴဂဴတံဂှ် ခၠေဝ်ကၠုၚ်လဝ်ရ။
အခိၚ်အာယုက်သမ္မတပေၚ်မွဲဂိတုဂှ် သမ္မတထြာမ် ကံက်ဂလိုၚ်ပ္တိုန်လဝ်အခေါန်ဖလှာ လ္တူဍုၚ်သၞညးတအ် ညံၚ်ရဴဍုၚ်ကြုက်၊ လ္တူဍုၚ်ဇိုၚ်ဝုတ်ဒိုဟ် ညံၚ်ရဴကနေတာ ကေုာံ မက္ကသဳကိုဝ်တံဂှ်သၟးဟွံက သီုကံက်ဂလိုၚ်ပ္တိုန်လဝ် လ္တူသမဂ္ဂယူရောပ်ရ။
ပ္ဍဲဂိတုဖေဖဝ်ဝါရဳမံက်တေံဂှ် ဒဒှ်ရထပ်ကံက်ဂလိုၚ်ပ္တိုန်အာအခေါန် ၁၀ တၟံကၠံ လ္တူကပေါတ်ဗၞိက် ကၠုၚ်နူဍုၚ်ကြုက်တံဂှ် ထြာမ် လလောၚ်တြးလဝ်ရ။
ကြုက် ကေုာံ အမေရိကာန်ဝွံ ပရေၚ်ဒှ်ဓဝိၚ်ညးတံဂှ် ထေက်ကဵုဒးသဳကၠဳပ္ညဳပ္ညပ် နကဵုဓဝ်ရှ်ေသှ်ေရဴဂဴဂှ် ဌာနဝန်ဇၞော်ကာဍုၚ်သ္အာၚ်ကြုက် ဟီုလဝ် ပ္ဍဲဂိတုဖေဖဝ်ဝါရဳ ၂၀ တေံရ။
ညးမၞုံအခေါၚ်ဟီုဂး ဌာနဝန်ဇၞော်ကာဍုၚ်သ္အာၚ်ကြုက်ဂှ်တှ်ေ ပ္ဍဲကဵုပရေၚ်သွံရာန်ဗၞိက် ကေုာံ ပ္ဍဲကဵုပေါဲပၞာန်အကံက်အခေါန်တံဂှ် ရဲဂွံဇၞးဟွံမွဲ အာဇီုကပိုက်ကဵု ဒတုဲမြမောဝ်ညးဂၠးတံသၟးရဏောၚ်ဂှ် ဟီုလဝ် ပ္ဍဲပေါဲသောၚ်ကလးလိက်ပရိုၚ်လၟေၚ်ၚ်ဂှ်ရ။
ပ္ဍဲကဵုပေါဲသောၚ်ကလးလိက်ပရိုၚ် မကၠောန်ဗဒှ်လဝ် ဗွဲတၞဟ်ခြာမွဲဂှ် ဌာနဝန်ဇၞော်ပရေၚ်ပိုန်ဒြပ်ကြုက် ဟီုကၠုၚ်လဝ် ဒဒှ်ရနကဵုအမေရိကာန် သွက်ဂွံဘပဠအလုံဂၠးမွဲဂှ် ရပ်စပ်မံၚ် နဲကဲကံက်ဂလိုၚ်ပ္တိုန်အခေါန်ဖလှာသၟး ဟွံထေက်ဂှ် ဟီုလဝ်ရ။
နဒဒှ်ပရေၚ်ဇီုကပိုက်ဇၞော်ဇၞော်မွဲ လ္တူဍုၚ်မသွံရာန်ဒၟံၚ်ဗၞိက် ကုအမေရိကာန်တံဂှ် သမ္မတထြာမ် ကံက်အာအခေါန် ၂၅ တၟံကၠံ လ္တူကွဳစက်မပၠောပ်ပ္တိုန်နၚ် အမေရိကာန်တံဂှ်တုဲ လ္တူကပေါတ်ဂဥုဲဇဗ ကေုာံ ကပေါတ်ဓာတ်လလဳတံဂှ်လေဝ် ကံက်အာအခေါန် လအာတုပ်သာ်ဏံ ဟွံသေၚ်မ္ဂး ဂၠိုၚ်နူဏံတံဏောၚ်ဂှ် လလောၚ်တြးလဝ်ရ။
လ္တူဍုၚ်ကနေဒါကဵု ဍုၚ်မက္ကသဳကိုဝ်တံဂှ်လေဝ် ကံက်အာအခေါန် ၂၅ တၟံကၠံဏောၚ် ထြာမ် လလောၚ်တြးလဝ်တုဲမှ ကလေၚ်ဂတးလဝ်က္ဍိုပ်ရ။
ဍုက်ကြုက် မပလံၚ်ပ္တိုန်ဒၟံၚ် ကပေါတ်ဗၞိက် ပ္ဍဲဍုၚ်အမေရိကာန် ဂၠိုၚ်အိုတ်ဂှ် နဒဒှ်ကလေၚ်ပလန်တဲတုဲ ကံက်အာအခေါန်ဖလှာ လ္တူဍာ်သၟုဟ်ဓာတ်အမေရိကာန် ကေုာံ ချးတၟအ်တံ ၁၅ တၟံကၠံဏောၚ် လလောၚ်တြးလဝ်ရ။
Ref: AFP