လှာဒကှ်၊ မာတ် ၂
ပ္ဍဲတွဵုရးကရေၚ် ပွိုၚ်ဍုၚ်လှာဒကှ် မွဲတ္ၚဲဓဝ် ကွာန်ၜါကွာန် ဟိုတ်နူဒးဒုၚ်ထောံလဝ်မခတိုဟ် နကဵုက္ၜၚ်ကျာတုဲ ညးဒေသ ၁၁ တၠ ပါလုပ်သီုကဵုခမဳသၚ်တံဂှ် ကလိဂွံလဝ်ဝပ်တုဲ မၞိဟ်ဗြဴမွဲတၠ ချိုတ်အာလဝ်ရောၚ် ပ္ဍဲဂိတုမာတ် ၁ တေံ KNU ဗဟဵု လလောၚ်ပ္တိတ်လဝ်ပရိုၚ်ရ။
ဒပ်ကံၚ်ဇြဳပၞာန်ဝွံ တုဲကၠုၚ်ပ္ဍဲဂိတုဖေဖဝ်ဝါရဳ ၂၆ အခိၚ်လဒေါဝ်တ္ၚဲကဵု အခိၚ်ဇိုၚ်သဝ်တ္ၚဲဂှ် ပေါဲဗ္တိုက်ဟွံမွဲမွဲသာ် ကၠုၚ်စိုပ်ထောံဏာလဝ်မခတိုဟ် ကွာန်မဝ်ထဳကဵု ကွာန်ပါန်အံၚ် ပွိုၚ်ဍုၚ်လှာဒကှ် နကဵုက္ၜၚ်ကျာဗ္တိုက်ဂျက်ဖိုက်တာရ။
ပ္ဍဲကဵုပရေၚ်ထောံမခတိုဟ် ကွာန်မဝ်ထဳဂှ် မၞိဟ်ဗြဴအာယုက် ၄၂ သၞာံ မွဲတၠ ချိုတ်တုဲ ကောန်ၚာ်သၟတ်ဂမၠိုၚ် မပါလုပ် ညးဍုၚ်ကွာန်ကောန်အရာပ် တြဴတၠ ဇီုကပိုက်ကလိဂွံလဝ်ဝပ်ရ။
ပ္ဍဲကဵုပရေၚ်ထောံမခတိုဟ် ကွာန်ပါန်အံၚ်ဂှ် ဟိုတ်နူမခတိုဟ်ဒတုံဗ္တိုဟ်ထ္ကးအာလဝ် အပ္ဍဲဘာလကျာ် ကွာန်ပါန်အံၚ်ဂှ်တုဲ ညးဍုၚ်ကွာန်ကောန်အရာပ် မသုန်တၠ ပါလုပ်သီုကဵု ကျာ်ဇၞော်ဂ္ဇအ်ဘာ မွဲဇကု၊ တၠဂုန်မွဲဇကု၊ ကောန်ထပိုယ်မွဲဇကု ကလိဂွံလဝ်ဝပ်ရ။
ပေါဲဗ္တိုက်ဟွံမွဲမွဲသာ် ပရေၚ်ဗ္တိုက်ထောံမခတိုဟ် နူဒပ်ကံၚ်ဇြဳပၞာန်ဏံဂှ်ဝွံ နကဵုတၚ်ရန်တၟံနွံနွံ ဒှ်ပွစွံပွန်ပန်ကၠုၚ် ဒၞါဲဒတန်ညးဍုၚ်ကွာန်တံမံၚ်တန်တဴတံဂှ်ကဵု စမြိုၚ်သာသနာ မဒှ်ပွန်ပၞာန်ဟွံသေၚ်တံဂှ်ရောၚ် ဗော်သွးကောန်ဂကူကရေၚ် KNU ဗဟဵု ဟီုရ။
တုဲကၠုၚ် ပ္ဍဲဂိတုဖေဖဝ်ဝါရဳ ၁၈ တေံဂှ်လေဝ် ပ္ဍဲပွိုၚ်ဍုၚ်လှာဒကှ် ကွာန်ခဝ်ကဠာ ဒးဒုၚ်ထောံလဝ်မခတိုဟ် နကဵုက္ၜၚ်ကျာတုဲ ညးဍုၚ်ကွာန်ဒေသ ပန်တၠ ဇီုကပိုက်ကလိဂွံလဝ်ဝပ်တုဲ သ္ၚိပိမ လီုလာ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−KNU