မတ်မလီု၊ မာတ် ၈
ကပေါတ်ဗၞိက် မလုပ်စိုပ်ကၠုၚ် နူပယျဵုသေံ−ဗၟာမွဲကဆံၚ်ဂှ် ဟိုတ်နူဒပ်ပံၚ်ကောံကံၚ်ဇြဳပၞာန်တံ ရပ်ဒက်ကၟာတ်လဒဵုကၠုၚ်ဒၟံၚ်ဂှ်တုဲ ကပေါတ်ဗၞိက်သေံတံ လုပ်စိုပ်ကၠုၚ်ဒၟံၚ်တံ ဒေါအ်ဒေၚ်အာယျဂှ် သၟာဗၞိက်ပယျဵုဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူတၚ်စၞောန် ဒုက္ဍိုပ်သ္ကိုပ်ပၞာန် ဒုသ္ကိုပ်ဗိုလ်ဇၞော် သဵုဝေန်တုဲ စနူဂိတုမာတ်မံက်ဏံတုဲ ပ္ဍဲကဵုတွဵုရးကရေၚ် ဂၠံၚ်တိတ်ဍုၚ်ဘာအၚ်ဂှ်ကဵု ပ္ဍဲကဵုပွိုၚ်ဍုၚ်လိုၚ်ဗၠဲ ကွာန်ထဳလုၚ် ပ္ဍဲသၞေဟ်ကၚ်စၟဳတ်တံဏံဂှ် ဒပ်ပံၚ်ကောံကံၚ်ဇြဳပၞာန်တံ ကၟာတ်လဒဵုရပ်ဒက်ဒၟံၚ်ရ။
အတိုၚ်ဂလာန် သၟာဗၞိက်ပယျဵုတံဂှ်မ္ဂး နူဂိတုမာတ် ၅ စဵုကဵုဂိတုမာတ် ၇ ဂှ် လၟိဟ်ယာန်ဖ္ဍိုက်ဗၞိက် မဖ္ဍိုက်ပ္တိုန်နၚ် ကပေါတ်ဗၞိက်သေံ ၇၀၀ ပြၚ် ဒးဒုၚ်ရပ်ထိၚ်လဝ်ရ။
ကပေါတ်ဗၞိက်သေံ နူကံၚ်ဇြဳပၞာန် မရပ်ထိၚ်လဝ်ဂှ်ဝွံ ဗၞိက်စၞစသ္ဇိုၚ် ညးဍုၚ်ကွာန်ဂမၠိုၚ် မ္ဒးရပ်စပ်သုၚ်စောဲဒၟံၚ် လၟေၚ်တ္ၚဲဂှ်ကီု၊ ဂဥုဲဇဗ ကေုာံ ဗၞိက်မၞိဟ်အရပ်စပ်တံ ပါလုပ်ဒၟံၚ် ဂၠိုၚ်အိုတ်ရ။
သၟာဗၞိက်ပယျဵုမွဲတၠဂှ်တှ်ေ ဟိုတ်နူပရေၚ်ကံၚ်ဇြဳပၞာန် ကၟာတ်လဒဵုရပ်ဒက်ကၠုၚ်ဂှ်တုဲ ၚုဟ်ဗၞိက်သေံတံ သၠုၚ်တိုန်ကၠုၚ်ဂှ် ညးဍုၚ်ကွာန်ဂမၠိုၚ် ထပ်ဒးဒုၚ်မာန်တုဲ တၠကမၠောန်ဍောတ်တ်ဂမၠိုၚ်လေဝ် ကၠေံအာမာန်ဏောၚ်ဂှ် ဟီုရ။
“ယဝ်ရပ်မ္ဂး ညးလဵုမွဲ ဂိရောဟီုဂှ် တၠကမၠောန်ဍောတ်တ်ဂမၠိုၚ် ဒးဂိဏောၚ်။ တုဲမ္ဂး ၚုဟ်ဗၞိက်တိုန်တုဲ သၠုၚ်အာဏောၚ်။ တုဲမ္ဂး ကပေါတ်ဗၞိက်သေံတံဂှ် စဵုကဵုဟွံမွဲ အောန်စှ်ေအာတုဲ အကာဲအရာဒးရပ်စပ်အာဝိုဟ်တံဂှ်ရနွံ။ ဒှ်အာဗီုခေတ်ကၠာတေံ ဒးကလေၚ်သုၚ်စောဲ ကကဠာပ္တိတ်နူအပ္ဍဲဍုၚ်တံကဵု ဝိုဟ်တံသၟးရဏောၚ်။ ၜိုတ်တၠကမၠောန်ဇၞော်ဇၞော်တံဓဝ်ရ စတဲခိုဟ်တံဂှ်တုဲ တၠကမၠောန်ပရေၚ်ပိုန်ဒြပ်ဓမ္မတာတံ တၠကမၠောန်ဍောတ်တ်တံဂှ်တှ်ေ ကၠေံအာအိုတ်ဏောၚ်” သာ်ဝွံ သ္ဂးရ။
