ကမမံၚ်၊ မာတ် ၆
ပေါဲဗ္တိုက်ဟွံမွဲမွဲသာ် ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ် နကဵုက္ၜၚ်ကျာ ပ္ဍဲကဵုကွာန်ကျံက်ကွေန် နွံလ္တူဂၠံၚ်ကွဳစက် ကမမံၚ်−ကတိုၚ်တိ ဍုၚ်ကမမံၚ် တွဵုရးကရေၚ်ဂှ်တုဲ ကျာ်ဇၞော်အ္စာ ပဝ်အာလဝ်ဂှ် တမ်ရိုဟ်ပရိုၚ်အပ္ဍဲဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမာတ် ၅ အခိၚ်ဇိုၚ်သဝ်တ္ၚဲ ၜိုတ် ၄ နာဍဳ ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ် နကဵုက္ၜၚ်ကျာ ပ္ဍဲကွာန်ကျံက်ကွေန် အကြာဒေသကတိုၚ်တိကဵု ဍုၚ်ကမမံၚ်ဂှ်တုဲ စမြိုၚ်ဘာ ဇီုကပိုက်လီုလာ်အာလဝ်တုဲ ကျာ်ဇၞော်အ္စာဂ္ဇအ်ဘာ ပဝ်အာလဝ်ဂှ် တမ်ရိုဟ်ပရိုၚ်အပ္ဍဲဒေသ သ္ဂးရ။
သ္အာၚ်နူဂှ်ပၠန် ဟိုတ်နူပရေၚ်ဗ္တိုက်ထောံမခတိုဟ်တံဂှ်တုဲ ခမဳမွဲဇကု၊ ကောန်ထပိုယ်မွဲဇကု မၞုံအပ္ဍဲဘာဂှ် ဇီုကပိုက်ကလိဂွံအာလဝ်ဝပ်တုဲ နူဍုၚ်ကမမံၚ်မွဲကဆံၚ် ပလံၚ်ဗစိုပ်ဏာလဝ် ရုၚ်ဂဥုဲဘာအၚ်တုဲ ဒုၚ်လွဳလွတ်ဒၟံၚ်ရောၚ် သ္ဂးရ။
ခရိုၚ်ဘာပန် ပ္ဍဲတိဍာ်ဒပ်မဟာ ၅ ဂှ် က္ၜၚ်ကျာဒပ်ကံၚ်ဇြဳပၞာန်ဂမၠိုၚ် ကၠုၚ်စိုပ်ပန်ပှော်လဝ်လၟေၚ်ၚ်တ္ၚဲတုဲ ကွာန်ကျံက်ကွေန်ဝွံ ဒှ်ကွာန်နွံမံၚ်အကြာ ဍုၚ်ကမမံၚ်ကဵု ကွာန်ကတိုၚ်တိတုဲ ခြာဒၟံၚ်နူဍုၚ်ကမမံၚ် ဗၞတ် ၉ မိုၚ်ဂှ် သ္ကိုပ်ဗိုလ်ဇၞော်သဝ်ကလာဒိုဝ် ညးမၞုံအခေါၚ်ဟီုဂး ဒပ်မဟာ ၅ ခရိုၚ်ဘာပန် ဟီုရ။
အကြာဒပ်ကံၚ်ဇြဳပၞာန် ကၠုၚ်နူဍုၚ်ကမမံၚ်တုဲ မထ္ပက်ကၠုၚ်ကရောၚ်ပၞာန် လ္ပာ်ဒေသကတိုၚ်တိဂှ်ကဵု ဒပ်ပံၚ်ကောံ ဒပ်မဟာ ၅ KNLA တံ က္တဵုဒှ်လဝ်ပေါဲဗ္တိုက် ပ္ဍဲဂိတုမာတ်တေံတုဲ ဒပ်ကံၚ်ဇြဳပၞာန် ဒးဂိလဝ်တုဲ ကလေၚ်ဆုတ်ကလေၚ်အာလဝ် ပ္ဍဲဍုၚ်ကမမံၚ်တုဲ ဒဵုကဵုအခိၚ်လၟုဟ် ဟွံဂွံထပ်တိုန်ကၠုၚ်ဏီပုဟ်ဂှ် သ္ကိုပ်ဗိုလ်ဇၞော်သဝ်ကလာဒိုဝ် ဆက်ဟီုရ။
ဒပ်ကံၚ်ဇြဳပၞာန်ဝွံ ညံၚ်ဗ္ဒိုပ်ဗျူဟာဍုၚ်ကမမံၚ်ညးတံ ဟွံဂွံဒးဒုၚ်ဗ္တိုက်ဂှ် စနူဂိတုဖေဖဝ်ဝါရဳ သတ္တဟာတတိယဂှ်တုဲ ထောံကၠုၚ်မခတိုဟ်ကဵုက္ၜၚ်ကျာ ပန်ပှော်ကၠုၚ်လွဟ်ဇၞော် လ္တူကွာန်နွံမွဲဒမြိပ်ပွဳပွူဍုၚ်ကမမံၚ်ဂှ် ကြပ်အရိုဟ်ဒဒှ်တ္ၚဲတုဲ စမြိုၚ်ဘုတ်ဘာဂမၠိုၚ်ကဵု စမြိုၚ်သ္ၚိဒၟံၚ်ဂမၠိုၚ် ဇီုကပိုက်လီုလာ်အာလဝ်ရ။
ဟိုတ်နူပရေၚ်ဗ္တိုက် ဒပ်ကံၚ်ဇြဳပၞာန်တုဲ ညးဍုၚ်ကွာန်ဒေသ ဟွံအောန်နူ ၅ ကွာန်ဝွံ ဒးဂြိပ်ဒဴစိုပ်ကၠုၚ်ဒၟံၚ် ပ္ဍဲဒေသမျာၚ်ကျဳၚူ ဗ္ဒါဲဍုၚ်ကမမံၚ်ဂှ်တုဲ ဒဵုကဵုအခိၚ်လၟုဟ် စဴဌာန်ဒၟံၚ်ဟွံမာန်ဏီပုဟ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−KHRG