မတ်မလီု၊ မာတ် ၇
ပ္ဍဲတွဵုရးဍုၚ်မန် အပ္ဍဲဂိတုဖေဖဝ်ဝါရဳပွိုၚ်မွဲဂိတုတုဲကၠုၚ်တေံဂှ် ညးဍုၚ်ကွာန်ဒေသ ၆၄ တၠ ဒးဒုၚ်ရပ်လဝ်တုဲ ၁၅ တၠ ဒးဒုၚ်ဂစိုတ်လဝ်ရောၚ် ဂွံတီကေတ် အတိုၚ်တၚ်လလောၚ်တြး လိက်လၟေၚ်လ္ဂန်အိန် မလလောၚ်ပ္တိတ်လဝ် ပ္ဍဲဂိတုမာတ် ၆ တေံရ။
ထ္ၜးကၠုၚ်ဟိုတ် နကဵုပရေၚ်ယိုက်လျိုၚ်ပၞာန်ဂှ်တုဲ ဒးဒုၚ်ရပ်လဝ်ဂှ်ကီု၊ ထံက်ပၚ်ကောန်ဂကောံပၠန်ဂတးတံဂးတုဲ နကဵုတၚ်စောဲစပ်သာ်ဏံဂှ် ဒးဒုၚ်ရပ်လဝ်ဂၠိုၚ်အိုတ်ရ။
ညးမ္ဒးချိုတ်အာဂမၠိုၚ်ဝွံ ဒၟါနူပရေၚ်ကောန်ဒပ်ပၠန်ဂတးတံ ပြိုက်ဂစိုတ်တံဂှ်ကီု၊ ပရေၚ်ကံၚ်ဇြဳပၞာန် ပန်ကဵုလွဟ်ဇၞော် ကေုာံ ဗ္တိုက်ကဵုပၞာန်ကျာတံ မပါလုပ် ဟိုတ်နူမာၚ်တိုပ်တိ သှ်ေနူပေါဲဗ္တိုက်တံဂှ်တုဲ ဒးချိုတ်အာတံလေဝ် ပါလုပ်ရ။
အပ္ဍဲဂိတုဖေဖဝ်ဝါရဳဂှ် ဟိုတ်နူပရေၚ်ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာ ကေုာံ လွဟ်ဇၞော်တံဂှ်တုဲ ညးဒေသ ၂၄ တၠ ဇီုကပိုက်ကလိဂွံလဝ်ဝပ်တုဲ သ္ၚိမၞိဟ်ဒၟံၚ် ဟွံအောန်နူ ၅၀ မ ပါလုပ်သီုကဵုဘာဗ္တောန်လိက်၊ စမြိုၚ်ဘာသာတံဂှ် လီုလာ်အာလဝ်ရ။
ပ္ဍဲကဵုဂိတုဏံ ပ္ဍဲကဵုပွိုၚ်ဍုၚ်ကျာ်မြဟ်၊ ကျာ်ထဝ်၊ ပွိုၚ်ဍုၚ်ၜဳကလေၚ်ကဵု ပွိုၚ်ဍုၚ်ရေဝ်တံဂှ် ပေါဲဗ္တိုက်ၜါလ္ပာ် က္တဵုဒှ်လဝ် စဵုကဵု ၁၃ ဝါတုဲ ကောန်ဒပ်ၜါလ္ပာ်တံ ဇီုကပိုက်ချိုတ်အာတံလေဝ် နွံလဝ်ရ။
အပ္ဍဲဂိတုဂျာန္နဝါရဳတုဲကၠုၚ်တေံ ဟိုတ်နူပဋိပက္ခရပ်လွဟ်တုဲ ပ္ဍဲတွဵုရးဍုၚ်မန်ဂှ် ညးဍုၚ်ကွာန်ဒေသ ၈ တၠ ချိုတ်တုဲ ၁၉ တၠ ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြး လိက်လၟေၚ်လ္ဂန်အိန်ရ။
ပရိုၚ်−သြၚ်လောန်တိုၚ်(မ်)
ဗီု- Social Media