တယိတ်ချံၚ်၊ မာတ် ၅
ရးတၞၚ်သဳ ပ္ဍဲပွိုၚ်ဍုၚ်တယိတ်ချံၚ်ကဵု ပွိုၚ်ဍုၚ်တၞၚ်သဳဂှ် ပေါဲဗ္တိုက်ဟွံမွဲမွဲသာ် ဟိုတ်နူပရေၚ်ကံၚ်ဇြဳပၞာန် ဗ္တိုက်ကၠုၚ်ကဵုက္ၜၚ်ကျာတံဂှ်တုဲ ပါလုပ်သီုကောန်ၚာ်သၟတ်ပိတၠဂှ် ညးဍုၚ်ကွာန်ကောန်အရာပ် ၇ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ညးဒေသတံကဵု ဂကောံဒပ်ပၠန်ဂတးဖျေံသ္ဇိုၚ်ဒေသတံရ။
တုဲကၠုၚ် ပ္ဍဲဂိတုမာတ် ၃ တေံ ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ်ၜါမ နကဵုက္ၜၚ်ကျာဂျက်ဖိုက်တာ ပ္ဍဲကဵုကွာန်ဝေန်ကဖဝ် ပွိုၚ်တိုက်ဒံၚ်ပျံက် ပွိုၚ်ဍုၚ်တယိတ်ချံၚ်ဂှ်ကဵု ကွာန်တမဳလှ ပွိုၚ်ဍုၚ်တၞၚ်သဳဂှ်ရ။
အတိုၚ်ဂလာန် ညးဒေသတံဂှ်မ္ဂး က္ၜၚ်ကျာဗ္တိုက်ဂျက်ဖိုက်တာ ပဝ်ကၠုၚ် နူဒပ်ကျာဍုၚ်ဗိက်ကံၚ်ဇြဳပၞာန်ဂှ်ဝွံ ထောံလဝ်မခတိုဟ်ဗ္တိုက်လဝ် ကွာန်တမဳလှ ပွိုၚ်ဍုၚ်တၞၚ်သဳဂှ်တုဲ သီုထပ်ထောံလဝ်မခတိုဟ် ကွာန်ဝေန်ကဖဝ် ပွိုၚ်ဍုၚ်တယိတ်ချံၚ်ဂှ်ရ။
ပ္ဍဲကွာန်တမဳလှဂှ် ဟိုတ်နူပရေၚ်ကံၚ်ဇြဳပၞာန် ထောံကၠုၚ်မခတိုဟ်ဗ္တိုက်ကၠုၚ်ဂှ်တုဲ သၟတ်ဗြဴအာယုက် ၁၂ သၞာံမွဲတၠ၊ သၟတ်ဗြဴ အာယုက် ၁၄ သၞာံမွဲတၠကဵု မိဇၞော်ခေန်သုၚ် ညးတံပိတၠ ဒးအာကဝေက်မခတိုဟ် ကလိဂွံဝပ်တုဲ သ္ၚိဒၟံၚ်လ္ၚဵုတံလေဝ် ဇီုကပိုက်လီုလာ်အာလဝ်ရောၚ် မၞိဟ်တြုံဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
လအာတုပ်သာ်ဂှ်ကီု ပ္ဍဲကဵုပရေၚ်ဗ္တိုက်ကွာန်ဝေန်ကဖဝ် နကဵုပၞာန်ကျာဂှ် ညးဗြဴအာယုက် ၆၀ သၞာံမွဲတၠ၊ မၞိဟ်တြုံ အာယုက် ၅၀ သၞာံမွဲတၠကဵု ကောန်ကဵုအပါ အာယုက် ၃၅ သၞာံမွဲတၠကဵု အာယုက် ၁၀ သၞာံမွဲတၠ အပံၚ်ဖအိုတ် ၄ တၠ ဇီုကပိုက်ကလိဂွံလဝ်ဝပ်ရောၚ် ညးဒုၚ်တာလျိုၚ် လလောၚ်ပရိုၚ် ကရောၚ်ပၞာန်ဒံၚ်ညဳနံၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုဏံ မၞိဟ်တြုံအာယုက်ဇၞော်ဇၞော်ၜါတၠဝွံ ကလိဂွံဝပ်သ္ကာတ်မြဟ်တုဲ ဒးဂွိၚ်ဒၟံၚ်တုဲ အခိၚ်လၟုဟ် လ္ပာ်ဒပ်ပၠန်ဂတးတံ လွဳလွတ်ကဵုဒၟံၚ်ဂှ် သ္ဂးရ။
အကြာတ္ၚဲတံဏံ ကံၚ်ဇြဳပၞာန်ဝွံ ပေါဲဗ္တိုက်ဟွံမွဲမွဲသာ် ပ္ဍဲကဵုဍုၚ် ပ္ဍဲကွာန် နွံပ္ဍဲရးတၞၚ်သဳတံဂှ် ဗ္တိုက်ထောံကၠုၚ်မခတိုဟ် နူကဵုပၞာန်ကျာ မွဲဏှမွဲဏှဂှ်ရ ညးဒေသဗွဲမဂၠိုၚ်ဝွံ ဒးမံၚ်တန်တဴဒၟံၚ် နကဵုစိုတ်မဖေက်ဒှ်ဓဝိၚ်တံဂှ်ရောၚ် ဂွံတီကေတ်ရ။
တုဲကၠုၚ်ဂိတုမာတ် ၁ တေံဂှ်လေဝ် ပ္ဍဲကဵုပွိုၚ်ဍုၚ်တၞၚ်သဳ ဂကောံကွာန်တကူ ပ္ဍဲကဵုကွာန်မာယာန်ချံၚ်ဂှ် ပေါဲဗ္တိုက်ဟွံမွဲမွဲသာ် လ္ပာ်ဒပ်ကံၚ်ဇြဳပၞာန် ထောံကၠုၚ်မခတိုဟ်ဗ္တိုက်ကၠုၚ်လဝ် နူကဵုပၞာန်ကျာဂှ်တုဲ ဘာလကျာ်လ္ၚဵု ဇီုကပိုက်လီုလာ်လဝ်ဏီရ။
ပရိုၚ်−သြၚ်လောန်တိုၚ်(မ်)
ဗီု−CJ