မတ်မလီု၊ ဖေဖဝ်ဝါရဳ ၂၈
ပ္ဍဲတွဵုရးဍုၚ်မန် သွက်တန်ဗ္တောန်ကွတ်ပၞာန် လၟေၚ် ၁၁ ဏံဂှ် အုပ်ဓုပ်ကွာန်အရာပ်ကံၚ်ဇြဳပၞာန်တအ် စပ္ကောံကၠုၚ်ဒၟံၚ်မၞိဟ်တၟိတံဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သွက်တန်ဗ္တောန်ကွတ်ပၞာန် လၟေၚ် ၁၁ ဂှ် ပ္ဍဲအရာပ်မဆေၚ်စပ်တံဂှ် အုပ်ဓုပ်ကွာန်အရာပ်ကံၚ်ဇြဳပၞာန်ဂမၠိုၚ် ကော်ကောံဓရီုကီု၊ သွက်ဂွံစုတ်မၞိဟ်စၞးဂှ် အာတ်မိက်ကၠုၚ်သြန်တံကီုဂှ် ကၠောန်ကၠုၚ်ရ။
နကဵုညးဟွံမိက်ကဵုလှုဲဂမၠိုၚ် ယဝ်ဒှ်အာယုက်လုပ်ပၞာန်ဂွံတံဂှ်မ္ဂး ဂွံတိုန်စိုပ်တန်ဗ္တောန်ကွတ်ပၞာန်ဂှ် ဒးကံက်မာဲဏောၚ်တုဲ နကဵုညးဟွံမိက်ကံက်မာဲတံဂှ်တှ်ေ ကၠုၚ်စိုပ်ကော်အာ သီုလိက်ကော်ဘိက်တံဂှ်ဏောၚ်ဂှ် ဘပဠကၠုၚ်ဒၟံၚ်ရ။
ညးဒေသမတ်မလီုမွဲတၠဂှ်တှ်ေ သွက်တန်ဗ္တောန်ကွတ်ပၞာန် လၟေၚ် ၁၁ ဂှ် ပ္ဍဲအကြာအရာပ်တံဂှ် ကော်ကောံဓရီုတုဲ ယဝ်ကဵုမၞိဟ်တှ်ေကဵု၊ ဟွံသေၚ်မ္ဂး ဒးကဵုလှုဲဏောၚ်ဂးတုဲ ဗက်ကံက်ဒၟံၚ်သြန်တံ ကၠောန်သ္ပဒၟံၚ်ရောၚ် ဟီုရ။
“လၟုဟ်ဂှ် လ္တူဍုၚ်မတ်မလီု ကော်ကၠုၚ်ကောံဓရီုသီုသ္ၚိဖအိုတ်တုဲ ကိစ္စပရေၚ်ဒးလုပ်ပၞာန်ဂှ် ဒးကဵုမၞိဟ်ဏောၚ်၊ ဟွံကဵုမၞိဟ်မ္ဂး ဒးကဵုလှုဲဏောၚ်ဂးတုဲ စကံက်ဒၟံၚ်လှုဲတံရ။ အောန်အိုတ် မွဲသ္ၚိ မွဲဠက်ရ။ သ္ၚိလှုဲနွံတံဂှ်တှ်ေ ကံက်ဒၟံၚ်မွဲဗီုပၠန်။ ရံၚ်အကာဲအရာတုဲ သ္ၚိလှုဲနွံတံဂှ်တှ်ေ ကံက်ဒၟံၚ်ပိဠက် မသုန်ဠက်” သာ်ဝွံ သ္ဂးရ။
အခိၚ်လၟုဟ် နကဵုတၚ်ထ္ၜးဟိုတ် လိၚ်စုတ်အာမၞိဟ် သွက်တန်ဗ္တောန်ကွတ်ပၞာန်တံဂှ် အာတ်မိက်ကၠုၚ်ဒၟံၚ်သြန်တံနွံတုဲ ပါဲနူဏံတုဲ သၟတ်တိတ်မ္ၚးအခိၚ်ဗ္တံတံဂှ်လေဝ် ရပ်ဒက်တုဲ ပလံၚ်ဗစိုပ်ဒၟံၚ်တန်ဗ္တောန်ကွတ်ပၞာန်တံ နွံဒၟံၚ်ရ။
