ကျာ်ထဝ်၊ မာတ် ၅
တွဵုရးဍုၚ်မန် ပွိုၚ်ဍုၚ်ကျာ်ထဝ် ပ္ဍဲကွာန်(ပျဥ◌်းကတိုးကုန်း) ကဵု ဗ္ဒါဲကွာန်အၚ်္ဂဗိုဝ်ဂှ် စနူဂိတုမာတ် ၄ တေံတုဲ ဒပ်ကံၚ်ဇြဳပၞာန် လုပ်စိုပ်ထ္ပက်ကၠုၚ်ကရောၚ်ပၞာန်ဂှ် ဒပ်ပၠန်ဂတးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကရောၚ်ပၞာန်ကံၚ်ဇြဳပၞာန် ဇြဟတ် ၅၀ ပြၚ်ပါဂှ်ဝွံ ထောံဏာလဝ်မခတိုဟ် နကဵုဒရုၚ် ပ္ဍဲကဵုပွဳပွူဗ္ဒါဲကွာန် ဒၞါဲကမၠောန်ကတိုၚ်ထဝ်နွံတံဂှ်တုဲ လုပ်စိုပ်ထ္ပက်လဝ်ကရောၚ်ပၞာန်ရ။
ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်တုဲ ပေါဲဗ္တိုက်ၜါလ္ပာ် က္တဵုဒှ်လဝ်ဟွံမွဲကီုလေဝ် အကာဲအရာပရေၚ်ပၞာန် ကြံၚ်မ္ၚိုဟ်ဒၟံၚ်တုဲ ပေါဲဗ္တိုက်ဂမၠိုၚ် သ္ကာတ်မြဟ်ကၠုၚ်မာန်ရောၚ် သ္ဂးရ။
ဟိုတ်နူကရောၚ်ပၞာန် လုပ်စိုပ်ကၠုၚ်ဂှ်တုဲ ညးဒေသကဵုကၠံ ပါလုပ်သီုကဵုကောန်ကလောန်ကတိုၚ်ထဝ်တံ ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရ။
တ္ၚဲအကြာတုဲကၠုၚ်ဂှ်လေဝ် ကရောၚ်ပၞာန်ကံၚ်ဇြဳပၞာန် ဇြဟတ် ၆၀ ပြၚ်ပါဂှ်ဝွံ ထ္ပက်ကၠုၚ်ကရောၚ်ပၞာန်လုပ်စိုပ်ကၠုၚ် လ္ပာ်ကွာန်ၚှက်ပျဝ်တဝ်ဂှ်တုဲ ဖျေံဒၟံၚ်ဒပ် ပ္ဍဲကွာန်ဂှ်ရ။
မွဲလ္ပာ်ဂှ်ပၠန် နူကဵုတမ်ဒပ်ကံၚ်ဇြဳပၞာန် ဖျေံသ္ဇိုၚ်ကျာ်ထဝ်ဂှ် ပ္ဍဲကဵုကွာန် ဒၞါဲညးဍုၚ်ကွာန်ကောန်အရာပ်တံ မံၚ်တန်တဴတံဂှ် ထောံမံၚ်လွဟ်ဇၞော် ကြပ်အရိုဟ်တ္ၚဲရ။
တုဲကၠုၚ် ပ္ဍဲဂိတုဖေဖဝ်ဝါရဳ ၁၃ တေံဂှ်လေဝ် ဒပ်ကံၚ်ဇြဳပၞာန်ဝွံ ပေါဲဗ္တိုက်ဟွံမွဲမွဲသာ် ကၠောန်သ္ပဗ္တိုက်ကၠုၚ်လတ်ကွာန်ပုၚ်နေဝ်ကုန် ပွိုၚ်ဍုၚ်ကျာ်ထဝ် နကဵုက္ၜၚ်ကျာဂှ်တုဲ ညးဒေသပိတၠ ချိုတ်တုဲ ၁၀ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြး ခရိုၚ်သဓီု KNU ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram