မတ်မလီု၊ မာတ် ၆
အခိၚ်သ္ကိုပ်အုပ်ဓုပ် တွဵုရးဍုၚ်မန်တံ ဒးဒုၚ်ၚးတးပသောၚ်ဒၟံၚ် မွဲဏှမွဲဏှဂှ် မ္ၚးနူကဵုဒၞါဲသ္ကိုပ်အုပ်ဓုပ်ကွာန်၊ အရာပ်တံဂှ် သီုကဵုဒၞါဲသ္ဇိုၚ်ဝန်တခဳတံဂှ်လေဝ် သွက်ဂွံခါန်ကၞက်ပ္တိုန်ဗွဲမပြဟ်ဂှ် ဥူအံၚ်ကျဳတုၚ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန် ခါန်ကၞက်ပ္တိုန်လဝ်ဂှ် စၞောန်ပ္ညုၚ်ကၠုၚ်ရ။
ပ္ဍဲကဵုကောံဓရီုပ္ညဳပ္ညပ်ကမၠောန် ကမ္မတဳကောပ်ကာဲကံက်စရၚ်ဗလးတိ တွဵုရးဍုၚ်မန် မကၠောန်ဗဒှ်လဝ် ပ္ဍဲရုၚ်အလဵုအသဳတွဵုရးဍုၚ်မန် လ္တူဍုၚ်မတ်မလီု ပ္ဍဲဂိတုမာတ် ၄ ဂှ် စၞောန်ပ္ညုၚ်ကၠုၚ်လဝ် ကုဌာနမဆေၚ်စပ် သၟဝ်ညးဂမၠိုၚ်ရ။
ဒၞါဲသ္ကိုပ်အုပ်ဓုပ်သၠးဒၟံၚ်တံကဵု ဒၞါဲသ္ဇိုၚ်ဝန်တခဳတံဂှ် ကဵုခါန်ကၞက်ပ္တိုန်ဗွဲမပြဟ်ဂှ်ဝွံ သွက်ဂွံကလေၚ်စၟဳတ် စရၚ်လၟိဟ်မၞိဟ်အပ္ဍဲတွဵုရးဍုၚ်မန် အာယုက် ၁၈ ကဵု လ္ပာ်လ္တူတံမာန်ရောၚ်ဂှ် သ္ဂးရ။
ၜိုန်သ္ကိုပ်ဝန်ဇၞော် ကဵုခါန်ပ္တိုန်ကၠုၚ် သ္ကိုပ်အုပ်ဓုပ်ဒၞါဲမသၠးဒၟံၚ်တံဂှ် ဗွဲမပြဟ်ကီုလေဝ် ပ္ဍဲဂိတုဖေဖဝ်ဝါရဳ ၂၆ တုဲကၠုၚ်တေံ ကြဴနူသ္ကိုပ်အုပ်ဓုပ်ကွာန်ညံၚ်ကုန်ကျဳ ပွိုၚ်ဍုၚ်ပံၚ် ဥူမျေတ်သဵုကဵု သမ္ဘာညး ဒးဒုၚ်ပန်ဂစိုတ်တုဲဂှ် ညးမဒှ်သ္ကိုပ်အုပ်ဓုပ်ဂှ် ချိုတ်အာလဝ်ရ။
သ္ကိုပ်အုပ်ဓုပ်အရာပ် ဟွံမိက်ထ္မံက်ယၟုမွဲတၠဂှ်တှ်ေ အခိၚ်ကာလလၟုဟ်ဝွံ ဒှ်ဒၟံၚ်ၜါလ္ပာ်တုဲ နကဵုညးထံက်ဂလာန်ကံၚ်ဇြဳပၞာန်ဂမၠိုၚ် ကၠောန်နဒဒှ်သ္ကိုပ်အုပ်ဓုပ်မာန်တုဲ ၜိုတ်အရာပ်လ္တူဍုၚ်သၟးရ ပြေပြံၚ်မာန်ကီုလေဝ် လ္ပာ်ရးတံဂှ်တှ်ေ ဟွံပြေပြံၚ်ပုဟ်ဂှ် ဟီုရ။