မွဲလ္ပာ်ဂှ်ပၠန် သ္ကိုပ်အုပ်ဓုပ်ကွာန်အရာပ်ကံၚ်ဇြဳပၞာန်တံဝွံ သွက်ဂွံကော်ကဵုလုပ်ပၞာန်ဂှ် ရေၚ်တၠုၚ်ကၠုၚ်ဒၟံၚ် စဵုကဵုအရာပ်လ္တူဍုၚ်တံ ဗွဲမသၠဲလးတုဲ သီုကဵုလိက်ကော်ဘိက်တံဂှ် ရပ်ဒက်ကၠုၚ် စဵုကဵုအပ္ဍဲသ္ၚိတံ နွံကၠုၚ်ရ။
ညးဒေသၜဳကလေၚ်မွဲတၠဂှ်တှ်ေ ဒၞါဲဂကောံပၠန်ဂတးတံ နွံဂှ် လ္ပာ်ကံၚ်ဇြဳပၞာန် ဗက်စန်ဒက်ဒၟံၚ်သ္ၚိတ်တ်တုဲ ယဝ်ဒးကေတ်မၞိဟ်မ္ဂး အခိၚ်ဗ္တံ ရပ်ကေတ်မၞိဟ်လ္တူဂၠံၚ်တံဂှ်တုဲ ပကောံကၠုၚ်ဒၟံၚ်ကောန်ပၞာန်တၟိတၟိတံ နွံရောၚ် ဟီုရ။
“ဒဒှ်ရညးလဵုမွဲ ဆန္ဒနွံဂှ် က္ဍိုပ်သ္ၚိကၠံ က္ဍိုပ်သ္ၚိစှ်တံ ပံၚ်တောဲတုဲ ဍေံတံဍေံတံ ဗက်စန်ဒက်ကၠုၚ်ဒၟံၚ်သ္ၚိတ်တ် သာ်ဏံဂှ်နွံ။ ဍေံတံစန်ဒက်တုဲ ကဵုဏာလှုဲၜါကိုဋ်၊ ပိကိုဋ်။ ကဵုဏာလှုဲထံက်ပၚ်တုဲ ကော်ဏာရ။ အရာတံဏံလေဝ်နွံ။ လဆောဝ်လဆောဝ် ယဝ်ရဒးကေတ်ဒၟံၚ်မၞိဟ်နွံမံၚ်ဏီတှ်ေ မၞိဟ်ဂွံဆဵုကေတ်လ္တူဂၠံၚ်လ္တူဍာန် အခိၚ်သ္ဂာဗ္တံတံဂှ် တံၚ်ဂြဲဏာတုဲ ပလံၚ်ဗစိုပ်ဏာလဝ်ဂှ်နွံ” သာ်ဝွံသ္ဂးရ။
ဒပ်ကံၚ်ဇြဳပၞာန် ကျဒၟံၚ်ပၞာန် ဇၟာပ်ပေါဲဗ္တိုက်အလုံဍုၚ်မွဲဂှ်ဝွံ သွက်ဂွံဗပေၚ်ဇြဟတ်ဂှ် ပၠောပ်လဝ်လမျီုသၞောဝ်ယိုက်လျိုၚ်ပၞာန်တံဂှ်တုဲ အပ္ဍဲပွိုၚ်မွဲသၞာံဂှ် ပံက်ကၠုၚ်လဝ်တန်ဗ္တောန်ကွတ်ပၞာန် စဵုကဵု လၟေၚ် ၁၀ ရ။
သၞောဝ်ယိုက်လျိုၚ်ပၞာန်ဂှ် တၠအဝဵုပၞာန်တြေံ ဥူတာန်ယှိုဲ စၞောန်ပျးလဝ် ပ္ဍဲသၞာံ ၂၀၁၀ တေံတုဲ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဂယိုၚ်ပ္တိုန်လဝ်လမျီု ပ္ဍဲသၞာံ ၂၀၂၄ ဂိတုဖေဖဝ်ဝါရဳ ၁၀ တေံရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ပ္ကောံပ္ကေဝ်ဂွံလဝ်ဂှ်မ္ဂး ပ္ဍဲတွဵုရးဍုၚ်မန် နူတန်ဗ္တောန်ကွတ်ပၞာန် လၟေၚ် ၁ စဵုကဵု လၟေၚ် ၁၀ ဂှ် ညးဒးဒုၚ်ပကောံလဝ် နဒဒှ်ကောန်ပၞာန်တံ နွံကၠုၚ်လဝ် စဵုကဵု ၁၉၀၀ ရ။
ပရိုၚ်−သြၚ်လောန်တိုၚ်(မ်)
ဗီု−SAC