ပရေၚ်ဂီုကၠီု အနာဂတ်ယူကရုၚ်ဂှ် ယူရောပ်သ္ဒးကၠောန်ကဵုဏောၚ် ဇၞော်သ္ကိုပ်တြေံ ဒပ်ပၞာန်ဗျိတိၚ် ဟီု

လာန်ဒါန်၊ ဖေဖဝ်ဝါရဳ ၂၃

အခိၚ်ကေတ်တၚ်တုပ်စိုတ် ပရေၚ်ၜိုဟ်လလမ် ကုရုယှာဂှ် ယဝ်ရအမေရိကာန် ဒုၚ်ကဵုလျိုၚ် ပရေၚ်ဂီုကၠီုယူကရုၚ် မဖျေံစိုတ်ဂွံမွဲ ဟွံမာန်ပုဟ်မ္ဂး ဍုၚ်ယူရောပ်ဂမၠိုၚ် သ္ဒးရေၚ်တၠုၚ်ကဵုဏောၚ်ဂှ် ဇၞော်သ္ကိုပ်တြေံ စပ်ကဵုလ္ပာ်ပၞာန်ဗျိတိၚ် ဟီုလဝ်ရ။

ဂအုပ်ဗိုလ်ဇၞော် သာနေတ်ကာတာ မဒေါအ်ဇူလဝ်ဂှ် ညံၚ်အဝဵုစၟိန်ပြမာန်ယူကရုၚ် ဂွံခိုၚ်ကၠိုက်ဂွံချိုတ်ပၠိုတ်ဂှ်ဝွံ ဒှ်တၚ်နွံပၟိက်သ္ဇိုၚ် သွက်တၚ်တုပ်စိုတ်မၞုံကဵုဗဗွဲဓဝ်တံဂှ်တုဲ ဗီုပြၚ်ပရေၚ်ၜိုဟ်လလမ် သ္ဂောံတာဒၞါအာ ပရေၚ်ရုယှာဂၠါဲသၞတံဂှ် ယူရောပ် ဒးစဳဇန်ရေၚ်တၠုၚ်ဏောၚ်ဂှ် ဟီုလဝ်ရ။

ပ္ဍဲအရာကၠောန်ကၠုၚ်သာ်ဏံဂှ် နကဵုဗျိတိၚ် ထေက်ကဵုဒးပါလုပ် နူအခန်ကဏ္ဍအာက္ဍိုပ်တံဂှ်ရောၚ် ကၠာပရေၚ်ဆဵုဂဗ အကြာသ္ကိုပ်ဝန်ဇၞော်ဗျိတိၚ် သာကဳယာ သတာမာကဵု သမ္မတအမေရိကာန် ဒဝ်နေဝ်ထြာမ် ပ္ဍဲသတ္တာဟဂတဏံ ဟွံဂွံစိုပ်ဏီဂှ် ဟီုကၠုၚ်လဝ် သာ်ဏံရ။

ဟိုတ်နူပြဝအမေရိကာန် ပ္တိတ်ကၠုၚ်ဇြဟတ် သွက်ပေါဲပၞာန်ယူကရုၚ်ဂွံတုဲဒှ်ဂှ်တုဲ အကြာထြာမ်ကဵု သမ္မတယူကရုၚ် ဗလာဒဳမာဇြဳလာန်သကဳတံ မွဲဟူဏံ လစွံစိုတ်ကြံၚ်မ္ၚိုဟ်တံ က္တဵုဒှ်လဝ်တုဲ က္ဍိုပ်သ္ကိုပ်ယူရောပ်ဂမၠိုၚ် ဒးသဳကၠဳချပ်ဂၞန်လဝ်ရ။

ပ္ဍဲအရာရေၚ်တၠုၚ် ညံၚ်ယူရောပ်ဂွံဂီုကၠီုဂှ် အလဵုအသဳထြာမ် အခိၚ်ပ္တိတ်ကၠုၚ်ဇြဟတ် ဂွံဖအောန်ဖျေံအာ အခန်ကဏ္ဍအမေရိကာန်ဂှ် ခြာဟွံလအ် ဒဒှ်ရပ္ညဳပ္ညပ်အာ ကုရုယှာဏောၚ်ဂှ် အမေရိကာန် လလောၚ်တြးလဝ်ရ။

