တဳဟဳရာန်၊ မာတ် ၁၁
ကြဴနူသမ္မတဒဝ်နေဝ်ထြာမ် ကဵုကၠုၚ်ဇြဟတ်ဂရိုဟ် သ္ဂောံကေတ်တၚ်တုပ်စိုတ်နျူကလဳယျာတုဲဂှ် က္ဍိုပ်သ္ကိုပ်အဳရာန် အာယာတိုဝ်လာ အလဳခါမေနဳဂှ်တှ်ေ ဍုၚ်မလေပ်သ္ပမာန်ညးဂမၠိုၚ်တံ ဖ္တိုက်ဖ္အောဝ်ဒၟံၚ် သ္ဂောံပ္ညဳပ္ညပ်ဂှ်ဝွံ ရန်တၟံသ္ဂောံအုပ်ဓလီုဍုၚ်တၞဟ်သ္အာၚ်တံဂှ်ဏောၚ်တုဲ သ္ဂောံသောၚ်ကလးပြဒ္ဒညာဟွံသေၚ်ပုဟ်ဂှ် ဟီုလဝ်ရ။
နကဵုအဳရာန် စပ်ကဵုကိုန်စဳမာန်နျူကလဳယျာညးတံတုဲ ယဝ်ဟွံကေတ်တၚ်တုပ်စိုတ်ပုဟ်ဟီုမ္ဂး ဒးဒုၚ်ဗ္တိုက်ဖလှေက် နကဵုပရေၚ်ပၞာန်ဏောၚ်ဂှ် သမ္မတထြာမ် ချူပလံၚ်လဝ်လိက် ဇရေၚ်အဳရာန်တုဲ နကဵုညး ဟွံမိက်ကဵုဇီုကပိုက်အဳရာန်ဂှ်တုဲ ကေတ်တၚ်တုပ်စိုတ်မ္ဂး သာခိုဟ်ဏောၚ် ဟီုလဝ်ရ။
နကဵုညးတံ ကဵုအခေါၚ်အဳရာန် ဂွံပိုၚ်ပြဳလွဟ်နျူကလဳယျာဟွံဂွံပုဟ်ရ ဒးကၠောန်မွဲမွဲသာ်ဏောၚ်ဂှ် ထြာမ် ဟီုကၠုၚ်လဝ်ရ။
ဂွံလဝ်လိက်ထြာမ်ပလံၚ်လဝ်ဂှ်ယျဟီုဂှ် ဟွံဂွံတီကေတ် ချိုတ်တ်ပၠိုတ်တ်ကီုလေဝ် က္ဍိုပ်သ္ကိုပ်ဇၞော်ခါမေနဳဂှ်တှ်ေ စကာဏာလဝ် နဒဒှ်ဍုၚ်မသ္ပမာန်ဍဵုဍိုက်ညးတၞဟ်သ္အာၚ်တံတုဲ ဟီုကၠုၚ်လဝ်ကုထြာမ် တပ်ပ်ဂှ်ဟွံမွဲရ။
တၚ်အာတ်မိက် ဍုၚ်မသ္ပမာန်ဍဵုဍိုက်တံဂှ် ဍုၚ်ညးတံ ဒ္ဂေတ်ဗက်ဖ္ဍိုက်ဗပေၚ်ကဵုအာဟွံသေၚ်ပုဟ်ဂှ် ခါမေနဳ ဟီုလဝ်ရ။
နူကဵုတၚ်တုပ်စိုတ်နျူကလဳယျာ ဍုၚ်ဇြဟတ်ဇၞော်မသုန်ဍုၚ် ကေုာံ အဳရာန် ပ္ဍဲလက်ထက်သမ္မတအိုဝ်ပါမာတေံဂှ် အပ္ဍဲအာယုက်ထြာမ် ကေတ်လျိုၚ်နဒဒှ်သမ္မတကၠာတေံဂှ်ရ နုက်တိတ်လဝ်တုဲ ကၠတ်ဂစိုတ်လဝ် သ္ကိုပ်ဗိုလ်အဳရာန် ခါသာန်သဵုလိုၚ်မာန်နဳရ။
ကြဴနူစိုပ်ကၠုၚ်သ္ၚိဗု အလန်ဒုတိယတုဲဂှ် သမ္မတထြာမ် ကၠောန်သ္ပကၠုၚ်ဒၟံၚ်ပရေၚ်ကရေပ်ဓရတ် လ္တူအဳရာန် ဂၠိုၚ်အိုတ်တုဲ လ္ပာ်ပရေၚ်ပိုန်ဒြပ်ကီု လ္ပာ်ပရေၚ်ကလုတ်တမာန်ကီု ညံၚ်ဂွံသၟေဟ်ဒှ်ဒၟံၚ်ညးမွဲဓဝ်ဂှ် ကၠောန်ဒၟံၚ်ရ။
ကိုန်စဳမာန်နျူကလဳယျာအဳရာန်တံဂှ်ဝွံ ဒှ်သွက်ပရေၚ်ကၠောန်ပ္တိတ်လွဟ်လက်နက်ဟွံသေၚ် ဒှ်သွက်ပရေၚ်ၜိုဟ်လလမ် သွက်ဂွံကၠောန်ပ္တိတ်ဇြဟတ်ဓာတ်တံဏောၚ်ဂှ် ဟီုလဝ်ကီုလေဝ် သ္အးဇ္ၚးဒၟံၚ် ယူရေနဳယာန်တံဂှ် ကၠောန်ဂၠိုၚ်ဒၟံၚ်ရ။
Ref; CNN