ဝါယှေန်တာန်၊ ဖေဖဝ်ဝါရဳ ၂၇
တုဲကၠုၚ်ပ္ဍဲဂိတုဖေဖဝ်ဝါရဳ ၂၅ တေံ သမ္မတအမေရိကာန် ဒဝ်နေဝ်ထြာမ် ဆက်မိတ်ကၠုၚ်အစဳဇန် မသွံပ္တိတ်အာ ဝဳဇြာသာ်ထဝ် မကလိဂွံအခေါၚ်မံၚ်ပ္ဍဲဍုၚ် ၚုဟ်မးမၞုံ ၅ ပြကောဋိကိုဋ်ဒဝ်ဠာဂှ်တုဲ တၠဓန တၠကမၠောန်ရုယှာသြဇာဇၞော်တံဂှ်လေဝ် အာတ်ပ္တိုန်ကၠုၚ်ဂွံဏောၚ်ဂှ် ဟီုရ။
ဟိုတ်နူသွံတြးကဵုကၠုၚ် ဗီုပြၚ်ဝဳဇြာတၟိ မဒှ်ဗီုပြၚ်ၚုဟ်မးဍေံဂၠိုၚ်နူ Green Card လၟုဟ်ဂှ်တုဲ မၞိဟ်ကဵုကမၠောန် ဂၠိုၚ်ကၠုၚ်မာန်တုဲ ဂွံဖအောန်ဖျေံ ပရေၚ်သြန်ဘဏ္ဍာဍုၚ်အမေရိကာန် မထ္ၜးဒၟံၚ်လက်သန်နုက်တံဂှ် ရပ်စပ်အာမာန်ရောၚ် သမ္မတထြာမ် ဟီုလဝ်ရ။
ဒဒှ်ရသွံပ္တိတ်အာ ကာဒ်အရံၚ်သာ်ထဝ်ဏံဂှ်ကီု၊ ဒဒှ်ရပ္တန်အာၚုဟ် ကာတ်တံဏံ ၅ မဳလျာန်ဒဝ်ဠာဂှ် ထြာမ် ဟီုလဝ်ကဵု အ္စာပရိုၚ်ဂမၠိုၚ် ပ္ဍဲကဵုရုၚ်သမ္မတ မၞုံဗီုပြၚ်ခၟာဲအဒါဂှ်ရ။
သမ္မတရဳပါပလေတ်ကာန် မထဍေၚ်ပ္တိတ်လဝ် ညးဆုဲပြံၚ်မံၚ်တန်တဴ ဟွံမွဲကဵုလိက်တၞးသက်သဳမလုပ်သၞောဝ်တံ ဂၠိုၚ်ကဵုပြကောဋိကိုဋ်ဂှ် ဟိုတ်နူအစဳဇန်ဏံတုဲ ညံၚ်ကောန်ဍုၚ်အမေရိကာန် မၞုံကဵုၚုဟ်မးမသၠုၚ်ပြဲတံ ဂွံစိုပ်ကၠုၚ်ဂှ် ဒှ်ဂၠံၚ်တရဴမွဲရောၚ် ဟီုရ။
ပ္ဍဲဍုၚ်အမေရိကာန် မၞိဟ်ကၠုၚ်မံၚ်တန်တဴ နွံကၠုၚ်တၟာဂလိုၚ်ဏောၚ်တုဲ ပံက်တိုန်ကမ္ပဏဳ၊ ခၞံဗဒှ်ကဵုကမၠောန်ကၟိတ်တံ ဗွဲမဂၠိုၚ်မာန်ဏောၚ်ဂှ် ညးဟီုရ။
ပရေၚ်သွံတြးဝဳဇြာသာ်ထဝ်ဏံဂှ် အပ္ဍဲပွိုၚ်ၜါသတ္တာဟဏံ စအာဏောၚ်ဂှ် ထြာမ် ဟီုလဝ်ရ။
နကဵုညးတံ ဂွံသွံတြးအာ ဝဳဇြာသာ်ထဝ် ၜိုတ်လၟိဟ်မွဲပြကောဋိကိုဋ်မာန်တုဲ ရေၚ်တၠုၚ်ဒၟံၚ် သွက်သၞောဝ်ဥပဒေတံဏောၚ်ဂှ် ညးထပ်ဟီုဗပေၚ်လဝ်ရ။
ညးမအာတ်ပ္တိုန်အာ ဝဳဇြာသာ်ထဝ်ဏံသီုဖအိုတ်ဂှ် စၟဳတ်အာ ချိုတ်တ်ပၠိုတ်တ်ဏောၚ် ထြာမ် မဒှ်တၠဓနဗဳလျာန်နာ မဒှ်တၠကမၠောန်တိသ္ၚိကၠအ်ဂှ် သ္ဂးရ။
ကောန်ဍုၚ်ရုယှာ မသိုက်လောဲတံလေဝ် အာတ်ပ္တိုန်ဂွံဟာ စပ်ကဵုတၚ်သၟာန်ဏံတုဲ အာတ်ပ္တိုန်ကၠုၚ်ဂွံမာန်ရောၚ် ထြာမ် သှ်လဝ်ရ။
တုဲကၠုၚ်ပိသၞာံတေံ ကြဴနူရုယှာ ဗ္တိုက်ၜက်ၜေတ်ယူကရုၚ်တုဲဂှ် သေဌဳဇၞော်တၠကမၠောန် မစုက်လုက်ကဵုအလဵုအသဳရုယှာ ဗွဲမဂၠိုၚ်ဂှ် အမေရိကာန် ကေတ်အရေဝ်ကၟာတ်လဒဵုလဝ်ရ။
မွဲမွဲတ္ၚဲ ကလေၚ်ရုပ်သီကၠုၚ် အရာမကေတ်လဝ်အရေဝ် ပရေၚ်ကၟာတ်လဒဵု လ္တူရုယှာတံ မာန်ကီုလေဝ် ပြဟ်ဟ်ဏံဂှ် သဳကၠဳဒၟံၚ်ဟွံမွဲဏီပုဟ်ဂှ်လေဝ် ထြာမ် ဟီုလဝ်ကဵု အ္စာပရိုၚ်ဂမၠိုၚ်ရ။
Ref: AFP