ဝါယှေန်တာန်၊ မာန် ၂၃
အလဵုအသဳထြာမ် စဳဇန်ဒၟံၚ် သ္ဂောံပၠောပ်ပ္တိုန်ခၟာဲစာၚ် နူတူရကဳကဵု ကိုဝ်ရဳယျာသၠုၚ်ကျာတုဲ ရန်တၟံကဵုၚုဟ်ဖျာဂွံတန် သွက်ညးဍုၚ်ကွာန်အမေရိကာန်တံဂှ်တုဲ သဳကၠဳဒၟံၚ် သီုကဵုဍုၚ်တၞဟ်သ္အာၚ်တံဏောၚ်ဂှ် ဂွံတီကေတ်ရ။
ဝန်ဇၞော်ပရေၚ်တဵုလွဳအမေရိကာန် ဗရုက်ရိုဝ်လေန် ဟီုလဝ်ကဵု အ္စာပရိုၚ်ဂမၠိုၚ် ပ္ဍဲသ္ၚိဗု ဒဒှ်ရညးတံ သဳကၠဳဒၟံၚ် သွက်ဂွံပၠောပ်ပ္တိုန်ခၟာဲစာၚ်ဂၠိုၚ်ကဵုမဳလျာန် သွက်အကာဲအရာပြဟ်ဟ်ဏံဂှ်ရ။
အခိၚ်အလဵုအသဳအမေရိကာန် လလောၚ်တြးလဝ် သ္ဂောံရပ်စပ်အာ ဒဝ်ဠာ ၁ ဗဳလျာန် သွက်ပရေၚ်ဗ္တိုက်သ္အးယဲဇွဟ်စာၚ်၊ ဂစေံဂှ်တုဲ နကဵုညးမလွဳတိရစ္ဆာန်ဂမၠိုၚ် ဒးဂစိုတ်ကၠေံလဝ် စာၚ်ကဵုလ္ၚီဂှ် အစဳဇန်သာ်ဏံ မံက်တိတ်ကၠုၚ်လဝ်ရ။
အခိၚ်သမ္မတထြာမ် စန်ဒက်မာဲတေံ ကဵုလဝ်ကတိ ၚုဟ်ဗၞိက်သ္ဒးစှ်ေဏောၚ်ကီုလေဝ် သၞာံတုဲကၠုၚ်တေံ ၚုဟ်ခၟာဲစာၚ် တိုန်ကၠုၚ်လဝ် ၆၅ တၟံကၠံတုဲ အပ္ဍဲသၞာံ ၂၀၂၅ ဏံ ၚုဟ်တိုန်ကၠုၚ် ၄၁ တၟံကၠံဏောၚ်ဂှ် စၟဳလဝ်ရ။
ဝန်ဇၞော် မေတ်သေတ်ရိုဝ်လေန်ဂှ်တှ်ေ နကဵုဌာနညး ဂွံဂွံဗၞိက်တၟိတၟိဂှ် သဳကၠဳဒၟံၚ် ကုဍုၚ်သ္အာၚ်တံရောၚ် ဟီုကီုလေဝ် သဳကၠဳဒၟံၚ် ကဵုဍုၚ်လဵု ဒေသလဵုရောဟီုဂှ်တှ်ေ ဟီုလဝ်သောဲသောဲဗြောဲဗြောဲဂှ် ဟွံမွဲရ။
နကဵုညးတံ အပ္ဍဲဍုၚ် ယဝ်ပရေၚ်ကၠောန်ပ္တိတ်ခၟာဲစာၚ်တံ ဇြဟတ်ခိုဟ်ကၠုၚ်မ္ဂး၊ ဇြဟတ်ဂွံခိုဟ်ကၠုၚ်ဂှ်လေဝ် စၟဳစလဝ်တုဲ ဟွံဒးပၠောပ်ပ္တိုန်ခၟာဲစၚ် နူဍုၚ်သ္အာၚ်တံရပုဟ်ဂှ် ဝန်ဇၞော် ရိုဝ်လေန် ဟီုကၠုၚ်ရ။
စပ်ကဵုသ္ဂောံပလံၚ်ပ္တိုန်ခၟာဲစာၚ်ဂှ်တုဲ ရုၚ်ကလုတ်အမေရိကာန် ဆက်စၠောံကၠုၚ်ကုညးတံဂှ် အလဵုအသဳပိုဝ်လာန် ကေုာံ အလဵုအသဳလေတ်တူနဳယျာ ဟီုလဝ် ပ္ဍဲဂိတုမာတ် ၂၁ တေံဂှ် ထ္မံက်ထ္ၜးလဝ် ပ္ဍဲပရိုၚ်အေအေပ်ပဳရ။
နကဵုအလဵုအသဳထြာမ် အခိၚ်ကံက်ဂလိုၚ်ပ္တိုန်ဒၟံၚ်အခေါန်ဖလှာ လ္တူဍုၚ်တၞဟ်ဟ်တံဂှ် ပ္တိတ်ဒၟံၚ်ဇြဟတ် ညံၚ်ၚုဟ်ခၟာဲစာၚ်ဂွံစှ်ေ သွက်ညးဍုၚ်ကွာန်အမေရိကာန်တံသာ်ဏံရ။
Ref: BBC