ၜဳကလေၚ်၊ မာတ် ၈
အပ္ဍဲပေါဲဗ္တိုက် မက္တဵုဒှ်လဝ် ဗ္ဒါဲကွာန်အဠူလေဝ် ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ် သီုၜါလ္ပာ်ဇီုကပိုက်ပြဟ်လလုဲတံ နွံလဝ်ရောၚ် ဂွံတီကေတ် အတိုၚ်ဂလာန် ညးတာလျိုၚ်ဒပ်ပၠန်ဂတးတံရ။
တုဲကၠုၚ်ပ္ဍဲဂိတုမာတ် ၆ အခိၚ်နူဂယးၜိုတ် ၁၁ နာဍဳဂှ် အကြာဒပ်ကံၚ်ဇြဳပၞာန် ဇြဟတ်ၜိုတ် ၄၀ မကၠုၚ်ကေတ်ဂီုကၠီုဂၠံၚ် လ္တူဂၠံၚ်ကွဳစက်လ္ဂုၚ်−မတ်မလီုဂှ်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံ က္တဵုဒှ်လဝ်ပေါဲဗ္တိုက် ပွိုၚ်မွဲနာဍဳဘာ်ပြၚ်ရ။
အပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန် ပန်တၠ ချိုတ်တုဲ ပန်တၠ ကလိဂွံလဝ်ဝပ်တုဲ လ္ပာ်ဒပ်ပၠန်ဂတးဂှ် ကောန်သ္ဂံၚ် PDF မွဲတၠ ပြဟ်လလုဲတုဲ ၜါတၠ ကလိဂွံဝပ်ဟွံဒးဂွိၚ်ဂှ် သ္ဂးရ။
ဟိုတ်နူပေါဲဗ္တိုက်ၜါလ္ပာ်တုဲ ဂၠံၚ်ကွဳစက်လ္ဂုၚ်−မတ်မလီု အာကၠုၚ်ဟွံဂွံ ဒှ်အာလဝ်ပွိုၚ်ဍုၚ်နာဍဳပြၚ်တုဲ ၜိုတ်လဒေါဝ်တ္ၚဲ ၂ နာဍဳဂှ် ကလေၚ်အာကၠုၚ်ဒၟံၚ် အတိုၚ်တြေံအိုတ်ဂှ် ဂွံတီကေတ် ဇရေၚ်ညးဒေသတံရ။
ပ္ဍဲပွိုၚ်ဍုၚ်ၜဳကလေၚ် ပရေၚ်ပၞာန်ၜါလ္ပာ် မကလေၚ်ကြံၚ်မ္ၚိုဟ်ဒၟံၚ်ဂှ် လ္ပာ်ကံၚ်ဇြဳပၞာန် တြးလဝ်ဒပ် ပ္ဍဲကဵုကွာန်ထပှ်ကွာန်တုဲ လ္တူဂၠံၚ်ၜဳကလေၚ်−ဒံၚ်သောန်ဂှ်လေဝ် မၚ်တောပ်ဗ္တိုက်ဒၟံၚ်ကီု လုပ်စၟဳတ်ဒၟံၚ်တံကီုဂှ် ကၠောန်သ္ပဒၟံၚ်ရ။
မွဲလ္ပာ်ဂှ်ပၠန် ဒပ်ကံၚ်ဇြဳပၞာန်ဝွံ ဟိုတ်နူပရိုၚ် ဒပ်ပၠန်ဂတးတံ လုပ်စိုပ်ဗ္တိုက်ဏောၚ်ဂှ်တုဲ ဗ္ဂပ်စုတ်လဝ် ကွဳစက်ခြပ်ပသဲ၊ လွဟ်ဇၞော် ဟံၚ်ဝှေသ်သာ ပ္ဍဲကဵုတမ်ဒပ်ဖျေံသ္ဇိုၚ်ၜဳကလေၚ်တံဂှ်တုဲ တမ်ဒပ်မွဲဒပ်မ္ဂး ဗပေၚ်လဝ်ဇြဟတ် ဂၠိုၚ်ကဵုကၠံရ။
ပရိုၚ်−သြၚ်လောန်တိုၚ်(မ်)
ဗီု− CJ