မတ်မလီု၊ မာတ် ၈
အလုံဍုၚ်မွဲ အပ္ဍဲဂိတုဖေဖဝ်ဝါရဳတုဲကၠုၚ်တေံဂှ် ဟိုတ်နူပရေၚ်ကံၚ်ဇြဳပၞာန် ဗ္တိုက်ကၠုၚ်ကဵုလွဟ်ဇၞော် ကေုာံ ပၞာန်ကျာတံဂှ်တုဲ ညးဗြဴ ၆၆ တၠ ချိုတ်တုဲ ၆၈ တၠ ဇီုကပိုက်ကလိဂွံလဝ်ဝပ်ရောၚ် သမဂ္ဂညးဗြဴဍုၚ်ဗၟာ BWU လလောၚ်ပ္တိတ်လဝ် ပ္ဍဲဂိတုမာတ် ၆ တေံရ။
အပ္ဍဲဂိတုဖေဖဝ်ဝါရဳဂှ် အလုံဍုၚ်မွဲ ဟိုတ်နူပရေၚ်ကံၚ်ဇြဳပၞာန် ဗ္တိုက်ထောံမခတိုဟ်နကဵုပၞာန်ကျာတုဲ ညးဒးချိုတ်အာ ၄၅ တၠ၊ ဟိုတ်နူပန်ကဵုလွဟ်ဇၞော်ဂှ် ၁၁ တၠ၊ ဟိုတ်နူစံၚ်ယတ်ပြိုက်ဂစိုတ်လဝ်ဂှ် ၂ တၠ၊ ဟိုတ်နူဟွံဂွံပရေၚ်လွဳလွတ်ဂဥုဲအပ္ဍဲထံၚ်တံဂှ် ၁ တၠ ကေုာံ ဟိုတ်နူမာၚ်တိုပ်တိဂှ် ၇ တၠ ချိုတ်အာလဝ်ရောၚ် ထ္မံက်ထ္ၜးလဝ်ရ။
ပ္ဍဲကဵုဏံ သၟတ်ဗြဴအာယုက်သၟဝ် ၁၈ သၞာံ ၁၃ တၠ ပါလုပ်တုဲ ညးဗြဴ ၆၈ တၠဂှ်လေဝ် ဟိုတ်နူကံၚ်ဇြဳပၞာန်တံတုဲ ဇီုကပိုက်ကလိဂွံလဝ်ဝပ်ဂှ် BWU သ္ဂးရ။
အတိုၚ်တၚ်နၚ် BWU ကံက်ကပှ်ဂွံလဝ်ဂှ်မ္ဂး လၟိဟ်ညးဗြဴမ္ဒးပြဟ်လလုဲအာဂမၠိုၚ်ဝွံ ပ္ဍဲကဵုရးသက်ကိုၚ်ဂှ် ၂၁ တၠ၊ ပ္ဍဲကဵုရးသေံသၟဝ်ကျာကဵု ရးမဂွဵုတံဂှ် ၉ တၠ၊ ပ္ဍဲရးမာန္တလေဝ်ဂှ် ၈ တၠ ချိုတ်အာလဝ်ဂၠိုၚ်အိုတ်ရောၚ် ထ္မံက်ထ္ၜးလဝ်ရ။
တၚ်နၚ်တံဏံဝွံ ပကောံပကေဝ်လဝ် နူကဵုတၚ်နၚ်ပရိုၚ်မဳဒဳယျာဂမၠိုၚ် မထ္မံက်ထ္ၜးလဝ်ဂှ်ကဵု တၚ်နၚ်ပရိုၚ် BWU မကံက်ကပှ်ဂွံလဝ်ဂှ်တုဲ ပ္ဍဲဗလးတိဏံ ဂၠိုၚ်နူဏံမာန်ရောၚ် သ္ဂးရ။
တုဲကၠုၚ်သၞာံ ၂၀၂၅ ဂိတုဂျာန္နဝါရဳဂှ်လေဝ် အလုံဍုၚ်မွဲဂှ် ဟိုတ်နူပရေၚ်ကံၚ်ဇြဳပၞာန်တံ ဖံက်ပ္ကဝ်ကၠုၚ်အခေါၚ်အရာမၞိဟ်တံဂှ်တုဲ ညးဗြဴ ၈၆ တၠ ချိုတ်အာလဝ်ဂှ် BWU လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−SLM