သဓီု၊ မာတ် ၅
ပ္ဍဲတိဍာ်ဗော်သွးကောန်ဂကူကရေၚ် KNU ဂှ် ဒပ်ကံၚ်ဇြဳပၞာန် သာတုဲစွံကၠုၚ်ပွန်ဗ္တိုက်ကၠုၚ် ပ္ဍဲဘာဗ္တောန်လိက်၊ စမြိုၚ်ပရေၚ်ဘာသာတံဂှ်တုဲ ဗ္တိုက်ကၠုၚ်နကဵုက္ၜၚ်ကျာ၊ လွဟ်ဇၞော်၊ ဒရုၚ်တံဂှ်ရောၚ် ဂွံတီကေတ် အတိုၚ်တၚ်လလောၚ်တြး KNU ဗဟဵုရ။
အတိုၚ်တၚ်လလောၚ်တြး KNU ဗဟဵုဂှ်မ္ဂး ပ္ဍဲဂိတုဖေဖဝ်ဝါရဳ ၂၂ တုဲကၠုၚ်တေံ ပ္ဍဲကဵုခရိုၚ်ညံၚ်လေဝ်ပေန် KNU ပွိုၚ်ဍုၚ်ကျံက်ကျဳ ကွာန်ဝါချေဝ်ဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ကဵုပၞာန်ကျာတံဂှ်တုဲ ဒးအာဇြပ်သ္ဘၚ်ဓဝ်၊ သီ၊ ဂၠံၚ်စၚ်ကြံ အပ္ဍဲဘာလကျာ်တံဂှ်တုဲ လီုလာ်အာလဝ်ရ။
ပ္ဍဲဂိတုဖေဖဝ်ဝါရဳ ၂၆ တေံဂှ်လေဝ် ဒပ်ကံၚ်ဇြဳပၞာန် ကၠုၚ်စိုပ်ပန်ဖျေံဏာလဝ် ဒရုၚ် ပ္ဍဲပွိုၚ်ဍုၚ်ကျံက်ကျဳ KNU ကွာန်ဖျာန်တလေန်ဂှ်တုဲ ဘာဗ္တောန်လိက်ၜါဘာ၊ ပါလုပ်သီုကဵုစၚ်ဍာ်၊ ၝောံခန်၊ ဗ္ဒမ်စွံကပေါတ်တံ ဒးလီုလာ်အာလဝ်ရ။
ပ္ဍဲကဵုတ္ၚဲဂှ်ရ ပ္ဍဲကဵုခရိုၚ်ဒူပလာယာ KNU ပွိုၚ်ဍုၚ်ဝေန်ယျေ ပ္ဍဲကဵုကွာန်မဝ်ထဳကဵု ကွာန်ပါန်အံၚ်တံဂှ် ဒပ်ကံၚ်ဇြဳပၞာန် ဗ္တိုက်ကၠုၚ်လဝ်ကဵုပၞာန်ကျာတုဲ ညးဗြဴဒေသမွဲတၠ ချိုတ်တုဲ ကောန်အရာပ် ၁၄ တၠ ပါလုပ်သီုခမဳသၚ်ကောန်ထပိုယ်တံဂှ် ကလိဂွံလဝ်ဝပ်ရောၚ် KNU လလောၚ်ပ္တိတ်ဟီုဂးလဝ်ရ။
ပ္ဍဲဂိတုမာတ် ၁ အခိၚ်နူဂယးပြဟ်ဂှ်လေဝ် ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ် နကဵုက္ၜၚ်ကျာ ပ္ဍဲကဵုကွာန်ထဳကျဝ်ခဳ၊ ကွာန်မေဝ်တန ပွိုၚ်ဍုၚ်ဘာအၚ် ခရိုၚ်သဓီု KNU ဂှ်တုဲ ဘာလကျာ်ကဵု ဘာဗ္တောန်လိက်တံ ဇီုကပိုက်လီုလာ်အာလဝ်ရောၚ် KNU လလောၚ်ပ္တိတ်လဝ်ရ။
စမြိုၚ်ပရေၚ်ဘာသာ၊ ဘာဗ္တောန်လိက်၊ ရုၚ်ဂဥုဲဗ္ဒမ်ဂဥုဲ ကေုာံ ဒၞါဲညးဍုၚ်ကွာန်တံမံၚ်တန်တဴ ဟွံသေၚ်ကဵုပွန်ပၞာန်တံဂှ် ဒပ်ကံၚ်ဇြဳပၞာန် စွံကၠုၚ်ပွန်တုဲ နကဵုတၚ်ရန်တၟံနွံနွံ ထောံမခတိုဟ်ပန်ပှော်ကၠုၚ်ဂှ်တုဲ ဒးအာလဝ်ညးဍုၚ်ကွာန် သီုခမဳသၚ်ဂမၠိုၚ်တုဲ စမြိုၚ်ပရေၚ်ဘာသာတံကဵု သ္ၚိဌာန်ညးဍုၚ်ကွာန်ပိုၚ်တံ ဇီုကပိုက်ဒးဆောံလေၚ်အာလဝ်ဂှ် KNU ဗဟဵု သ္ဂးရ။
