ဗေကျေန်၊ ဖေဖဝ်ဝါရဳ ၂၆
ပ္ဍဲဂိတုဖေဖဝ်ဝါရဳ ၂၄ တေံ ဟီုဂးတက်ကျာလဝ်ကဵုဖုၚ် ကုသမ္မတရုယှာ ဗလာဒဳမာပူတေန်ဂှ် သမ္မတကြုက် ယှဳကျေန်ဖျေန် သွက်ဂွံဖအောန်ဖျေံအသိၚ်ပေါဲပၞာန်ယူကရုၚ်ဂှ် ဒုၚ်တၠုၚ်လဝ်ပရေၚ်မဝ်သကိုဝ် ပ္တိတ်ကၠုၚ်ဇြဟတ်တံဂှ်ရ။
ညံၚ်ပေါဲပၞာန်ယူကရုၚ် အသိၚ်ဂွံဍိုန်စှ်ေ ဍုၚ်ရုယှာ ကဵု ဍုၚ်မဆက်စပ်ဂမၠိုၚ် ပ္တိတ်ဇြဟတ်ဂိုတ်ဂ္စါန်ကၠုၚ်ဒၟံၚ်ဂှ် ဂွံညာတ်ကေတ်ဂှ်ရ နကဵုကြုက် ဒဒှ်ရမိပ်စိုတ်ဂှ် သမ္မတယှဳကျေန်ဖျေန် ဟီုလဝ်ဂှ် ဌာန်ပရိုၚ်သေန်ဟွာဍုၚ်ကြုက်ပိုၚ်ဂှ် ထ္မံက်ထ္ၜးလဝ်ရ။
တုဲကၠုၚ်ပိသၞာံတေံ ရုယှာ ဗလးလဝ်ဒပ်ပၞာန် ပ္ဍဲယူကရုၚ်တုဲ ဗွဲကြဴဂှ် အကြာဗေကျေန်ကဵု မဝ်သကိုဝ်တံဂှ် ပရေၚ်သွံရာန်ဗၞိက်ကဵု ပရေၚ်ဆက်ဆောံပရေၚ်ပၞာန်တံ ဇြဟတ်ခိုဟ်ကၠုၚ်ကီုလေဝ် ဍုၚ်ကြုက်ဂှ်တှ်ေ ဟီုဒၟံၚ်ညးတအ် နဒဒှ်ဍုၚ်မံၚ်အကြာ သာ်ဝွံရ။
ဗေကျေန်ဝွံ ဒှ်ဒၟံၚ်ဍုၚ်မဟာမိတ်မဝ်သကိုဝ် မဍုက်ကေဝ် စပ်ကဵုပရေၚ်ပိုန်ဒြပ် ကေုာံ ပရေၚ်ဍုၚ်ကွာန်တံဂှ်ဖိုဟ်တုဲ စပ်ကဵုပြဝရုယှာ မကၠောန်သ္ပလဝ်လ္တူယူကရုၚ်ဂှ်တုဲလေဝ် မွဲလှ်ေမှ ဟွံကေၚ်ဟီုဗျိ ဟွံကေၚ်ဟီုဖျေံလဝ်ကဝုဏီရ။
ဟိုတ်ဂှ်ရ ဍုၚ်မလုပ်ဂကောံနေတဝ်ဂမၠိုၚ် စောဲစပ်လဝ် ဒဒှ်ရကြုက် ထံက်ပၚ်ကဵုဒၟံၚ် သွက်ဂွံဝေၚ်ပေါဲပၞာန် မဒှ်ရ။
ပ္ဍဲအရာဟီုဂးကၠုၚ် စပ်ကဵုပရေၚ်ဆက်ဆောံ အကြာရုယှာကဵု ကြုက်ဂှ်တုဲ သမ္မတယှဳဂှ်တှ်ေ ဍုၚ်ညးတအ်ၜါဍုၚ်ဝွံ ဒဒှ်ရဒှ်ဍုၚ်ဇိုၚ်ဝုတ်ဒိုဟ်ခိုဟ် မအာသ္ၚောဲသ္ၚောဲဟွံဂွံတံဂှ် ပ္ဍဲဝၚ်ကီု အကာဲအရာလၟုဟ်ကီုဂှ် ထ္မံက်ထ္ၜးဒၟံၚ်ရောၚ် ဟီုရ။
ဍုၚ်ညးတံၜါဍုၚ်ဝွံ ညးမွဲကုညးမွဲ ရီုဗၚ်ညးသ္ကအ်တုဲ ဒှ်ဍုၚ်မိဿဟာဲမဍာံပြတံရောၚ်ဂှ်လေဝ် သမ္မတယှဳကျေန်ဖျေန် ဟီုလဝ်ဂှ် ဌာန်ပရိုၚ်သေန်ဟွာနိဿဲကေတ်တုဲ ထ္မံက်ထ္ၜးလဝ်ရ။
သမ္မတပူတေန်ဂှ်တှ်ေ အပ္ဍဲသတ္တာဟတုဲကၠုၚ်တေံ စပ်ကဵုပေါဲသဳကၠဳအကြာသၞာဲဒဴ ရုယှာတံကဵု အမေရိကာန် ပ္ဍဲသဝ်ဒဳအာရေဗဳယျာဂှ်တုဲ ဒဒှ်ရသောၚ်ကလးလဝ် ကုသမ္မတယှဳဂှ် နန်ကရေမ္မလေန် ဟီုကၠုၚ်ရ။
ပရေၚ်ဆဵုဂဗဏံဝွံ ကြဴနူပေါဲပၞာန်ယူကရုၚ်စက္တဵုဒှ်တုဲဂှ် အကြာရုယှာကဵု အမေရိကာန်ဂှ်တှ်ေ ဒှ်ပရေၚ်ဆဵုဂဗပရေၚ်သဳကၠဳ အလန်ပထမကၠာအိုတ် မဒှ်ရ။
ညံၚ်ပေါဲပၞာန်ယူကရုၚ် ဂွံတုဲဒှ်အာ ဗွဲမၜိုဟ်လလမ်ဂှ် သွက်ဂွံပါလုပ်ရီုဗၚ်ကဵုဂှ် ဒှ်ဒၟံၚ်ဒတုဲတုဲ ပရေၚ်သဳကၠဳ အကြာအမေရိကာန်ကဵု ရုယှာဂှ်လေဝ် ဒဒှ်ရဒုၚ်တၠုၚ်ဂှ် ယှဳကျေန်ဖျေန် ဟီုလဝ်ရ။
သမ္မတပူတေန် စဆက်ကၠုၚ်လဝ်ဖုၚ်ကၠာဂှ် ဌာန်ပရိုၚ်သေန်ဟွာ ထ္မံက်ထ္ၜးလဝ်ရ။
Ref: AFP