တယိတ်ချံၚ်၊ ဖေဖဝ်ဝါရဳ ၂၈
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ်ပ္ဍဲကွာန်ဂမၠိုၚ် နူကဵုအပ္ဍဲပွိုၚ်ဍုၚ်တယိတ်ချံၚ် ရးတၞၚ်သဳ ပွိုၚ် ၁၇ တ္ၚဲဂှ် ကောန်ဒပ်ကံၚ်ဇြဳပၞာန် ၂၅ တၠ ချိုတ်အာလဝ်ရောၚ် ဂွံတီကေတ် ဇရေၚ်ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်တယိတ်ချံၚ်ရ။
တုဲကၠုၚ် ဂိတုဖေဖဝ်ဝါရဳ ၉ တေံ ဒပ်ကံၚ်ဇြဳပၞာန် ဇြဟတ်ဒပ် ၂၀၀ ပြၚ်ပါဂှ် ထ္ပက်ကၠုၚ်ကရောၚ်ပၞာန်တုဲ စဵုကဵုဂိတုဖေဖဝ်ဝါရဳ ၂၅ ဂှ် ပေါဲဗ္တိုက်ၜါလ္ပာ် က္တဵုဒှ်လဝ် ကုဂကောံဇြဟတ်ပၠန်ဂတးတံရ။
ပ္ဍဲကဵုကွာန် (သရက်နှစ်ခွ၊ ပန်းပြင်၊ ပိန်းတော၊ ဥတ္တူ၊ ရန်တောင်) တံဂှ် ပေါဲဗ္တိုက်သ္ကာတ်မြဟ်လဝ် လၟေၚ်ဒဒှ်တ္ၚဲတုဲ ပရေၚ်ဇီုကပိုက်ချိုတ်တံ နွံလဝ်ရ။
အပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန် ၂၅ တၠ ချိုတ်တုဲ မၞိဟ်ကလိဂွံဝပ် နွံဒၟံၚ်ဗွဲမဂၠိုၚ်ဂၠေၚ်တုဲ လ္ပာ်ဒပ်ပံၚ်ကောံပၠန်ဂတးတံဂှ် ကောန်သ္ဂံၚ်ပိတၠ ဒးပြဟ်လလုဲအာလဝ်ရ။
အပ္ဍဲပေါဲဗ္တိုက်ၜါလ္ပာ်ဂှ် ဒပ်ပံၚ်ကောံပၠန်ဂတးတံ သီဂွံလဝ် နူကဵုကံၚ်ဇြဳပၞာန်ဂှ် သေနာတ် MA-1 ၜါဇကိုအ်၊ G-3 မွဲဇကိုအ်၊ RPG မွဲဇကိုအ်၊ ကေုာံ ကပေါတ်အရပ်စပ်သွက်ပၞာန်တၞဟ်ဟ်တံ မဒှ်ရ။
ဟိုတ်နူပေါဲဗ္တိုက်တယိတ်ချံၚ် မက္တဵုဒှ်လဝ် ပွိုၚ် ၁၇ တ္ၚဲဂှ်တုဲ ညးဒေသဂၠိုၚ်ကဵုလ္ၚီ ဒးပါဲဒၟံၚ်ဘဲပၞာန်တုဲ ဒဵုကဵုအခိၚ်လၟုဟ် ဟွံဂံၚ်စဴဌာန်ဒၟံၚ်အိုတ်ဏီရ။
အတိုၚ်လိက်ဒုၚ်စဳရေၚ် ဂကောံသုတေသနအပ္ဍဲဒေသ FE5 Thanintharyi ဂှ်မ္ဂး အပ္ဍဲကာလသီအဝဵုဏံ ပ္ဍဲရးတၞၚ်သဳဂှ် မ္ၚးနူကဵုပေါဲဗ္တိုက်ၜါလ္ပာ်ဂှ် ဟိုတ်နူပရေၚ်ဗ္တိုက်ပၞာန်ကျာတံတုဲ ညးဒးထောံလသာဌာန်ဒၟံၚ် ဒးဂြိပ်ဒဴပါဲဒလေတ်တံ ဂၠိုၚ်တိုန်ကၠုၚ် စဵုကဵုထပှ်ဠက်ဘာ်ပြၚ်ရ။
ပရိုၚ်−သြၚ်လောန်တိုၚ်(မ်)
ဗီု−ဒပ်ပံၚ်ကောံခရိုၚ်ထဝါဲ