မတ်မလီု၊ မာတ် ၂
အပ္ဍဲပရေၚ်သီအဝဵုပန်သၞာံပြၚ်ကၠုၚ်ဏံ ဟိုတ်နူပရေၚ်ဒစဵုဒစးပါ်ပါဲ ကံၚ်ဇြဳပၞာန် လ္တူလပှ်ကျာတံဂှ်တုဲ ညးမသုၚ်စောဲအောန်လိုၚ် ဗ္ဒါဲ ၅၀ တၠ ဒးဒုၚ်ရပ်ဒၟံၚ် လၟေၚ်ဂိတုဂှ် ပ္ဍဲဂိတုဖေဖဝ်ဝါရဳ ၂၈ တေံ Data for Myanmar လလောၚ်ပ္တိတ်လဝ်ရ။
နူသၞာံ ၂၀၂၂ ဂိတုဖေဖဝ်ဝါရဳ စဵုကဵုသၞာံ ၂၀၂၅ ဂိတုဖေဖဝ်ဝါရဳဏံ ဟိုတ်နူပရေၚ်ချူဆာဲ ဟီုဂးဆက်စၠောံ ထံက်ဂလာန်ကဵုဇြဟတ် ကုဂကောံပၠန်ဂတးတံကဵု ပရေၚ်ချဳဒရာၚ်ညးဍုၚ်ကွာန်တံဂှ်တုဲ ညးမသုၚ်စောဲအောန်လိုၚ် ၁၈၈၄ တၠ ဒးဒုၚ်ရပ်လဝ်ရ။
ပ္ဍဲကဵုဏံ သၟာအနုသုခုမ၊ သၟာထ္ၜးရုပ်တံကဵု အ္စာပရိုၚ်တံလေဝ် ပါလုပ်လဝ်တုဲ ဗွဲမဂၠိုၚ်ဝွံ ညးမသုၚ်စောဲအောန်လိုၚ် နူရးလ္ဂုၚ်ကဵု ရးမာန္တလေဝ်ဂှ် ၉၁၅ တၠ နွံရောၚ် လိက်ဒုၚ်စဳရေၚ်ဂှ် ထ္မံက်ထ္ၜးလဝ်ရ။
ဟိုတ်နူဟီုဂးချူဆာဲဒၟံၚ် လ္တူဝှေတ်ဗော်တုဲ ဒးဒုၚ်ရပ်လဝ်တုဲ ဒၟါနူချူပါ်ပရအ်ဒၟံၚ် လ္တူပလက်ဝှမ်အောန်လိုၚ်တၞဟ်ဟ် မပ္တံကဵု Tik Tok, Telegram, Viber တံဂှ်တုဲလေဝ် ညးဒးဒုၚ်ရပ်ဒၟံၚ်ဂမၠိုၚ် နွံဒၟံၚ်ရ။
လၟိဟ်မၞိဟ်သုၚ်စောဲအောန်လိုၚ် မဒးဒုၚ်ရပ်လဝ် ပ္ဍဲသၞာံ ၂၀၂၂ ကဵု ၂၀၂၃ ဂှ် ၇၀၀ ပြၚ်နွံတုဲ ပ္ဍဲသၞာံ ၂၀၂၄ ဏံဂှ် ပရေၚ်ရပ်ဒက်တံ ယအ်စှ်ေကၠုၚ်ကဝက်ဂှ် Data For Myanmar သ္ဂးရ။
အပ္ဍဲသၞာံ ၂၀၂၄ တုဲကၠုၚ်တေံ ညးမသုၚ်စောဲအောန်လိုၚ် နူကဵု ၁၁၉ ပွိုၚ်ဍုၚ်ဂှ် ၃၇၅ တၠ ဒးဒုၚ်ရပ်လဝ်တုဲ ပ္ဍဲသၞာံဏံ ဂိတုဂျာန္နဝါရဳကဵု ဂိတုဖေဖဝ်ဝါရဳဂှ် ညးမသုၚ်စောဲအောန်လိုၚ် နူ ၁၄ ပွိုၚ်ဍုၚ်ဂှ် ၂၀ တၠ ဒးဒုၚ်ရပ် ကေတ်ဒၟံၚ်အရေဝ် နွံဒၟံၚ်ဖိုဟ်ရ။
