လိုၚ်ဗၠဲ၊ မာတ် ၂၅
ဗ္ဒိုပ်ဒပ်ကံၚ်ဇြဳပၞာန် နွံပ္ဍဲကွာန်(ခလယ့်ဒေး) ဗ္ဒါဲပယျဵုသေံ−ဗၟာ ပွိုၚ်ဍုၚ်လိုၚ်ဗၠဲ တွဵုရးကရေၚ်ဂှ် စနူဂိတုမာတ် ၂၃ တေံတုဲ ဒပ်ပံၚ်ကောံပၠန်ဂတး သၟဝ်သ္ကိုပ်သ္ကဒပ်မဟာ ၇ KNLA တံ စကၟာတ်လဒဵုဗ္တိုက်ဒၟံၚ်ယျဂှ် တမ်ရိုဟ်ပရိုၚ်ပယျဵုဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒိုပ်(ခလယ့်ဒေး) မဒှ်ဗ္ဒိုပ်ဒပ်ကံၚ်ဇြဳပၞာန် နွံပ္ဍဲပွိုၚ်ဍုၚ်လိုၚ်ဗၠဲဂှ် စနူဂိတုမာတ် ၂၃ အခိၚ်နူဂယး ၜိုတ် ၁၀ နာဍဳဂှ်တုဲ ဒပ်ပၞာန်ဗၠးၜးကောန်ဂကူကရေၚ် KNLA, ဒပ်စဵုဒၞါကောန်ဂကူကရေၚ် KNDO ဒပ်ပံၚ်ကောံတံ ဗိုၚ်ကၟာတ်လဒဵုလဝ်တုဲ ထောံမခတိုဟ်ဗ္တိုက်ကဵုဒရုၚ်၊ ပန်ကၠုၚ်ဒၟံၚ် သီုကဵုသေနာတ်သနာ်ပါတံရ။
ဟိုတ်နူအကာဲအရာပေါဲဗ္တိုက်သီဗ္ဒိုပ် (ခလယ့်ဒေး) ဗ္ဒါဲပယျဵုဂှ်တုဲ ညးဍုၚ်ကွာန်ဒေသ ၁၀၀ ပြၚ် နူကဵုကွာန်(ခလယ့်ဒေး) ကဵု ကွာန်ဗ္ဒါဲဗ္ဒါဲဂမၠိုၚ်ဝွံ ဒးဂြိပ်ဒဴပါဲဒလေတ်ဒၟံၚ် လ္ပာ်ကွာန်(မဲဆောင်) ပွိုၚ်ဍုၚ်ထာတ်သံၚ်ယာတ် လ္ပာ်ဍုၚ်သေံဂှ်တုဲ ဒပ်ဂီုကၠီုသေံ အပ္ဍဲဒေသတံ ကဵုလဝ်အရီုဗၚ်မၚ်မွဲကဵုလဝ်ရောၚ် ဂွံတီကေတ် နူကဵုတမ်ရိုဟ်ပရိုၚ်ပယျဵုတံရ။
ဗ္ဒိုပ်ဒပ်ကံၚ်ဇြဳပၞာန် ဗ္ဒိုပ်ဒပ်(ခလယ့်ဒေး) ဏံဝွံ နွံဒၟံၚ်ဗ္ဒါဲပယျဵုသေံ−ဗၟာတုဲ ဖျေံလဝ်ဒပ်လေဝ် ကြပ်ပ်ကဵုဌာန်ဂအုပ်ဗဟဵု ဗော်သွးကောန်ဂကူကရေၚ် KNU ဂှ်တုဲ နူကဵုတရဴတိုက် ဒပ်ကံၚ်ဇြဳပၞာန် ဂွံကဵုအရီုဗၚ်ပၞာန် လ္ပာ်ဗ္ဒိုပ်ဏံဂှ် ဟွံလောဲသွာပုဟ်ဂှ် တမ်ရိုဟ်ပရိုၚ်အပ္ဍဲဒေသမွဲတၠ သ္ဂးရ။
နကဵုဒပ်ကံၚ်ဇြဳပၞာန် ရပ်စပ်ဒၟံၚ် ပရေၚ်ဗ္တိုက်ပၞာန်ကျာတံတုဲ ကဵုဒၟံၚ်ပၞာန်အရီုကီုလေဝ် ပ္ဍဲကဵုပေါဲဗ္တိုက်သီဗ္ဒိုပ်ပူလူတူ ပွိုက် ၁၂၄၈ ဂှ်လေဝ် ဒပ်ကံၚ်ဇြဳပၞာန် အကြာဘိုၚ်ပန်ကဵုလဝ်ပၞာန်ကျာဂှ် ဒပ်ပံၚ်ကောံ KNLA KNDO တံ သီဂွံလဝ် ဗ္ဒိုပ်တံဏံ သီုဖအိုတ်ရ။
