မနဳလာ၊ မာတ် ၂၂
သတ္တာဟတုဲကၠုၚ်တေံ ရပ်ဒက်ကၠုၚ်သမ္မတတြေံ ရိုဝ်ဒရဳဂိုဝ် ဒူတာတေတုဲ သ္ကုတ်သွာတ်လဝ် သ္ဂောံလှဲပြံၚ်ကဵု ဇရေၚ်ရုၚ်သၞောဝ်ဓဝ်အမှုရာဇဝတ်ဍုၚ်နာနာ ICC တုဲ ပ္ဍဲဂိတုမာတ် ၂၀ တေံ အမာတ်ကၠတ်ထဝ်ဖဳလေတ်ဖေန် စၟဳတ်သၟာန်သၟုက်လဝ် သၞာဲဒဴအလဵုအသဳတံဂှ် ဝန်ဇၞော်သၞောဝ်ဓဝ် ကယျာန်ပါဲလဝ် ဒဒှ်ရဒစးဒုၚ်ပံၚ်တောဲလဝ်ဟွံမွဲရ။
ဒူတာတေဝွံ ပ္ဍဲဂိတုမာတ် ၁၁ တေံ ဒးဒုၚ်ရပ်လဝ်တုဲ ပ္ဍဲကဵုတ္ၚဲဂှ်ရ ဒးဒုၚ်ပလံၚ်ဏာလဝ် ICC ပ္ဍဲဍုၚ်ဒဳဟုက် ဍုၚ်နေဝ်တာလာန် နကဵုက္ၜၚ်ကျာရ။
စပ်ကဵုပရေၚ်ညးဗ္တိုက်သ္အးလဝ်ဂဥုဲၜူမာဲတုဲ ပ္ဍဲကဵုဏံ မၞိဟ်ဂၠိုၚ်ကဵုလ္ၚီ မ္ဒးချိုတ်အာလဝ်ဂှ်တုဲ ဒူတာတေ ဒးဒုၚ်ပ္တိုန်ရုၚ် စၟဳတ်ဒၟံၚ် နကဵုတၚ်စောဲစပ်အမှုရာဇဝတ် မကလိလောန်လဝ် လ္တူဂကူမၞိဟ်ရ။
အပ္ဍဲပရေၚ်စၟဳတ်စပ်ကဵုကၠတ်ထဝ် ပ္ဍဲဂိတုမာတ် ၂၀ ဂှ် ဝန်ဇၞော်သၞောဝ်ဓဝ် ဂျဳသာတ် ရဳမူလာ ဟီုပ္တိတ်ကၠုၚ်လဝ် နကဵုအလဵုအသဳမွဲ ကၠာဟွံဂွံဒုၚ်ကေတ်တဲဝါရာန်ရပ် နူကဵုအေန်တာပိုဝ် ဒပ်ဗၠာဲသၟိၚ်ဂၠးတိဂှ် ပရေၚ်ဆက်ဆောံ ကု ICC ဂှ်တှ်ေ ၜိုတ်ဓမ္မတာရဏောၚ်ဂှ် သ္ဂးရ။
ကၠာဟွံဂွံစိုပ်အကာဲအရာဏံဂှ် ပိုယ်တံ ဆက်စၠောံလဝ်ကဵု ICC ဗွဲမလုပ်သၞောဝ် ဟွံသေၚ်မ္ဂး ဗွဲပလးတံ ဟွံမွဲပုဟ်ဂှ် ဝန်ဇၞော် ရဳမူလာ ဟီုရ။
ပရေၚ်စၟဳတ်ကလၚ်ပၟိၚ်ဏံဂှ် အမာတ်ကၠတ်ထဝ် အဳမဳမာကောသ် မဒှ်သ္ကအ်ရဲဍုက်ကေဝ် ဒုသမ္မတဖဳလေတ်ဖေန် သာရာဒူတာတေ မဒှ်ကောန်ဝုတ်သမ္မတတြေံ ဒးဒုၚ်ရပ်လဝ်ဏံ အာတ်မိက်လဝ်ရ။
ဆ္ဂး အဳမဳမာကောသ် မဒှ်ဒေံသမ္မတမာကောသ်ဂှ်တှ်ေ ပရေၚ်ပံၚ်တောဲရေၚ်တၠုၚ် မဇြိုဟ်နက်တံ နွံလဝ်ရောၚ် ဟီုရ။
ယဝ်ဟီုကၠုၚ် ပံၚ်လဝ်တောဲကဵု အလဵုအသဳဖဳလေတ်ဖေန်နွံမ္ဂး ဆက်စၠောံကၠုၚ်လဝ် ဇရေၚ်ညးတံဟွံသေၚ်ဂှ်တုဲ ဒဒှ်ရမိက်ဂွံတီ ဆက်စၠောံကၠုၚ်လဝ် ဇရေၚ်ညးလဵုမွဲရောဟီုဂှ် ဝန်ဇၞော် ရဳမူလာ ဟီုရ။
ပ္ဍဲသၞာံ ၂၀၁၉ တေံ ကြဴနူဖဳလေတ်ဖေန် နုက်တိတ်နူ ICC တုဲဂှ် နကဵုအလဵုအသဳဖဳလေတ်ဖေန် ဒဒှ်ရပ္ဍဲညးဂၠိုက်ဂၠါဲစၟဳတ် ICC တံ အခေါၚ်စဳရေၚ်သၞောဝ်ဓဝ် ဟွံမွဲပုဟ်ဂးတုဲ တးပါဲကၠုၚ်လဝ် ပရေၚ်ပံၚ်တောဲတံ ဂၠိုၚ်ၚ်ကဵုဝါရ။
ဆ္ဂး ယဝ်ရအေန်တာပိုဝ် အာတ်မိက်ကၠုၚ် သ္ဂောံကေတ်ကဵုအရေဝ်မ္ဂး တာလျိုၚ်နွံဏောၚ်ဂးတုဲ တုဲကၠုၚ်ခြာဟွံလအ်တေံ သၞာဲဒဴအလဵုအသဳဂမၠိုၚ် ပြံၚ်လှာဲဟီုကၠုၚ်လဝ်အိုတ်ရ။
ဒုသမ္မတ သာရာဒူတာတဂှ်ေတှ်ေ အပါညးဒးဒုၚ်ရပ်လဝ်ဂှ်ဝွံ ဒှ်ပရေၚ်မဒးဒုၚ်ရပ်စပ်စကာ အပ္ဍဲရေၚ်ဍုၚ်ကွာန်ဏောၚ်ဂှ် ဟီုရ။
ဂြောဝ်ဂတာ ဒူတာတေကဵု မာကောသ်ၜါဏံ ပံၚ်တောဲတုဲ ဂွံဇၞးကၠုၚ်လဝ် ပ္ဍဲပေါဲရုဲမာဲသမ္မတ ၂၀၂၂ ဂှ်ဝွံ ပရေၚ်ဆက်ဆောံအကြာဂြောဝ်ဂတာညးတံ ဟွံပြေပြံၚ်ဒှ်ကၠုၚ်လဝ်တုဲ အလဵုသာရာဒူတာတေလေဝ် ဒးဆေၚ်ဒၟံၚ်မုက်ကဵု တၚ်စောဲစပ် အပ္ဍဲကၟိန်ဍုၚ် ဗွဲမဂၠိုၚ်ဂၠေၚ်ရ။
Ref: AFP