တၞၚ်သဳ၊ မာတ် ၄
ကုညးပါဲဒဴဘဲပၞာန် မ္ဒးထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ် နူကဵုပွိုၚ်ဍုၚ် ရးတၞၚ်သဳတံဂှ် ကဵုလဝ်သြန်ထံက်ပၚ်ရောၚ် ကံၚ်ဇြဳပၞာန် ဟီုဒၟံၚ်ကီုလေဝ် နတဲဏံ ဟွံဂွံသြန်ထံက်ပၚ်တံအိုတ်ပုဟ်ဂှ် ဂကောံရီုဗၚ်ညးပါဲဘဲပၞာန်တံကဵု ညးပါဲဘဲပၞာန်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုရးတၞၚ်သဳ ပွိုၚ်ဍုၚ်ထပှ်ပွိုၚ်ဍုၚ်ဂှ် ညးထောံလသာဌာန်ဒၟံၚ် ဒးဂြိပ်ဒဴပါဲဒလေတ်ကၠုၚ် ၁၁၀၄၃ တၠဂှ် မွဲတၠမ္ဂး ထံက်ပၚ်ကဵုလဝ် သြန်ၜါဠက်ဒ္ကေဝ်ရောၚ် ကံၚ်ဇြဳပၞာန် လလောၚ်ပ္တိတ်လဝ် ပ္ဍဲဂိတုဖေဖဝ်ဝါရဳ သတ္တာဟတတိယဂှ်ရ။
ပ္ဍဲကဵုဏံ ညးပါဲဘဲပၞာန် နူခရိုၚ်ထဝါဲဂှ် ၆၃၅၅ တၠ၊ နူခရိုၚ်ဗိက်ဂှ် ၄၂၈၉ တၠ၊ နူခရိုၚ်ကအ်သံၚ်ဂှ် ၃၆၅ တၠ ကေုာံ နူခရိုၚ်(ဘုတ်ပြင်း) ဂှ် ၃၄ တၠ၊ သွက်ညးတံသီုဖအိုတ်ဂှ် ထံက်ပၚ်ကဵုလဝ်သြန် ၂၂၀ ပြကောဋိကိုဋ်ဒ္ကေဝ်ရောၚ် ထ္မံက်ထ္ၜးလဝ်ရ။
ကောန်ဂကောံရီုဗၚ်ပါဲဒဴဘဲပၞာန် ပွိုၚ်တိုက်ဒံၚ်ပျံက် အပ္ဍဲခရိုၚ်ထဝါဲ မွဲတၠဂှ် ညးပါဲဘဲပၞာန် နူတိဍာ်ညးတံ ကလိဂွံသြန်ထံက်ပၚ်ဟွံမွဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကဵုလဝ်ညးပါဲဘဲပၞာန် နူလဵုရောဟီုဂှ် ဟွံတီပုဟ်။ ကိစ္စဏံဂှ် ဒှ်ပွဍေံတံစလဝ်မွဲရဏောၚ်။ ဍေံတံကၠောန်ဒၟံၚ်ဂှ်လေဝ် ကၠောန်ဒၟံၚ်ဗွဲမယဵုလ္ဂူတပ်တးဏောၚ်ဂှ် ပိုယ်ဟွံညာတ်။ စိုတ်မိက်ဂွံထံက်ပၚ်နွံကွေံကွေံတုဲ ကၠောန်ဒၟံၚ်ဏောၚ်ဂှ် ပိုယ်တံ ဟွံညာတ်ပုဟ်။ ညအ်ဂှ် ဍေံတံ မိက်ဂွံဂွံမွဲမွဲသာ်တုဲ ကၠောန်ဒၟံၚ်ရ” သာ်ဝွံ သ္ဂးရ။