နကဵုအရီုဗၚ်ပၞာန်ဗလးတိဂမၠိုၚ် ယဝ်ရပလံၚ်ကဵုပၞာန်အရီု ဇရေၚ်ဗ္ဒိုပ်ဒပ် (ခလယ့်ဒေး) ပယျဵုသေံဂှ်မ္ဂး ကြပ်အိုတ်ဂှ်တှ်ေ နူကဵုဗျူဟာပၞာန်ဖျေံသ္ဇိုၚ် ဍုၚ်( ရှမ်းရွာသစ်) ဂှ် ပလံၚ်ဗစိုပ်ကဵုမာန်ကီုလေဝ် ဟိုတ်နူဒပ်ပံၚ်ကောံ KNLA KNDO တံ ကၟာတ်လဒဵုဗ္တိုက်လဝ်တုဲ နူဗ္ဒိုပ်ဗျူဟာ(ရှမ်းရွာသစ်) ဏံ သွက်ဂွံပလံၚ်ဗစိုပ်ကဵုအရီုဗၚ်ပၞာန် နကဵုတရဴတိုက်ဂှ် ဟွံလောဲသွာပုဟ်ဂှ် တမ်ရိုဟ်ပရိုၚ်ပရေၚ်ပၞာန်မွဲတၠ သ္ၚဳဂၠိပ်လဝ်ရ။
ဂိတုဏံ ပ္ဍဲဂိတုမာတ် ၁၄ ဂှ် ဒပ်ပံၚ်ကောံ KNAL KNDO တံ ဗ္တိုက်သီဂွံလဝ်ဗ္ဒိုပ်ဒပ်ကံၚ်ဇြဳပၞာန် ဗ္ဒိုပ်ဖျေံသ္ဇိုၚ် ပူလူတူ ပွိုက် ၁၂၄၈ နွံပယျဵုသေံ−ဗၟာဂှ်တုဲ အပ္ဍဲပေါဲဗ္တိုက်သီဗ္ဒိုပ်ဂှ် ကောန်ဒပ်ကံၚ်ဇြဳပၞာန် ချိုတ်အာဗွဲမဂၠိုၚ်တုဲ ဂြိပ်တိတ်အာ လ္ပာ်ဍုၚ်သေံတံလေဝ် နွံလဝ်ရ။
ပေါဲဗ္တိုက်သီဗ္ဒိုပ်ပူလူတူ ပွိုက် ၁၂၄၈ တုဲ ဂွံပန်တ္ၚဲဂှ် နူဗ္ဒိုပ်ဗျူဟာပၞာန် ဖျေံသ္ဇိုၚ်ဍုၚ်( ရှမ်းရွာသစ်) ဂှ် ဒပ်ကံၚ်ဇြဳပၞာန် ကလေၚ်ပလန်တဲ ထောံမခတိုဟ်ဗ္တိုက်လဝ် သ္ၚိသ္ကိုပ်ဗိုလ်ဇၞော် သဝ်ဂျဝ်နဳ သ္ကိုပ်က္ဍိုက်ပ်ပၞာန် KNLA ပ္ဍဲဌာန်ဂအုပ်ဗဟဵု KNU နကဵုဒရုၚ်ဒုၚ်ချိုတ်ဂှ်ကီုလေဝ် ဇီုကပိုက်ဒးအာဂှ် ဟွံမွဲရ။
ကြဴနူဗ္ဒိုပ်ပူလူတူ ဒးဒုၚ်ဗ္တိုက်သီတုဲဂှ် ဒပ်ကံၚ်ဇြဳပၞာန်ဝွံ ကၠုၚ်စိုပ်ပလံၚ်ဗစိုပ်လဝ်ဇွောံမ နကဵုက္ၜၚ်ကျာသၞေၚ်ဝဲ ပ္ဍဲဗျူဟာ ဍုၚ်( ရှမ်းရွာသစ်) ပွိုၚ်ဍုၚ်လိုၚ်ဗၠဲဂှ်တုဲ ပလေဝ်ဒၟံၚ်ပၞာန်ဒုၚ်တံဂှ်လေဝ် ဂွံတီကေတ် အတိုၚ်တမ်ရိုဟ်ပရိုၚ်ဗလးတိတံရ။
သၞာံတုဲကၠုၚ် ပ္ဍဲသၞာံ ၂၀၂၄ ကြပ်အိုတ်တေံ ဗ္ဒိုပ်ဒပ်ကံၚ်ဇြဳပၞာန်သီုဖအိုတ် နွံပ္ဍဲဒေသမာနေဝ်ပဠဝ် မဒှ်ဒၞါဲဌာန်ဂအုပ်ဗဟဵုတြေံ KNU ဂှ် ဒပ်ပံၚ်ကောံ KNLA KNDO တံ ဗ္တိုက်သီဂွံလဝ်တုဲ ပ္ဍဲတိဍာ်ဒပ်မဟာ ၇ ဂှ်တှ်ေ အကြာဒပ်ကံၚ်ဇြဳပၞာန်ကဵု KNU ဂှ် ပရေၚ်ပၞာန်ၜါလ္ပာ် ကြံၚ်မ္ၚိုဟ်ကၠုၚ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