ကအ်ကြိက်၊ မာတ် ၆
တွဵုရးကရေၚ် ပ္ဍဲသ္ကုတ်သၠုၚ်ကျာကအ်ကြိက်ဂှ် အကြာဒပ်ပံၚ်ကောံပၠန်ဂတး KNLA ကဵု ကံၚ်ဇြဳပၞာန်တံဂှ် ပေါဲဗ္တိုက်ဂမၠိုၚ် ဆက်သ္ကာတ်မြဟ်ဒၟံၚ်တုဲ ကံၚ်ဇြဳပၞာန် ကၠောန်ကၠုၚ်ဒၟံၚ်ပရေၚ်ဗ္တိုက်ပၞာန်ကျာတံ သီုကဵုပ္ဍဲကွာန်ဟွံဆက်စပ်ကဵုပေါဲဗ္တိုက်တံဂှ်ရောၚ် ဂွံတီကေတ် ဇရေၚ်ညးဒေသတံရ။
ဗ္ဒါဲဍုၚ်ကအ်ကြိက် တိဍာ်ဒပ်မဟာ ၆ KNU လ္ပာ်ကွာန်ကအ်ဏိကဵု ကွာန်တၟိတံဂှ် အကြာဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် ပ္ဍဲဂိတုဖေဖဝ်ဝါရဳကြပ်အိုတ်ဂှ်ကဵု ဂိတုမာတ်မံက်ဏံ ကေုာံ ဒပ်ပံၚ်ကောံပၠန်ဂတးမဟာမိတ် သၟဝ်ပၠတရဴ ဒပ်ပၞာန်ဗၠးၜးကောန်ဂကူကရေၚ် KNLA တံဂှ် ပေါဲဗ္တိုက်ၜါလ္ပာ်တံ က္တဵုဒှ်လဝ် ဗွဲမသ္ကာတ်မြဟ်ရ။
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ပ္ဍဲကအ်ကြိက် သ္ကုတ်သၠုၚ်ကျာဂှ် လ္ပာ်ဒပ်ပံၚ်ကောံပၠန်ဂတးတံဂှ် ကောန်ဒပ်လ္ၚဵု ဇီုကပိုက်ပြဟ်လလုဲအာတံ နွံဒၟံၚ်တုဲ လ္ပာ်ဒပ်ကံၚ်ဇြဳပၞာန်ဂှ်လေဝ် စဵုကဵု ၁၀ တၠပြၚ် ဇီုကပိုက်ချိုတ်အာတံ နွံဒၟံၚ်ရောၚ် ဒပ်ပံၚ်ကောံပၠန်ဂးတ လုပ်မံၚ်ပေါဲဗ္တိုက်ဗလးတိတံ လလောၚ်ပ္တိတ်လဝ်ရ။
ကရောၚ်ပၞာန်ဒပ်ကံၚ်ဇြဳပၞာန် ဒးဂိအာလဝ် အပ္ဍဲပေါဲဗ္တိုက်သ္ကုတ်သၠုၚ်ကျာကအ်ကြိက်ဂှ်ဝွံ နူကဵုကွာန်ကအ်ဏိကဵု ကွာန်တၟိဂှ် သ္ၚိဒၟံၚ်ညးဒေသ ဂၠိုၚ်ကဵုကၠံ စံၚ်ပလီုပလာ်လဝ်တုဲ ကွာန်နူကဵုသ္ကုတ်သၠုၚ်ကျာကအ်ကြိက် ကွာန်ဟွံဆက်စပ်ကဵု ပေါဲဗ္တိုက်မက္တဵုဒှ်ဒၟံၚ် ပ္ဍဲကဵုကွာန်(ဘော့ဒိုင်း၊ ဆံဖလာ၊ အစွန်း) တံဂှ်လေဝ် ဆက်ထောံမံၚ်မခတိုဟ် နကဵုက္ၜၚ်ကျာရ။
ပ္ဍဲပေါဲဗ္တိုက်ကအ်ကြိက်ဂှ် ဒပ်ကံၚ်ဇြဳပၞာန် သာတုဲရပ်စပ်ကၠုၚ်ဒၟံၚ် ဒရုၚ်၊ လွဟ်ဇၞော် ကေုာံ က္ၜၚ်ကျာတံဂှ်တုဲ ဗ္တိုက်ဒၟံၚ်ဂှ် ဗိုလ်သာန်ဒေ သ္ကိုပ်ကရောၚ်ပၞာန် Savage Wolves Column မလုပ်မံၚ်ပေါဲဗ္တိုက်ဗလးတိတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုကွာန်(အစွန်း) သ္ကုတ်သၠုၚ်ကျာပွိုၚ်ဍုၚ်ကအ်ကြိက် ဒၞါဲညးဍုၚ်ကွာန်ကောန်အရာပ် ပွန်ပၞာန်ဟွံသေၚ်တံ မံၚ်တန်တဴဒၟံၚ်တံဂှ် ပ္ဍဲဂိတုမာတ် ၅ အခိၚ်နူဂယးပြဟ် ၁ နာဍဳဝိုက်ဂှ် ဒပ်ကံၚ်ဇြဳပၞာန် ကၠောန်သ္ပဗ္တိုက်ဂြာတ်လဝ်မခတိုဟ် နကဵုပၞာန်ကျာတုဲ သ္ၚိ ၅ မ ဇီုကပိုက်လီုလာ်အာလဝ်တုဲ ညးဍုၚ်ကွာန် ၂ တၠ ဇီုကပိုက်ကလိဂွံလဝ်ဝပ်ရောၚ် ဂကောံဒပ်ပၠန်ဂတး Special Operation Group-SOG လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media