ကြဴနူပရေၚ်ပၞာန်သီအဝဵုတုဲ သွက်ဂွံထိၚ်ဒက်ဇာဇၞိက်ပရေၚ်မၞိဟ် ကေုာံ အောန်လိုၚ်ပလက်ဝှမ် ပၟိက်ဇၞော် သွက်ချဳဒရာၚ်ညးဍုၚ်ကွာန်တံဂှ် ကံၚ်ဇြဳပၞာန် ပ္တိတ်ကၠုၚ်ဇြဟတ် ဗီုပြၚ်နာနာသာ်ရောၚ် လိက်ဒုၚ်စဳရေၚ်ဂှ် ထ္မံက်ထ္ၜးလဝ်ရ။
ပ္ဍဲကဵုဏံ ဒဒှ်မထပိုတ်အေန်တာနိတ်၊ ကၟာတ်ဝပ်သာ်တံသၟးဟွံက ညံၚ်ရဴဇာဇၞိက်ပလက်ဝှမ်ပရေၚ်မၞိဟ် မၞိဟ်ရပ်စပ်စကာဂၠိုၚ် ညံၚ်ရဴ Facebook တံဂှ်လေဝ် ကၟာတ်လဒဵုကၠုၚ်လဝ်ရ။
သၞာံ ၂၀၂၂ ဂိတုဂျာန္နဝါရဳကြဴဏံဂှ် နူဇာဇၞိက်ပရေၚ်မၞိဟ်မွဲကဆံၚ် ပွမဆဝ်မ္ၚုဟ်၊ တြးဝါဒ၊ ဘပဠတံဂှ် ယဝ်ကၠောန်ကၠုၚ်မ္ဂး ဒးဒုၚ်ကေတ်ဒၟံၚ်အရေဝ် နကဵုသၞောဝ်ဗ္တိုက်သ္အးပွပကီုပရာပ် ၝောံပိုဒ် ၅၂ (က) ၊ ရာဇာသာတ်ဇၞော် ၝောံပိုဒ် ၁၂၄−က ကေုာံ ၝောံပိုဒ် ၅၀၅−က၊ ၝောံပိုဒ်ပရေၚ်ဆက်စၠောံအဳလက်ထရဝ်နေတ် ၃၃ (က) ကေုာံ နကဵုသၞောဝ်မတန်တဴဂမၠိုၚ်ဂှ်ရောၚ် ကံၚ်ဇြဳပၞာန် လလောၚ်ပ္တိတ်လဝ်ရ။
လ္ပာ်ကံၚ်ဇြဳပၞာန် မၚ်ကျောဝ်ပရေၚ်ဟီုဂးချူဆာဲ လ္တူအောန်လိုၚ်တံဂှ်တုဲ ကေတ်ဒၟံၚ်အရေဝ်တံနွံတုဲ ပ္ဍဲကဵုသၞေဟ်ကၚ်စၟဳတ်ပရေၚ်ဂီုကၠီု ဗလးတိဏံဂှ် စၟဳတ်ဖုၚ်တုဲ ကေတ်ဒၟံၚ်အရေဝ်တံလေဝ် နွံရ။
သ္အာၚ်နူဂှ်ပၠန် ချာန်နေဝ်ထလဳဂရာမ် ဒပ်ပၞာန်ထံက်ဂလာန်တံဂှ်လေဝ် မၚ်ကျောဝ်ပရေၚ်ဟီုဂးချူဆာဲဒၟံၚ် လ္တူလပှ်ကျာတံဂှ်တုဲ ညံၚ်ဂွံကေတ်အရေဝ်မာန် ကဵုဇြဟတ်ဂရိုဟ်ဖ္တိုက်ဖ္အောဝ် ပွမပလံၚ်ဗစိုပ်တၚ်နၚ်ပူဂဵုတံဂှ်လေဝ် ကၠောန်ကၠုၚ်ဒၟံၚ်ရ။
ပ္ဍဲဍုၚ်ဗၟာ ပဋိပက္ခပရေၚ်ပၞာန် မသၠဲလးကၠုၚ်ဒၟံၚ်ဏံဂှ် ပရေၚ်ကောံဓရီု ဗွဲမဗၠးၜး၊ ပရေၚ်ဟီုဂးထ္မံက်ပ္တိတ် ဗွဲမဗၠးၜးတံ ဍန်စှ်ေကၠုၚ်ဒၟံၚ် သိုက်က်ရောၚ် Data For Myanmar လလောၚ်ပ္တိတ်လဝ် ပ္ဍဲဂိတုဂျာန္နဝါရဳတုဲကၠုၚ်တေံရ။
ပရိုၚ်−သြၚ်လောန်တိုၚ်(မ်)
ဗီု−TLT