လိုၚ်ဗၠဲ၊ မာတ် ၄
ဗ္ဒိုပ်ဒပ်ကံၚ်ဇြဳပၞာန် ဗ္ဒိုပ်ဒပ်ပူလူတူ မၞုံအပ္ဍဲကွာန်ကလေဝ်ဖိုဝ်ကလိုဝ် ပွိုၚ်ဍုၚ်လိုၚ်ဗၠဲ တွဵုရးကရေၚ် ပယျဵုသေံ−ဗၟာဂှ် ပ္ဍဲဂိတုမာတ် ၂ အခိၚ်ဇိုၚ်သဝ်တ္ၚဲဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ ဗ္တိုက်သီဂွံလဝ်ရောၚ် ဂွံတီကေတ် နူကဵုတမ်ရိုဟ်ပရိုၚ်ပယျဵုတံရ။
ဗ္ဒိုပ်ဒပ်ကံၚ်ဇြဳပၞာန် ဗ္ဒိုပ်ဒပ်ပူလူတူ နွံကြပ်ၜဳ(သောၚ်ရၚ်း) ပယျဵုဍုၚ်သေံဂှ် တုဲကၠုၚ် ပ္ဍဲဂိတုဖေဖဝ်ဝါရဳ ၂၇ တေံ ဂကောံပံၚ်ကောံ သၟဝ်က္ဍိုက်ပ် KNLA တံ လုပ်စိုပ်ဗ္တိုက်လဝ်တုဲ ဒဵုကဵုဂိတုမာတ် ၂ ဂှ် ပေါဲဗ္တိုက်ၜါလ္ပာ်တံ ဆက်က္တဵုဒှ်ဒၟံၚ်ရောၚ် တမ်ရိုဟ်ပရိုၚ်ပယျဵုတံ သ္ဂးရ။
အပ္ဍဲပေါဲဗ္တိုက်ၜါလ္ပာ်ဂှ် ဒပ်ပံၚ်ကောံ KNLA တံ သုၚ်စောဲဒရုၚ်တုဲ ဗ္တိုက်လဝ် ဗ္ဒိုပ်ဒပ်ပူလူတူ ကံၚ်ဇြဳပၞာန်ဂှ်တုဲ ဒပ်ကံၚ်ဇြဳပၞာန်ဂှ်လေဝ် ကၠုၚ်စိုပ်ထောံဏာလဝ်မခတိုဟ် နကဵုက္ၜၚ်ကျာတံနွံဒၟံၚ်တုဲ ပ္ဍဲဂိတုမာတ် ၂ အခိၚ်ဇိုၚ်သဝ်တ္ၚဲ ၜိုတ် ၇ နာဍဳဂှ် တိုန်စိုပ်သီလဝ်ဗ္ဒိုပ်ဂှ်တုဲ စံၚ်ၚးတးထောံလဝ်ရောၚ် တမ်ရိုဟ်ပရိုၚ်ဂမၠိုၚ် ဟီုရ။
အပ္ဍဲပေါဲဗ္တိုက်ဂှ် ကောန်ဒပ်ကံၚ်ဇြဳပၞာန်ဒးဂိလဝ် ဗ္ဒါဲ ၃၀ တၠ ဒးဆုတ်ကလေၚ်ဂြိပ်တိတ်အာလဝ်တုဲ ဒပ်ပံၚ်ကောံ ဒပ်မဟာ ၇ KNLA တံ ဗက်ဗ္တိုက်ပသောၚ်ဒၟံၚ် ဒဵုကဵုဂိတုမာတ် ၃ တေံဂှ်တုဲ အပ္ဍဲပေါဲဗ္တိုက်ဂှ် ၜါလ္ပာ်ဇီုကပိုက်တံ နွံလဝ်ရောၚ် တမ်ရိုဟ်ပရိုၚ်ပယျဵုဂမၠိုၚ် သ္ဂးလဝ်ရ။
ဟိုတ်နူအကာဲအရာပေါဲဗ္တိုက်ၜါလ္ပာ် မသ္ကာတ်မြဟ်ဒၟံၚ်ဂှ်တုဲ ညးဍုၚ်ကွာန်ဒေသ ၅၀၀ ပြၚ် နူကဵုကွာန်ဗ္ဒါဲပွဳပွူ ဒတန်ဗ္ဒိုပ်ဒပ်ကံၚ်ဇြဳပၞာန်မၞုံတံဂှ်ဝွံ ဂြိပ်ဒဴပါဲဒလေတ်ကၠုၚ် အပ္ဍဲပွိုၚ်ဍုၚ်ထာတ်သံက်ယာန် ဍုၚ်သေံတုဲ ဒပ်ပၞာန်သေံ ဖျေံဂလိုၚ်ပ္တိုန်လဝ်ဂီုကၠီု ပ္ဍဲကဵုပယျဵုဂှ်တုဲ မၚ်ရံၚ်ဒၟံၚ်ရောၚ် ဇၞော်သ္ကိုပ်ဒပ်ပၞာန်မွဲတၠလေဝ် ထ္မံက်ပ္တိတ်ဟီုကၠုၚ်လဝ်ရ။
ပ္ဍဲကဵုတိဍာ်ဒပ်မဟာ ၇ KNU ဂှ် စနူသၞာံ ၂၀၂၄ ကၞောတ်သၞာံဂှ်တုဲ ဒပ်ပံၚ်ကောံပၠန်ဂတးသၟဝ်ပၠတရဴ ဒပ်မဟာ ၇ KNLA တံ လုပ်စိုပ်ဗ္တိုက်သီလဝ် ဗ္ဒိုပ်ဒပ်ကံၚ်ဇြဳပၞာန်တံကီု၊ ကၟာတ်လဒဵုထပိုတ် ဂၠံၚ်တရဴထံၚ်ပၚ်ဇွောံမဇြဟတ်ဒပ် ဒပ်ကံၚ်ဇြဳပၞာန်တံဂှ်တုဲ ဒပ်ကံၚ်ဇြဳပၞာန်ဂှ်လေဝ် ဗ္တိုက်ကဵုဒရုၚ် ကုဌာန်ဂအုပ်ဗဟဵု KNU တံဂှ် ကၠောန်ကၠုၚ်လဝ်ရ။
ဗ္ဒိုပ်ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲမာနေဝ်ပဠဝ် ပ္ဍဲတိဍာ်ဒပ်မဟာ ၇ သီုဖအိုတ်ဂှ် ပ္ဍဲကဵုကၞောတ်သၞာံ ၂၀၂၄ ဏံ ဒပ်ပံၚ်ကောံပၠန်ဂတး KNLA တံ သီဂွံလဝ်ဂှ်တုဲ မာနေဝ်ပဠဝ် မကေၚ်ဒှ်လဝ်ဌာန်ဂအုပ်ဗဟဵုတြေံ KNU ဂှ်ဝွံ အခါလၟုဟ် ကလေၚ်ဗၠးကၠုၚ် နူသၟဝ်တဲကံၚ်ဇြဳပၞာန်တုဲ ကလေၚ်ဒှ်အာ နဒဒှ်ဒေသဗၠးၜးပၠန်ရ။
ပရိုၚ်−သြၚ်လောန်တိုၚ်(မ်)
ဗီု- KNLA