ပ္ဍဲကျာ်ထဝ် ရေၚ်ကွဳစက် ကောန်ဒပ်စှ်ေနူတန်ဗ္တောန်ကွတ်ပၞာန်တံ ဒးဒုၚ်ကြတ်ဗ္တိုက်

ကျာ်ထဝ်၊ မာတ် ၇

တွဵုရးဍုၚ်မန် ပွိုၚ်ဍုၚ်ကျာ်ထဝ် ပ္ဍဲဂၠံၚ်လ္ဂုၚ်−မတ်မလီု ဗ္ဒါဲကွာန်အၚ်္ဂဗိုဝ်ဂှ် ရေၚ်ကွဳစက်ညးစှ်ေနူတန်ဗ္တောန်ကွတ်ပၞာန်တံ ဒးဒုၚ်ကြတ်ဗ္တိုက်လဝ်တုဲ ပရေၚ်ဇီုကပိုက်ချိုတ်တံ နွံမာန်ရောၚ် ဒပ်ပၠန်ဂတးဖျေံသ္ဇိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုမာတ် ၆ အခိၚ်နူဂယး ၜိုတ် ၉ နာဍဳဂှ် ရေၚ်ယာန်ကွဳစက် ညးမစှ်ေနူတန်ဗ္တောန်ကွတ်ပၞာန်တံ မဍိုက်ပါဗက်ကၠုၚ် ၈ ဖ္ဍိုက် နူရးဗဂေါ မဒဳကၠုၚ်အပ္ဍဲပွိုၚ်ဍုၚ်ကျာ်ထဝ်ဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ ဂွံပရိုၚ်တုဲ မၚ်ဗ္တိုက်လဝ်ရ။

အပ္ဍဲပရေၚ်ဗ္တိုက်ဏံဂှ် ကောန်ဒပ်စှ်ေနူတန်ဗ္တောန်ကွတ်ပၞာန်ကံၚ်ဇြဳပၞာန်တံ ဇီုကပိုက်ချိုတ်အာ နွံမာန်တုဲ လၟိဟ်ချိုတ်တ်ပၠိုတ်တ်ဂှ်တှ်ေ ဆက်ဂၠိုက်ဂၠါဲဒၟံၚ်ဖိုဟ်ရောၚ် သ္ဂးရ။

အတိုၚ်ဂလာန် ကောန်ဒပ်ပၠန်ဂတးဖျေံသ္ဇိုၚ်ဒေသတံဂှ်မ္ဂး ကောန်ဒပ်စှ်ေနူတန်ဗ္တောန်ကွတ်ပၞာန်ဂမၠိုၚ်ဝွံ ဒှ်ကောန်ဒပ် သ္ဂောံပလံၚ်ဗစိုပ်ဏာ ဇရေၚ်ဒပ်မတ်မလီုတံဏောၚ်ဂှ် ဂွံတီကေတ်ရ။

ကြဴနူရေၚ်ယာန်ကွဳစက် ကောန်ဒပ်စှ်ေနူတန်ဗ္တောန်ကွတ်ပၞာန်တံ ဒးဒုၚ်ဗ္တိုက်တုဲဂှ် နူကဵုတမ်ဒပ်ကံၚ်ဇြဳပၞာန် ခမရ စၟတ် ၂၀၇ ကဵု ဒပ်အမၠံက် စၟတ် ၃၁၀ ဖျေံသ္ဇိုၚ်ဒုၚ်သယိတ်တံ ပန်ပှော်ကၠုၚ်ဒၟံၚ်လွဟ်ဇၞော်ကြာန်န်ရ။

ပ္ဍဲပွိုၚ်ဍုၚ်ကျာ်ထဝ် ပရေၚ်ပၞာန်ၜါလ္ပာ် မကလေၚ်ကြံၚ်မ္ၚိုဟ်ကၠုၚ်ဒၟံၚ်ဂှ် ဒပ်ကံၚ်ဇြဳပၞာန် ပလေဝ်ဒၟံၚ်ပၞာန်ဒုၚ်ကီု၊ ဖျေံလဝ်ဒပ်မၚ်တောပ်ဗ္တိုက်တံ ဗွဲမဂၠိုၚ်ဂၠေၚ်တုဲ ကြပ်လၟေၚ်ဒဒှ်တ္ၚဲ ပန်ပှော်ဒၟံၚ်ကဵုလွဟ်ဇၞော်၊ ထံၚ်မံၚ်ပရိုၚ်ကဵုပၞာန်ကျာတံဂှ် ဆက်ကၠောန်ၜိုတ်ဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီု−CJ