ပံၚ်၊ မာတ် ၄
ပ္ဍဲတွဵုရးဍုၚ်မန် ပွိုၚ်ဍုၚ်ပံၚ် သ္ကိုပ်က္ဍိုက်ပ်သိုဟ်ပၠိုတ်ပၟတ် ပွိုၚ်ဍုၚ်ပံၚ် ကေုာံ ဒုညးအုပ်ကာနာနာပွိုၚ်ဍုၚ် နူကဵုဒပ်ကံၚ်ဇြဳပၞာန် မကၠုၚ်စိုပ်ရပ်ဒက်ဏာလဝ် နကဵုဇြဟတ်လၟိဟ်ဗွဲမဂၠိုၚ်ဂၠေၚ်ဂှ် ကလေၚ်ဗၠးကၠုၚ်လဝ်ရောၚ် ဂွံတီကေတ် ဇရေၚ်ညးမစုက်လုက်ကဵုကံၚ်ဇြဳပၞာန်တံရ။
ဒပ်ကံၚ်ဇြဳပၞာန်ဝွံ တုဲကၠုၚ်ပ္ဍဲဂိတုဖေဖဝါရဳ ၂၄ တေံ လုပ်စိုပ်ရပ်ဒက်လဝ် သ္ကိုပ်က္ဍိုက်ပ်သိုဟ်ပၠိုတ်ပၟတ်ပွိုၚ်ဍုၚ်ပံၚ် ဥူမျာတ်ကိုဝ်ဝ်၊ ဒုညးအုပ်ကာနာနာပွိုၚ်ဍုၚ်ပံၚ် ဥူကျဝ်မျဵုလှာၚ်တံမပါလုပ် တၠကမၠောန်တြဴတၠ ပ္ဍဲကဵုသ္ၚိဒၟံၚ် ကေုာံ ပ္ဍဲကဵုရုၚ်ညးတံရ။
ကြဴနူဂှ်တုဲ စၟဳတ်သၟာန်သၟုက်လဝ် ညးတံၜါတၠ ပ္ဍဲကဵုဌာန်ဂအုပ်ပၞာန်ရးအဂၞဲ ဖျေံသ္ဇိုၚ်မတ်မလီုဂှ် ပွိုၚ်တြဴတ္ၚဲတုဲ ပ္ဍဲဂိတုမာတ် ၁ ဂှ် ကလေၚ်ဗၠးကၠုၚ်လဝ်ရ။
ဆ္ဂး ကိုဝ်ဇြာနဳ မဒှ်တၠ(တော်ဝင်ဘော်ဒါဆောင်) ကေုာံ တၠကမၠောန်ဂမၠိုၚ် ကိုဝ်မိုဝ်ၚါ၊ ဥူဇြဝ်ဝေန်မျေတ်၊ ဒဝ်ကျအ်အ်သာန် နူကဵုဒပ်ကံၚ်ဇြဳပၞာန် မရပ်ဒက်ဏာလဝ်တံဂှ်တှ်ေ ဒဵုကဵုအခိၚ်လၟုဟ် ကလေၚ်ဗၠးကၠုၚ်လဝ်ဂှ် ဟွံမွဲဏီရ။
ကံၚ်ဇြဳပၞာန်ဂှ်တှ်ေ ရပ်ဒက်လဝ် ညးတံတြဴတၠ နကဵတၚ်စောဲစပ် ထံက်ပၚ်ဒၟံၚ်ဇွောံမ၊ သြန်လှုဲ ဇရေၚ်ဒပ်စဵုဒၞါညးဍုၚ်ကွာန် PDF တံရ။
တုဲကၠုၚ် ပ္ဍဲဂိတုဖေဖဝ်ဝါရဳ ၃ တေံဂှ်လေဝ် သၟဝ်ဒဒန်မွဲတၞုၚ် လ္တူဂၠံၚ်ကွဳစက်လ္ဂုၚ်−မတ်မလီု ဗ္ဒါဲကွာန်(ဥတ္တံတား) ကဵု ကွာန်မိုဝ်နာၚ် ပွိုၚ်ဍုၚ်ပံၚ်ဂှ် ဂွံဆဵုကေတ်လဝ် မာၚ်မခတိုဟ်ဗွဲမဂၠိုၚ်ဂၠေၚ်တုဲဂှ် ညးဒေသ ဟွံအောန်နူကဵု ၂၀ တၠ ဒးဒုၚ်ရပ်လဝ်တုဲ ဒဵုကဵုအခိၚ်လၟုဟ် ဗွဲမဂၠိုၚ်ဂှ် ဟွံကလေၚ်ဗၠးကၠုၚ်ဏီရ။
ပရိုၚ်−သြၚ်လောန်တိုၚ်(မ်)
ဗီု−MOI