“အခိၚ်ပိုယ်တေံကဵု လၟုဟ်ဏံဂှ် တၞဟ်ခြာအာတၟာဂလိုၚ်ယျ။ လၟုဟ်ဂှ်တှ်ေ ဒှ်ဒၟံၚ်ၜါလ္ပာ်။ နကဵုရဲထံက်ဂလာန်လ္ပာ်ဏံဂှ်တှ်ေ ဍေံတံကၠောန်ဂှ် ကိစ္စဟွံမွဲပုဟ်။ ဍေံတံ မိက်ဂွံကၠောန်လေဝ် ကၠောန်ဏောၚ်။ လ္ပာ်တေံဂှ်ပၠန်လေဝ် ဍေံတံဟွံကာတ်ကၠုၚ်ဗ္ဒါဲဟဂှ်ရ။ ဆ္ဂး လ္ပာ်အရာပ် လ္တူဍုၚ်ပိုယ်တံဂှ်တှ်ေ ဗီုပြေပြံၚ်ဒၟံၚ်ဂှ် နွံ။ လ္ပာ်ရးတေံဂှ်တှ်ေ ဖျေံစိုတ်ဟွံဂွံအှ်ေပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် ရံၚ်ကဵုအကာဲအရာလၟုဟ်မ္ဂး ၜိုဟ်သြိုဟ်ဒၟံၚ်ဟွံသေၚ်ဂှ်တုဲ ယဝ်သ္ပသ္ကိုပ်အုပ်ဓုပ်မ္ဂး မ္ၚးနူကဵုဖျေံစိုတ်ကဵုပရေၚ်ဂီုကၠီုဟွံဂွံဂှ် စနူကဵုဘဲအန္တရာယ်လမျီုတံဂှ် ဒးဂွိၚ်ဒၟံၚ်တုဲ မၞိဟ်ညိည ဟွံဂံၚ်ကၠောန်ပုဟ်ဂှ် ညးဆက်ဟီုရ။
ကြဴနူဒပ်ပၞာန်သီအဝဵုတုဲ သ္ကိုပ်အုပ်ဓုပ် မခါန်ကၞက်ပ္တိန်လဝ် ဗွဲမဂၠိုၚ်ဝွံ ဒှ်ရဲထံက်ဂလာန်ဒပ်ပၞာန်၊ ဒပ်ကောန်ဂကောံ (မဘသ) ဂကောံစိုပ်တၞုၚ်တၞး ပ္ဍဲပရေၚ်ဘာသာတံဂှ်သၟးဟွံက ကောန်ဗော်ကျခိုၚ်ယျေလေဝ် ပါလုပ် ဗွဲမဂၠိုၚ်ရ။
ဟိုတ်နူကံၚ်ဇြဳပၞာန် ပအပ်ကဵုလဝ်အခေါၚ်ကၠောန်ပေၚ်ၚ် ကုသ္ကိုပ်အုပ်ဓုပ်တံဏံဂှ်တုဲ ထ္ၜးဟိုတ်ကဵုစရၚ်ကၟုဲတုဲ အာတ်လှုဲ ဇရေၚ်ကောန်ညးဍုၚ်ကွာန် အကြာကွာန်၊ အကြာအရာပ်တံဂှ်ကီု၊ ပ္ဍဲအရာမအာတ်လိက်ထံက်ဂလာန်တံဂှ်လေဝ် အာတ်မိက်ကၠုၚ်သြန်သၟးဟွံက သီုထ္ၜးဟိုတ်ကဵုပရေၚ်ယိုက်လျိုၚ်ပၞာန်တုဲ မိက်ကၠုၚ်ဒၟံၚ်သြန်တံဂှ် ကၠောန်သ္ပကၠုၚ်ဒၟံၚ် အဆက်က်ရ။
ပ္ဍဲတွဵုရးဍုၚ်မန်ဂှ်တှ်ေ ကြဴနူဒပ်ပၞာန်သီအဝဵုတုဲဂှ် သ္ကိုပ်အုပ်ဓုပ်ကံၚ်ဇြဳပၞာန်ခါန်ကၞက်ပ္တိုန်လဝ် ကြပ်ကၠံ ဒးဒုၚ်ၚးတးပသောၚ်လဝ်တုဲ ရုၚ်သ္ကိုပ်အုပ်ဓုပ်ဗွဲမဂၠိုၚ်ဂှ်လေဝ် ပံက်ဟွံဂွံ ဒးကၟာတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