လ္ပာ်ကံၚ်ဇြဳပၞာန် ဟိုတ်နူရပ်ကၠုၚ်ဒၟံၚ်ကပေါတ်ဗၞိက်သေံတံ ဇၞော်ကဵုဇြဟတ်ဂှ်တုဲ သၟာဗၞိက်လ္ၚဵုတံ ဒေါအ်ဇူလဝ် ပရေၚ်မပၠောပ်ပ္တိုန်ကပေါတ်ဗၞိက်သေံတံဂှ်တုဲ အခိၚ်ကာလရပ်ဒက်ဒၟံၚ်ဏံ ယဝ်ဂၠိၚ်သ္ၚောဲကၠုၚ်မ္ဂး ကပေါတ်ဗၞိက်ပိုတ်တုဲ ၚုဟ်သၠုၚ်တိုန်ကၠုၚ်မာန်ရောၚ် သၟာဗၞိက်ပယျဵုဂမၠိုၚ် သ္ၚဳဂၠိပ်လဝ်အိုတ်ရ။
အတိုၚ်တၚ်လလောၚ်တြး ကံၚ်ဇြဳပၞာန် မလလောၚ်ပ္တိတ်လဝ်ဂှ်မ္ဂး ပ္ဍဲဂိတုမာတ် ၁ ဂှ် ဂကောံဗ္တိုက်သ္အးပရေၚ်သွံရာန်ဗၞိက်ဟွံလုပ်သၞောဝ်တွဵုရးကရေၚ် လုပ်စိုပ်စၟဳတ် ဂိုဝ်ဒံၚ်စွံလဝ်ကပေါတ်အရပ်စပ်ကမၠောန် လ္တူဍုၚ်ဘာအၚ်ဂှ်တုဲ ကေတ်အရေဝ်သီကေတ်လဝ် ကပေါတ်အရပ်စပ်သွက်ကမၠောန် ၚုဟ်မးမၞုံ ၅၀၀၀ ကိုဋ်ဒ္ကေဝ် မထ္ၜးသက်သဳဟွံမာန်တံဂှ် သ္ဂးရ။
သ္အာၚ်နူဂှ်ပၠန် ပ္ဍဲကဵုခဠာတ်စၟဳတ်ယာန်ကွဳစက် ဍုၚ်ဘာအၚ် ( ရဲသာယာယီ) ဂှ်လေဝ် ပ္ဍဲဂိတုမာတ် ၁ တေံ သီဂွံလဝ် ကပေါတ်ဗၞိဟ်အရပ်စပ်သွက်ကမၠောန် ၚုဟ်မးမၞုံ ၁၀၀၀ ကိုဋ်ဒ္ကေဝ်ကဵု ယာန်ကွဳစက် ဟွံမွဲကဵုသက်သဳတံဂှ် ကံၚ်ဇြဳပၞာန် လလောၚ်ပ္တိတ်လတ်ပရိုၚ်ရ။
ပရေၚ်ရပ်ဒက်ဒၟံၚ် ယာန်ဖ္ဍိုက်ဗၞိက်တံကဵု ကပေါတ်ဗၞိက်သေံဟွံလုပ်သၞောဝ်တံဂှ် နူကဵုဒုသ္ကိုပ်ရး ဌာန်ဂအုပ်ပၞာန်ရးအဂၞဲ ကံၚ်ဇြဳပၞာန်တံ သ္ကိုပ်သ္ကလဝ်တုဲ ကပေါတ်ဗၞိက်မရပ်ဂွံလဝ်တံဂှ်ကဵု ယာန်ဂၠိုၚ်ကဵုကၠံဖ္ဍိုက်တံဂှ် စွံလဝ် ပ္ဍဲခဠာတ်(သီရိ) ဍုၚ်ဘာအၚ်ရ။
ဍုၚ်ဗၟာဝွံ စွံအဓိကတုဲ ဒးရပ်စပ်ဒၟံၚ် ကပေါတ်ဗၞိက်နူကဵုဍုၚ်ဇိုၚ်ဝုတ်ဒိုဟ် ဍုၚ်သေံ မပ္တံကဵုဗၞိက်စသုၚ်သ္ဇိုၚ်၊ ဗၞိက်မၞိဟ်အရပ်စပ်၊ ဂဥုဲဇဗ၊ ဗၞိက်ပယျေဝ်၊ ကပေါတ်ဗၞိက်အရပ်စပ်သွက်ပရေၚ်သိုၚ်ခၞံတံ မပါလုပ် ကပေါတ်ဗၞိက်အရပ်စပ်ဒၞါဲနာနာသာ်ရ။
ပရိုၚ်−သြၚ်လောန်တိုၚ်(မ်)
ဗီု−MOI