မတ်မလီု၊ မာတ် ၂
သွက်ဂွံကၠောန်ဗဒှ်အာ အသေအဟာန်တ္ၚဲစၟတ်သမ္တီ တ္ၚဲတွဵုရးဍုၚ်မန် မရနုက်ကဵု ၅၁ ဝါ ပ္ဍဲဂိတုမာတ် ၁၉ ဏံဂှ် ဥူအံၚ်ကျဳတုၚ် မဒှ်သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ပ္တိုန်ကဵုလဝ်ဒၞါဲဂှ် စၞောန်ပ္ညုၚ်ကၠုၚ်ရ။
သွက်ဂွံကၠောန်ဗဒှ်အသေအဟာန်တ္ၚဲတွဵုရးဍုၚ်မန်ဂှ် တုဲကၠုၚ်ပ္ဍဲဂိတုဖေဖဝ်ဝါရဳ ၂၈ တေံ စၞောန်ပ္ညုၚ်ကၠုၚ် ပ္ဍဲကဵုကောံဓရီုပ္ညဳပ္ညပ်ကမၠောန် မကၠောန်ဗဒှ်လဝ် ပ္ဍဲရုၚ်အလဵုအသဳတွဵုရး ဍုၚ်မတ်မလီုဂှ်ရ။
ဥူအံၚ်ကျဳတုၚ်ဂှ်တှ်ေ ပ္ဍဲအသေအဟာန်တ္ၚဲတွဵုရးဍုၚ်မန်ဂှ် ပါဲနူလှ်ေယေန်သၞာၚ်မန်၊ လှ်ေယေန်သၞာၚ် ကောန်ဍုၚ်အရၚ်တံဂှ် သီုသ္ဂောံပံက် ဗ္ဒမ်ထ္ၜးပျး ဌာနမဆေၚ်စပ်တံကဵု ဗ္ဒမ်သွံတြးကပေါတ်ဗၞိက် MSME တံဂှ် စၞောန်ပ္ညုၚ်ကၠုၚ်လတ်ရ။
သ္အာၚ်နူဂှ်ပၠန် နူကဵုကဏ္ဍဝါဗ္ၚ၊ ကဏ္ဍကွတ်စက် ကေုာံ ကဏ္ဍပရေၚ်ဒုၚ်ကာတံဂှ် သွက်ဂွံထ္ၜးပျး ကဏ္ဍညးကဵုညးကီု၊ ဗၞိက်ပ္တိတ်အပ္ဍဲတွဵုရး နူပွိုၚ်ဍုၚ်နာနာတံဂှ်လေဝ် ညံၚ်ဂွံထ္ၜးပျးမာန်ဂှ် ရေၚ်တၠုၚ်အာဏောၚ် သ္ဂးရ။
ဒံက်တာသဳရိမန်ဆာန် ညးမၞုံအခေါၚ်ဟီုဂး ဒပ်စဵုဒၞါဍုၚ်မန် MSDF ဂှ်တှ်ေ ပ္ဍဲအသေအဟာန်တ္ၚဲတွဵုရးဂှ် ကၠောန်ဗဒှ်ထ္ၜး ညံၚ်ဗီုပြၚ်အပ္ဍဲဒေသ မၜိုဟ်သြိုဟ်ဒၟံၚ်ဂှ်တုဲ ပ္ဍဲအသေအဟာန်ဏံဂှ် နကဵုကံၚ်ဇြဳပၞာန် ကၠောန်သ္ပပရေၚ်ဖံက်ထ္ကးတံတုဲ ပ္တိုန်ကၠုၚ်ဒုဟ်ဂကောံပၠန်ဂတးတံမာန်ဂှ်ရ နကဵုညးဒေသဂမၠိုၚ် သွက်ဂွံစွံသတိအိုတ်ဂှ် ဖ္တိုက်ဖ္အောဝ်လဝ်ရ။
“သ္ကိုပ်ဝန်ဇၞော်တွဵုရး ကံၚ်ဇြဳပၞာန် မခါန်ကၞက်လဝ်ဂှ် အဓိက ဍုၚ်မတ်မလီုကဵု ၜိုတ်ပွိုၚ်ဍုၚ်ၜါသွာၚ်သၟးဂှ်ရ ညံၚ်ကဵုၜိုဟ်သြိုဟ်မံၚ်ဂှ် ပပၞကၠောန်ဗဒှ်ဒၟံၚ် အသေအဟာန်ဂမၠိုၚ်ရ။ ပ္ဍဲကဵုအသေအဟာန်တံဏံဂှ် ကၠောန်သ္ပပရေၚ်ဖံက်ထ္ကး မွဲမွဲသာ်တုဲ ပ္တိုန်ကၠုၚ်ဒုဟ်ကုဂကောံပၠန်ဂတးတံတုဲ တြးကၠုၚ်ဝါဒတံ ကၠောန်ကၠုၚ်မာန်ရ။ လေံထံက်ကံၚ်ဇြဳပၞာန်တံဂှ်တှ်ေ နကဵုဒ္ဂေတ်စရိုတ်မယုတ်မာသာ်ဏံဂှ် ကၠောန်ကၠုၚ်မာန်ဂှ်တုဲ ကောန်ညးဍုၚ်ကွာန် တွဵုရးဍုၚ်မန်ဂမၠိုၚ် သွက်ဂွံစွံသတိကဵုအန္တရာယ်လမျီုအိုတ်ဂှ် မိက်ဂွံဖ္တိုက်ဖ္အောဝ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ကံၚ်ဇြဳပၞာန် သွက်ဂွံတြးဝါဒတုဲ အသေအဟာန်မကၠောန်ကၠုၚ် ညံၚ်ကဵုဍုၚ်ကွာန်မၜိုဟ်သြိုဟ်ဒၟံၚ် ပ္ဍဲကဵုအသေအဟာန်တံဏံဂှ် လ္ပပံၚ်တောဲပါလုပ်တုဲ ဍေံတံ ရပ်စပ်ကၠုၚ်အသေအဟာန်သာ်ဏံတုဲ ရပ်ဒက်ကၠုၚ်သၟတ်တံတုဲ ပကောံကၠုၚ်ကဵုလုပ်ပၞာန်မာန်ရောၚ် ဒံက်တာသဳရိမန်ဆာန် ကဵုလဝ်သတိရ။
အသေအဟာန်တ္ၚဲတွဵုရးဍုၚ်မန်ဂှ်တှ်ေ စဳဇန်လဝ် သ္ဂောံကၠောန်ဗဒှ်အာ ပ္ဍဲခဠာတ်သၟိၚ်ဗရာံ နွံသ္ကဲကၠတ်ထဝ်တွဵုးဍုၚ်မန် ဍုၚ်မတ်မလီုဂှ်တုဲ ဂွံကၠောန်ဗဒှ်အသေအဟာန်မာန်ဂှ် ကဵုလဝ်တာလျိုၚ် ကုကမ္မတဳနာနာရ။
ကံၚ်ဇြဳပၞာန်ဝွံ သၞာံတုဲကၠုၚ်တေံ ထ္ၜးဟိုတ်ကဵု တ္ၚဲတွဵုရးဍုၚ်မန်ရတုထဝ် ပေၚ် ၅၀ သၞာံဂှ်တုဲ ဟိုတ်နူကဵုလဝ်အခေါၚ်ကၠောန် ဝိုၚ်ဝေၚ်တံဂှ်ရ အကြာညးဍုၚ်ကွာန်ဒေသဂမၠိုၚ် ပါ်ပါဲဒၟံၚ်တံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−MOI