ညးတာလျိုၚ် ဂကောံထံက်ပၚ်ရီုဗၚ် ညးပါဲဘဲပၞာန်နွေဥူမေတ္တာ မရီုဗၚ်ကဵုဒၟံၚ် ညးပါဲဘဲပၞာန် အပ္ဍဲပွိုၚ်ဍုၚ်တၞၚ်သဳ ခရိုၚ်ဗိက် မွဲတၠဂှ်လေဝ် ပ္ဍဲကဵုဂကောံညးပါဲဘဲပၞာန်ညးတံဂှ် ကလိဂွံသြန်ထံက်ပၚ်တံ ဟွံမွဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
မၞိဟ်တြုံဒေသမွဲတၠ မပါဲဒလေတ်ဒၟံၚ်ဘဲပၞာန် ပ္ဍဲကဵုဂကောံကွာန်တုၚ်ဃောန် ပွိုၚ်ဍုၚ်တၞၚ်သဳဂှ်လေဝ် သြန်ထံက်ပၚ်ကံၚ်ဇြဳပၞာန်ကဵုဂှ် ဟွံကလိဂွံပုဟ်ဂှ် ဟီုရ။
“လ္ပာ်ပိုယ်တံဂှ် ဟွံဂွံပုဟ်။ လ္ပာ်ပိုယ်ဏံ ဍေံတံ(ကံၚ်ဇြဳပၞာန်) ထံက်ပၚ်ကဵုလဝ်တံ မုတံဂှ်ဟွံမွဲပုဟ်။ နူတမ် ဒဵုအခိၚ်လၟုဟ်ရဏောၚ်။ ယဝ်ကဵုမ္ဂး ကေတ်တွဵုရ။ ညးပါဲဘဲပၞာန်တံဟီုတှ်ေ ဒးမံၚ်ဒၟံၚ် ပ္ဍဲဒဵု ပ္ဍဲကၠအ်ဂူဝါတံဂှ်ဟီုတှ်ေ ကျာတ်ဝါတ်ဒၟံၚ်ဏောၚ်” သာ်ဝွံ ဟီုရ။
မွဲလ္ပာ်ဂှ်ပၠန် ပ္ဍဲကဵုရးတၞၚ်သဳဂှ် ညးပါဲဘဲပၞာန် မထောံလသာဌာန်ဒၟံၚ် ဒးဂြိပ်ဒဴပါဲဒလေတ်ကၠုၚ်တံ မွဲတၠမ္ဂး နကဵုထပှ်ဠက်ဒ္ကေဝ် ထံက်ပၚ်ကဵုအာသြန်လၟေၚ်ဂိတု စဵုကဵုသၞာံ ၂၀၂၆ ဂိတုဂျာန္နဝါရဳဂှ်ဏောၚ်ဂှ် ကံၚ်ဇြဳပၞာန် ဟီုလဝ်ရ။
ကံၚ်ဇြဳပၞာန် ထံက်ပၚ်ကဵုလဝ် ညးပါဲဘဲပၞာန်လၟုဟ်တံဂှ်ဝွံ ညံၚ်ဂွံဂွံတၚ်နၚ် သွက်ပေါဲရုဲမာဲကၠုၚ်စိုပ်ဏံဂှ်တုဲ ကၠောန်လဝ်ဏောၚ်ဂှ် ဂကောံညးပါဲဘဲပၞာန်ဂမၠိုၚ် သ္ၚဳဂၠိပ်ဟီုဂးလဝ်တံ နွံဒၟံၚ်ရ။
ပ္ဍဲရးတၞၚ်သဳဂှ် အပ္ဍဲဂိတုဂျာန္နဝါရဳတုဲကၠုၚ်တေံ လၟိဟ်ညးပါဲဒဴဘဲပၞာန် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တံ နွံကၠုၚ်လဝ် စဵုကဵု ၇၇၂၀၀ တၠဂှ် ဂွံတီကေတ် အတိုၚ်တၚ်နၚ်ဂကောံသုတေသနအပ္ဍဲဒေသ FE5 Tanintharyi ရ။
ပရိုၚ်−သြၚ်လောန်တိုၚ်(မ်)
ဗီု−CJ