ၜဳကလေၚ်၊ မာတ် ၂၅
ရုၚ်ဌာနက္ဍိုက်ပ်ပရေၚ်အုပ်ဓုပ်ကာနာန ပွိုၚ်ဍုၚ်ၜဳကလေၚ် တွဵုရးဍုၚ်မန် ဒးဒုၚ်ဗ္တိုက်ကဵုဒရုၚ်တုဲ ညးဍုၚ်ကွာန်ကောန်အရာပ်မွဲတၠ မအာကၠုၚ်ကွာ်မံၚ်ဂၠံၚ်ဂှ် ဒးအာကဝေက်မာၚ် ဇီုကပိုက်ကလိဂွံလဝ်ဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမာတ် ၂၄ အခိၚ်နူဂယး ၜိုတ် ၉ နာဍဳဂှ် ဒပ်ပၠန်ဂတးမွဲ ထောံဏာလဝ်မခတိုဟ် ဗ္တိုက်ဏာလဝ် ရုၚ်ဌာနက္ဍိုက်ပ်ပရေၚ်အုပ်ဓုပ်ကာနာန ပွိုၚ်ဍုၚ်ၜဳကလေၚ်ရ။
အပ္ဍဲပရေၚ်ဗ္တိုက်ဏံဂှ် မခတိုဟ်ဒရုၚ်မွဲမ ဒတုံဗ္တိုဟ်ထ္ကးအာလဝ် လ္တူတိုၚ်အလာံ ရုၚ်အုပ်ဓုပ်ဂှ်တုဲ ညးဍုၚ်ကွာန်ကောန်အရာပ်မွဲတၠ ဒဳကွဳလိုန်ဓာတ်တုဲ တတ်အာဂတမုက်ရုၚ်ဂှ် ဒးအာကဝေက်မာၚ် ပ္ဍဲဇိုၚ်ဂၞိၚ်တုဲ ကလိဂွံအာဝပ်ရ။
ညးဍုၚ်ကွာန်ကောန်အရာပ် ဇီုကပိုက်ကလိဂွံဝပ် ဒးအာလဝ်ကဝေက်မာၚ်ဂှ်တှ်ေ စုတ်ဂဥုဲ ပ္ဍဲရုၚ်ဂဥုဲညးဍုၚ်ကွာန်ပွိုၚ်ဍုၚ်ၜဳကလေၚ်တုဲ စဴအာဌာန်ဒၟံၚ်ညးဂှ် ညးဒေသမွဲတၠ ဂွံတီကေတ် ပရူဒဒှ်ဏံ လဴထ္ၜးလဝ်ရ။
ပ္ဍဲပွိုၚ်ဍုၚ်ၜဳကလေၚ်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံဂှ် စနူသၞာံဏံမံက်တုဲ ပရေၚ်ပၞာန်ၜါလ္ပာ် သာကြံၚ်မ္ၚိုဟ်ကၠုၚ်တုဲ လ္ပာ်ကံၚ်ဇြဳပၞာန်လေဝ် ပလေဝ်ပလေတ်ဒၟံၚ် သ္ဂောံထ္ပက်ကရောၚ်ပၞာန် နွံဒၟံၚ်ဂှ် ဂွံတီကေတ် အတိုၚ်ဂလာန် ညးတာလျိုၚ် ဂကောံဒပ်ပၠန်ဂတးတံရ။
ရုၚ်ဌာနက္ဍိုက်ပ်ပရေၚ်အုပ်ဓုပ်ကာနာန ပွိုၚ်ဍုၚ်ၜဳကလေၚ်ဂှ်ဝွံ အပ္ဍဲကာလသီအဝဵုဏံ ဒးဒုၚ်ဗ္တိုက်လဝ် ဟွံအောန်နူပန်ဝါတုဲ စမြိုၚ်ရုၚ်လ္ၚဵုတံ ဇီုကပိုက်ဒးလီုလာ်အာလဝ် နွံရ။
ပရိုၚ်−သြၚ်လောန်တိုၚ်(မ်)
ဗီု−CJ