စပ်ကဵုစမြိုၚ်ပရေၚ်ဘာသာ၊ ဘာဗ္တောန်လိက် ကေုာံ သ္ၚိမၞိဟ်ဒၟံၚ် အပ္ဍဲတိဍာ် KNU ဂှ်တုဲ ဒပ်ကံၚ်ဇြဳပၞာန် သာတုဲကၠောန်သ္ပပန်ပှော်ဗ္တိုက်ကၠုၚ် နကဵုလွဟ်ဇၞော်၊ က္ၜၚ်ကျာ၊ ဒရုၚ်တံ ဂၠိုၚ်ကၠုၚ်ဂှ် ညးမၞုံအခေါၚ်ဟီုဂး KNU ပဒိုဝ်သဝ်ကလာသေ ဟီုလဝ် သာ်ဏံရ။
“ဟွံမာန်ကၞိတှ်ေ စံၚ်သ္ၚိ။ မိက်ဂွံဟီုဂှ်တှ်ေ ဟွံမာန်ဂကောံပၠန်ဂတးတံတုဲ သွက်ဂွံကဵုဒဒိုက် ကုညးဍုၚ်ကွာန်ထံက်ဂလာန်ဂကောံပၠန်ဂတးတံဂှ် ကၠောန်ကၠုၚ်ဒၟံၚ် နကဵုဒ္ဂေတ်လၟေတ် ညံၚ်တၠအဝဵု၊ ဝှေတ်သေတ်တံဂှ်ရောၚ် ညာတ်ကေတ်ရ” သာ်ဝွံ သ္ဂးရ။
ဟိုတ်နူပရေၚ်ဗ္တိုက်ထောံမခတိုဟ် ကံၚ်ဇြဳပၞာန်တံတုဲ ဘာဗ္တောန်လိက်တံမပါလုပ်၊ ပ္ဍဲကဵုတိကၠအ်ဂူဝါညးဍုၚ်ကွာန်တံကဵု ဒေသညးဍုၚ်ကွာန်တံဂှ် မကမ်လွဟ်ဇၞော်တံ ဒတုံဗ္တိုဟ်ထ္ကးအာလဝ်တုဲ ကွးဘာဂမၠိုၚ် ဟွံဂံၚ်တိုန်ဘာ၊ ညးဍုၚ်ကွာန်တံလေဝ် ဟွံဂံၚ်အာကလောန်ရတုဲ ဒှ်ဒၟံၚ်အခက်အခုဲကဵုပရေၚ်စသုၚ်မံၚ်စံၚ်ရောၚ် KNU ဗဟဵုလေဝ် လလောၚ်ပ္တိတ်ဟီုကၠုၚ်လဝ်ရ။
စမြိုၚ်ဘာသာတံကဵု ဘာဗ္တောန်လိက်တံဝွံ ဒှ်ဒၞါဲညးဍုၚ်ကွာန်တံ မ္ဒးသ္ပပဓာန် စ္ၜုဲစ္ၜော်မွဲတုဲ ဒပ်ကံၚ်ဇြဳပၞာန် စွံပွန်ဗ္တိုက်ကၠုၚ် လ္တူညးဍုၚ်ကွာန်တံဂှ်တုဲ ကံၚ်ဇြဳပၞာန် ညာတ်ဒၟံၚ် ညးဍုၚ်ကွာန်တံ နဒဒှ်ရဲမထံက်ဂလာန် ဂကောံပၠန်ဂတးကောန်ဍုၚ်အရၚ်တံဂှ်တုဲ စွံပွန်ဗ္တိုက်ဒၟံၚ်ရောၚ် သဝ်အေဝ်ဗာတ် သ္ကိုပ်စၞောန်ပ္ညုၚ် ဂကောံအခေါၚ်အရာမၞိဟ်ကရေၚ် KHRG သ္ဂးရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန်ဝွံ ဟိုတ်နူဟွံဂွံတီကေတ် ဒၞါဲဂကောံပၠန်ဂတးကောန်ဍုၚ်အရၚ်တံ ချိုတ်တ်ပၠိုတ်တ်ဂှ်တုဲ ကလေၚ်စွံပွန်ကၠုၚ် လ္တူညးဍုၚ်ကွာန်တံ ဗ္တိုက်ဒၟံၚ်တုဲ ဍဵုဍိုက်ဒၟံၚ်ညးဍုၚ်ကွာန်တံ နကဵုဓဝ်ဖေက်ဂှ်လေဝ် ပါလုပ်ဂှ် သဝ်အေတ်ဗာတ် သ္ၚဳဂၠိပ်ဟီုလဝ်ရ။
