လိုၚ်ဗၠဲ၊ ဖေဖဝ်ဝါရဳ ၂၈
မ္ၚးနူပေါဲဗ္တိုက်မက္တဵုဒှ်ဒၟံၚ် ပ္ဍဲကွာန်ဗ္ဒါဲပယျဵုသေံ−ဗၟာတံဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာတံဂှ်တုဲ ညးဒေသဂၠိုၚ်ကဵုကၠံ ဒးဂြိပ်ဒဴဒၟံၚ် လ္ပာ်ဍုၚ်သေံဂှ် ဂွံတီကေတ် ဇရေၚ်တမ်ရိုဟ်ပရိုၚ် နူပယျဵုတံရ။
ပ္ဍဲတွဵုရးကရေၚ် ပွိုၚ်ဍုၚ်လိုၚ်ဗၠဲ ဗ္ဒါဲပယျဵုသေံ−ဗၟာဂှ် စနူဂိတုဖေဖဝ်ဝါရဳ ၂၇ အခိၚ်နူဂယး ၜိုတ် ၄ နာဍဳဝိုက်ဂှ်တုဲ အကြာဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜးကောန်ဂကူကရေၚ် KNLA တံ ပေါဲဗ္တိုက်ၜါလ္ပာ် က္တဵုဒှ်ဒၟံၚ် ဗွဲမသ္ကာတ်မြဟ်ရ။
အပ္ဍဲပေါဲဗ္တိုက်ဂှ် လ္ပာ်ဒပ်ကံၚ်ဇြဳပၞာန် ကၠုၚ်စိုပ်ပန်ပှော်လဝ် နကဵုက္ၜၚ်ကျာဗ္တိုက် ပိဝါရောၚ် တမ်ရိုဟ်ပရိုၚ်ပယျဵုတံ သ္ဂးရ။
ဟိုတ်နူပေါဲဗ္တိုက်ဏံတုဲ ရမျာၚ်ဗြုပန်ပှော်ၜါလ္ပာ်ဂှ်ဝွံ ဂွံမိၚ်ကေတ်ဒၟံၚ် သီုလ္ပာ်ကွာန် ဍုၚ်သေံတံဂှ်တုဲ ဗ္ဒါဲပယျဵုဂှ်လေဝ် ဒပ်ပၞာန်ကျာသေံ ကၠုၚ်စိုပ်ဂေတ်ဒၟံၚ်ကၚ်နကဵုက္ၜၚ်ကျာရ။
ဟိုတ်နူဒပ်ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာဂှ်တုဲ ညးဍုၚ်ကွာန်ဒေသပွဳပွူ ၁၀၀ ဂြိပ်တိတ်ကၠုၚ် လ္ပာ်ဍုၚ်သေံ ခရိုၚ်တက်၊ ပွိုၚ်ဍုၚ်တသံက်ယာန်တုဲ သၟိၚ်တၠအဝဵုသေံတံ ဒုၚ်လဝ်တဲဂှ် တမ်ရိုဟ်ပရိုၚ်ပယျဵုတံ သ္ဂးလဝ်ရ။
နူကဵုတိဍာ်ဒပ်မဟာ ၇ KNU ဂှ် ပ္ဍဲဌာန်ဂအုပ်ဂှ်ကီု သီုကဵုဒၞါဲလ္ၚဵုတံဂှ် ဒပ်ကံၚ်ဇြဳပၞာန် ထံၚ်ပရိုၚ်ကဵုဒရုၚ်တုဲ ထောံကၠုၚ်မခတိုဟ်ဗ္တိုက်ကၠုၚ် မွဲဏှမွဲဏှတုဲ အခါလၟုဟ်ဂှ်တှ်ေ စထောံကၠုၚ်မံၚ်မခတိုဟ် နကဵုက္ၜၚ်ကျာတံဂှ်ရ။
ဗ္ဒိုပ်ဒပ်ကံၚ်ဇြဳပၞာန်သီုဖအိုတ် နူဒေသမာနေဝ်ပဠဝ် မကေၚ်ဒှ်လဝ်ဌာန်ဂအုပ်ဗဟဵုတြေံ KNU ပ္ဍဲတိဍာ်ဒပ်မဟာ ၇ KNU ဂှ် ပ္ဍဲကဵုကၞောတ်သၞာံတုဲကၠုၚ်တေံ လ္ပာ်ဒပ်ပံၚ်ကောံသၟဝ်တဲ KNU တံ ကလေၚ်သီဂွံလဝ်တုဲ ပ္ဍဲတိဍာ်ဒပ်မဟာ ၇ ဂှ် အကာဲအရာပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ကၠုၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