သဵု(လ်) ၊ မာတ် ၂၅
ရုၚ်သၞောဝ်ဓဝ်သၞောဝ်သ္ဇိုၚ်ဒက်ပ္တန်ဍုၚ် ကိုဝ်ရဳယျာသၠုၚ်ကျာ ရုပ်သီကၠေံ ဒုဟ်မစောဲစပ်လဝ် လ္တူသ္ကိုပ်ဝန်ဇၞော် ဟာန်ဒက်သူဂှ်တုဲ ကလေၚ်ခါန်ကၞက်ပ္တိုန်လဝ် နဒဒှ်သမ္မတယာယဳကၟိန်ဍုၚ်ရ။
သမ္မတယောန်သက်ယိုဝ် ဟိုတ်နူပ္တိတ်ကၠုၚ်ဇြဟတ် သ္ဂောံလလောၚ်တြးသၞောဝ်အုပ်ဓုပ်ပၞာန်ဂှ်တုဲ နူကဵုကၠတ်ထဝ် ဗဒေါအ်ကၠေံညး နူတာလျိုၚ်တုဲ စောဲလဝ်ဒုဟ်ဒဏ်တုဲဂှ် သ္ကိုပ်ဝန်ဇၞော် ဟာန် ကေတ်လဝ်တာလျိုၚ် နဒဒှ်က္ဍိုပ်သ္ကိုပ်ကၟိန်ဍုၚ် ပ္ဍဲဂိတုဒဳဇြေမ်ဗာတုဲကၠုၚ်တေံရ။
ဆ္ဂး ညးကေတ်လျိုၚ်တုဲ ဂွံၜိုတ်ၜါသတ္တာဟဂှ် နူကၠတ်ထဝ် စောဲစပ်ပ္တိုန်လဝ်ဒုဟ် ကုညးတုဲ ဒုသ္ကိုပ်ဝန်ဇၞော် ချဵုသာန်မအ် ဆက်ကေတ်လဝ်တာလျိုၚ်ရ။
ကြဴနူသမ္မတ ပ္တိတ်ကၠုၚ်ဇြဟတ် သ္ဂောံလလောၚ်တြး သၞောဝ်အုပ်ဓုပ်ပၞာန်တုဲဂှ် ပ္ဍဲကိုဝ်ရဳယျာသၠုၚ်ကျာ အကြေပ်အဂြတ်ပရေၚ်ဍုၚ်ကွာန် က္တဵုဒှ်ကၠုၚ်လဝ်ရ။
သ္ကိုပ်ဝန်ဇၞော် ဟာန် ဂွံဒုၚ်ခါန်ပ္တိုန် နဒဒှ်သမ္မတယာယဳတုဲဂှ် တာဒၞါလဝ် ပရေၚ်ခါန်ကၞက်ပ္တိုန် နာဲဗ္စာတၟိ ပ္ဍဲရုၚ်သၞောဝ်ဓဝ် သၞောဝ်သ္ဇိုၚ်ဒက်ပ္တန်ဍုၚ်ဂှ်ရ။
ဣဏံဝွံ ဒှ်ပွဒစးဒုၚ်စဵုဒၞါလဝ် ပရေၚ်တာဒၞါတၞဟ်သ္အာၚ် မက္တဵုဒှ်ကၠုၚ် လ္တူသမ္မတယောန်ဂှ်ဏောၚ်ဂှ် ချိၚ်ကေတ်ဂွံရ။
ဟာန်ဂှ်တှ်ေ ဒဒှ်ရတၚ်ဂုန် ဟိုတ်သ္ဂောံခါန်ကၞက်ပ္တိုန်လဝ်ညး နဒဒှ်က္ဍိုပ်သ္ကိုပ်ကၟိန်ဍုၚ်ယာယဳဂှ်ကီု၊ ညံၚ်ဂကောံအလဵုအသဳ ဂွံဂေတ်ဂြိပ် ဗွဲမပြေပြံၚ်မာန်ဂှ်လေဝ် ပ္တိတ်အာဇြဟတ်ဏောၚ်ဂှ် သ္ဂးလဝ်ရ။
ကၠတ်ထဝ် စောဲစပ်ပ္တိုန်ဒုဟ် ကုသမ္မတယောန်တုဲ စနူဂိတုဒဳဇြေမ်ဗာ ၁၄ တေံဂှ် ဗဒေါအ်ကၠေံလဝ် နူတာလျိုၚ်ညးကီုလေဝ် ရုၚ်သၞောဝ်ဓဝ်သၞောဝ်သ္ဇိုၚ်ဒက်ပ္တန်ဍုၚ် သ္ပဒတန်မှဟေၚ် ဒှ်အာပရေၚ်ဒးဒုၚ်ဗဒေါအ်ကၠေံနူလျိုၚ်ကွေံကွေံဏောၚ် မဒှ်ရ။
ယဝ်ရရုၚ်သၞောဝ်ဓဝ်ကၟိန်ဍုၚ် ရုပ်သီကၠေံ ဒုဟ်ဒဏ်မစောဲစပ်လဝ်လ္တူညးဂှ်မ္ဂး နကဵုညး ကလေၚ်ယိုက်ဂၠေၚ်တာလျိုၚ်သမ္မတ လွာဲဂှ်မာန်ရောၚ် မဒှ်ရ။
တ္ၚဲဖျေံစၟတ်ဒုဟ်ဒဏ် လ္တူသမ္မတယောန်ဂှ်တှ်ေ ရုၚ်သၞောဝ်ဓဝ် ဟွံလလောၚ်တြးလဝ်ကီုလေဝ် ပ္ဍဲဍုၚ်သဵု(လ်) ဂှ်တှ်ေ ညးထံက်ဂလာန်ကီု ညးဒစဵုဒစးကီု ပေါဲထ္ၜးဆန္ဒတံ အသိၚ်သၠုၚ်တိုန်ကၠုၚ်ဒၟံၚ်ရ။
Ref: BBC