မနဳလာ၊ မာတ် ၁၂
စပ်ကဵုပရေၚ်ဗ္တိုက်သ္အးဂဥုဲၜူမာဲတုဲ ဟိုတ်နူမၞိဟ်မဒးချိုတ်အာလဝ် ဗွဲမဂၠိုၚ်ဂၠေၚ်ဂှ် သမ္မတဖဳလေတ်ဖေန်တြေံ ရိုဝ်ဒရဳဂိုဝ် ဒူတာတေ ဒးဒုၚ်ရပ်လဝ်ကဵု ရုၚ်သၞောဝ်ဓဝ်အမှုရာဇဝတ်ဍုၚ်နာနာ ICC အတိုၚ်ဝါရာန်ရပ် စပ်ကဵုအမှုရာဇဝတ် မကလိလောန်လဝ်လ္တူဂကူမၞိဟ်တံရ။
သမ္မတတြေံ ဒူတာတေ အာယုက်မၞုံ ၇၉ ဂှ် အပ္ဍဲပရေၚ်ညးဗ္တိုက်သ္အးလဝ်ဂဥုဲၜူမာဲဂှ် မၞိဟ်ဂၠိုၚ်ကဵုလ္ၚီ ဗွဲမဂၠိုၚ်ကောန်ညးဒိုက်ဝါတ်တံ ပါလုပ်ဒၟံၚ်ဂှ်ဝွံ ဒဒှ်မသွံရာန်ဂဥုဲၜူမာဲ ကေုာံ ဆက်စပ်မံၚ်တံဂှ် သက်သဳဟွံမွဲမွဲသာ် ဒးဒုၚ်ဂစိုတ်လဝ်ကဵု ဒပ်ဗၠာဲသၟိၚ်တံရောၚ် ဂကောံအခေါၚ်အရာမၞိဟ်ဂမၠိုၚ် စောဲစပ်လဝ်ရ။
ICC ပ္တိတ်လဝ်လိက်ဝါရာန် ကုဒူတာတေ နကဵုတၚ်စောဲစပ်ပရေၚ်ဂစိုတ်မၞိဟ် မကလိလောန်လဝ် လ္တူဂကူမၞိဟ် မဒှ်ရ။
ဒူတာတေ အာစိုပ်ဟံၚ်ဂံၚ်ခေတ္တတုဲ အခိၚ်ကလေၚ်စဴကၠုၚ်ဂှ် ဒပ်ဗၠာဲသၟိၚ်ဖဳလေတ်ဖန်တံ ရပ်လဝ်ညး ပ္ဍဲကဵုသၞေဟ်က္ၜၚ်ကျာ ဍုၚ်မနဳလာရ။
ဒပ်ဗၠာဲသၟိၚ်အေန်တာပဝ်မနဳလာ ရပ်ဒက်လဝ်ဒူတာတေ နကဵုလိက်ဝါရာန်ရပ် နူကဵု ICC တံ ပ္တိတ်လဝ်ဂှ်ရောၚ် ရုၚ်သမ္မတ ဟီုလဝ်ရ။
ကြဴနူရပ်ဒက်လဝ် သမ္မတတြေံ ကေုာံ ဂကောံညးတုဲဂှ် စၟဳတ်ပရေၚ်ထတ်ယုက်တုဲ ဒဒှ်ရပရေၚ်ထတ်ယုက်ခိုဟ်မိုဟ်ဒၟံၚ် ဂွံဆဵုကေတ်ဂှ် ဒပ်ဗၠာဲသၟိၚ် ဟီုရ။
နကဵုညး ယဝ်ကံကုသိုလ် ဒးဒုၚ်ရပ်ပါကၠုၚ်မ္ဂး ဂွံဒုၚ်ရပ်ဂှ်ဒှ်ဒၟံၚ်ဒတုဲရရောၚ် ဒူတာတေ ဟီုလဝ်ကဵု ကောန်ကလောန်ဖဳလေတ်ဖေန် ပ္ဍဲဟံၚ်ဂံၚ်ရ။
ပ္ဍဲလက်ထက်ဒူတာတေတေံ ညးနုက်ပ္တိတ်လဝ်ဖဳလေတ်ဖေန် နူ ICC တုဲကီုလေဝ် ICC ဂှ်တှ်ေ အခေါၚ်စဳရေၚ်ဂဗုတ် လ္တူဖဳဖေတ်ဖေန်နွံဂှ် ဟီုလဝ်ရ။
အကြာဂြောဝ်ဂတာပရေၚ်ဍုၚ်ကွာန် ဍုၚ်ဖဳလေတ်ဖေန်ၜါလ္ပာ် အကြာသမ္မတလၟုဟ် မာကောသ်ဂှ်ကဵု ဒူတာတေတံ အခိၚ်ဒှ်ကၠုၚ်ပရေၚ်ဒိဓဗတ်ဆေၚ်မုက်တံ ဂၠိုၚ်ကၠုၚ်ဂှ် ဒူတာတေ ဒးဒုၚ်ရပ်လဝ်ရ။
ကောန်ညး သာရာဒူတာတေ ဒှ်ဒၟံၚ်ဒုသမ္မတလၟုဟ်ဂှ်လေဝ် ဟိုတ်နူဒ္ဂေတ်လီုစလာပ်၊ ဟိုတ်နူဘပဠကၠုၚ် ဒဒှ်မဂစိုတ်ဂယိုၚ်အာ မာကောသ် ကေုာံ ကောန်ရဲတဝ်ခွါညးဂမၠိုၚ်ဏောၚ်ဂှ်တုဲ ဒးဒုၚ်စောဲလဝ်ဂဗုတ်ရ။
ပရေၚ်ရပ်ဒက်ဒူတာတေဂှ်ဝွံ ဒှ်ပရေၚ်ကေတ်ကၠုၚ်ကၠာတဲ ပ္ဍဲပရေၚ်ဍုၚ်ကွာန်ရောၚ် ညးလ္ၚတ်ဂမၠိုၚ် သ္ဂးရ။
Ref: Agencies