“ ဒၞါဲပလန်တဲ ကုဂကောံရပ်လွဟ်ကောန်ဍုၚ်အရၚ်တံဂှ် ဒၞါဲချိုတ်တ်ပၠိုတ်တ်ဂှ် ဟွံဂွံတီကေတ်တုဲ သာတုဲစွံကၠုၚ်ပွန်ကဵုညးဍုၚ်ကွာန်တံတုဲ ကၠောန်ကၠုၚ်ပရေၚ်ပလန်တဲတံရ။ ဍေံတံ စွံကၠုၚ်ပွန် လ္တူဘာဗ္တောန်လိက်တံဂှ်ဟီုဂှ်လေဝ် ဘာဗ္တောန်လိက်ဟီုဂှ် ဒှ်ဒၞါဲကောန်ဍုၚ်အရၚ်တံ သ္ဂောံတောတက်မွဲရဏောၚ်။ ဒၞါဲကောန်ၚာ်တံ ကတ်ဗ္တောန်ဒၟံၚ်ပညာလေဝ်ဒှ်တုဲ ကၠောန်ကၠုၚ်သာ်ဏံမ္ဂး ဖေက်တုဲညံၚ်ဟွံဂွံဆက်ပၠန်ဂတးဂှ် ကၠောန်လဝ်လေဝ် ဒှ်မာန်တုဲ မွဲပၠန်ဂှ် ညံၚ်ဂကူကောန်ဍုၚ်အရၚ်ပိုယ်တံ အနာဂတ်ဂွံကၠက်အာဂှ် ကၠောန်လဝ်ဏောၚ်လေဝ် ဟီုဂွံဂှ် ပိုယ်တံ ဒုၚ်ဂိုၚ်ကေတ်သာ်ဏံရ” သာ်ဝွံ ညးသ္ဂးရ။
ဒပ်ကံၚ်ဇြဳပၞာန် စွံပွန်ကဵုစမြိုၚ်ပရေၚ်ဘာသာ ကေုာံ ဘာဗ္တောန်လိက်တံတုဲ မွဲဏှမွဲဏှကၠောန်ကၠုၚ်ဒၟံၚ်ပရေၚ်ဗ္တိုက်ပၞာန်ကျာ ပရေၚ်ဗ္တိုက်ထောံမခတိုဟ် ကဵုဒရုၚ်တံဂှ်တုဲ ကောန်ကွာန်ညးဒေသဂမၠိုၚ်ဝွံ ဟွံဂံၚ်ပလံၚ်ဏာကောန်ညးတံ ပ္ဍဲဘာဗ္တောန်လိက်ရပုဟ်ဂှ် ပ္ဍဲလိက်ဒုၚ်စဳရေၚ် ဂကောံအခေါၚ်အရာမၞိဟ်ကရေၚ် KHRG မလလောၚ်ပ္တိတ်လဝ်ဂှ် သ္ဂးလဝ်ရ။
ဟိုတ်နူဒပ်ကံၚ်ဇြဳပၞာန် ဗ္တိုက်ကၠုၚ်လွဟ်ဇၞော်၊ က္ၜၚ်ကျာ ကေုာံ ကဵုဒရုၚ်တံဂှ်တုဲ လၟိဟ်ညးပါဲဒဴဘဲပၞာန် ပ္ဍဲတိဍာ် KNU ဂှ် ဂၠိုၚ်တိုန်ကၠုၚ်ဒၟံၚ်တုဲ အပ္ဍဲဂိတုဏံ ညးဍုၚ်ကွာန်ဒေသ ၅၀၀ ပြၚ် နူကဵုကွာန်ကလေဝ်ဖိုဝ်ကလိုဝ် ပွိုၚ်ဍုၚ်လိုၚ်ဗၠဲ ခရိုၚ်ဘာအၚ် တိဍာ်ဒပ်မဟာ ၇ KNU ဂှ် ဒးဂြိပ်ဒဴပါဲဒလေတ်ကၠုၚ် လ္ပာ်ဍုၚ်သေံတုဲ ညးဒေသဗ္ဒါဲ ၁၀၀၀ နူကဵုကွာန်ဝါပျာန် ပွိုၚ်ဍုၚ်ဘာအၚ် ခရိုၚ်သဓီု KNU ဂြိပ်စိုပ်ကၠုၚ် အပ္ဍဲဒေသမျာၚ်ကျဳၚူဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−KHRG