ဆ္ဂး ဟိုတ်နူဂလာန်ထြာမ် ဟီုပ္တိတ်ကၠုၚ်လဝ် စပ်ကဵုယူကရုၚ်၊ ဇြဳလာန်သကဳတံဂှ်တုဲ ပရေၚ်သဳကၠဳတံဏံ ပ္တဝ်အာက္ဍိုပ်လ္ပာ်လဵုရောဟီုဂှ် ဒှ်ဒၟံၚ်ဓဝိၚ်တံ နွံကၠုၚ်ရ။

နကဵုယူကရုၚ် နွံပၟိက်ကဵု တၚ်ဒုၚ်လျိုၚ်ပရေၚ်ဂီုကၠီု ပတှ်ေဖျေံစိုတ်ဂွံ မပံက်လဝ်အဓိပ္ပာယ်ခိုဟ်ဟ်ဂှ်ဏောၚ် သမ္မတဇြဳလာန်သကဳ ဟီုလဝ် ပ္ဍဲဂိတုဖေဖဝ်ဝါရဳ ၂၀ ရ။

သ္ကိုပ်ဗိုလ် ကာတာ ကေတ်လဝ်တာလျိုၚ် နဒဒှ်သ္ကိုပ်က္ဍိုက်ပ်ပၞာန်ဗျိတိၚ် နူသၞာံ ၂၀၁၈ စဵုကဵု သၞာံ ၂၀၂၁ ဂှ် ဂွံပတုဲဗဒှ်ကၠေံပေါဲပၞာန်ဂှ် ဒှ်ပရေၚ်သောၚ်ကလး ဗဗွဲဓဝ်ဟာ၊ ဟွံဗဗွဲဓဝ်ဟာဟီုဂှ် ယူကရုၚ်ရ ဒးသ္ဂုတ်သွာတ်ဏောၚ်ဂှ် ဟီုလဝ်ရ။

ဆ္ဂး နကဵုဗျိတိၚ် ကေုာံ ယူရောပ်တံ အကာဲအရာဒုၚ်တဲမာန်တံဂှ်တှ်ေ ဒှ်မုရောဟီုဂှ် စပ်ကဵုတၚ်ဒတူလိုၚ်ညးတံတုဲ ဂွံဒှ်သောၚ်ၚ်ကၠးကၠးဂှ် ဒးကၠောန်လဝ်ဏောၚ် သ္ကိုပ်ဗိုလ်ကာတာ ဟီုရ။

ဒးဟီုတပ်ပ်မ္ဂး သွက်အဝဵုစၟိန်ပြမာန်ယူကရုၚ်အနာဂတ်တေံဂှ် တၚ်ဒုၚ်လျိုၚ်ပရေၚ်ဂီုကၠီု ဒးနွံဏောၚ် ညးဟီုရ။

တၚ်ဒုၚ်လျိုၚ်ပရေၚ်ဂီုကၠီု နူအမေရိကာန်မွဲဓဝ်ရဟေၚ် ဂွံတာဒၞါရုယှာဂှ် ဒှ်ဂၠံၚ်ဍာန်စိုပ်တရဴမွဲရောၚ် သ္ကိုပ်ဗိုလ်ကာတာ ကေၚ်ဟီုလဝ်ရ။

ပြဟ်ဟ်ဏံ ဟိုတ်နူအစဳအဇန်ထြာမ်တုဲ ပ္ဍဲအရာသဳကၠဳ ကုရုယှာဂှ် ကော်ဘိက်ကၠုၚ်လဝ် ဍုၚ်ယူရောပ်တံဟွံမွဲဏီတုဲ ယူကရုၚ်ဝွံလေဝ် ဒးဒုၚ်တးပါဲလဝ်ဖိုဟ်ရ။

ထြာမ်ဂှ်တှ်ေ ယဝ်ရဗလးဏာ ဒပ်ၜိုဟ်လလမ်ယူရောပ် ပ္ဍဲယူကရုၚ်မ္ဂး ဟွံဒစဵုဒစးပုဟ်ဂှ် ဟီုလဝ်ကီုလေဝ် အမေရိကာန်ဂှ်တှ်ေ ဗလးအာကောန်ဒပ်တံဏံ ဟွံသေၚ်ပုဟ်ဂှ် ခၠေဝ်ကၠုၚ်လဝ်ရ။

နကဵုယူရောပ် သွက်ဂီုကၠီုညးတံဂှ် အလဵုညးတံဒးကေတ်လျိုၚ်ထေက်ရောၚ် လ္ပာ်အမေရိကာန် ဟီုကၠုၚ်လဝ်ရ။

Ref: BBC