မတ်မလီု၊ မာတ် ၂၅
ပ္ဍဲတွဵုရးဍုၚ်မန် ပ္ဍဲကဵုဒၞါဲဂေတ်ကၚ်အပ္ဍဲဍုၚ်ကဵု ပ္ဍဲပရေၚ်ဂီုကၠီုတံဂှ် စရပ်စပ်စကာကၠုၚ်ဒၟံၚ် ဂကောံဗ္တိုက်သရိုဟ်ပွပကီုပရာပ် ကေုာံ ဂီုကၠီုညးဍုၚ်ကွာန် မဒှ်ဂကောံကံၚ်ဇြဳပၞာန်တံ မဒက်ပ္တန်လဝ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ဂကောံဗ္တိုက်သရိုဟ်ပကီုပရာပ် ကေုာံ ဂီုကၠီုညးဍုၚ်ကွာန် ကံၚ်ဇြဳပၞာန် မရပ်စပ်စကာကၠုၚ်ဒၟံၚ်ဂှ်ဝွံ လ္တက်ကယျိုၚ်ယူနဳဝှမ်သာ်ဍီု ရပ်လဝ်လွဟ်တုဲ ဒၞါဲကံၚ်ဇြဳပၞာန် ဖျေံကဵုလဝ်တံဂှ် ဒးကေတ်လဝ်တာလျိုၚ်ဂီုကၠီုရ။
သ္အာၚ်နူဂှ်ပၠန် စၟဳတ်ဒၟံၚ် ပ္ဍဲဒၞါဲလုပ်တိတ်ဍုၚ်တံဂှ်ကီု၊ ဂေတ်ဂေၚ်စၟဳတ်ဒၟံၚ် အပ္ဍဲဍုၚ်ကီု၊ ဒးကေတ်ဂီုကၠီု ပ္ဍဲအသေအဟာန်တံသၟးဟွံက စနူစၟဳတ်စရၚ်ကၟုဲ အပ္ဍဲအကြာအရာပ်တံဂှ် ရပ်စပ်စကာကၠုၚ်ဒၟံၚ်ရ။
ညးဒေသတွဵုရးဍုၚ်မန်မွဲတၠဂှ်တှ်ေ အပ္ဍဲဒေသဂှ် ဂွံဆဵုကေတ်ကၠုၚ် ကောန်ဂကောံဗ္တိုက်သရိုဟ်ပွပကီုပရာပ်တံကဵု ဂီုကၠီုညးဍုၚ်ကွာန် ကံၚ်ဇြဳပၞာန် မဒက်ပ္တန်ကဵုလဝ်ဂှ် ဂၠိုၚ်ကၠုၚ်တုဲ လ္ပာ်ကံၚ်ဇြဳပၞာန် ဗီုပၟိက်စိုတ် ရပ်စပ်ကၠုၚ်ဒၟံၚ်ဂကောံတံဏံ သွက်ကဏ္ဍပရေၚ်ဂီုကၠီုတံဂှ်ရောၚ် ဟီုရ။
“နကဵုကယျိုၚ်သာ်ဍီု၊ တဆိပ်ပ္ဍဲတဲဂှ်တှ်ေ တဆိပ်ရုၚ်အလဵုအသဳတွဵုရးဍုၚ်မန်။ လ္ပာ်မွဲဂှ်တှ်ေ နကဵုမလိက် ပလကဖဂှ် အပ္ဍဲဗၞဳအဝန်ဂှ် ဂွံဆဵုကေတ်တဆိပ်ၜိုပ်။ လ္ပာ်ပိုယ်တံဂှ်တှ်ေ သၟတ်တံလေဝ်ပါ။ မၞိဟ်အဝဲလဒေါဝ်တံလေဝ်ပါဂှ် ဂွံဆဵုကေတ်ရ။ လဆောဝ်လဆောဝ် ဍေံတံကၟာတ်လဒဵုစၟဳတ် ကွဳလိုန်ဓာတ်တံ မုတံတှ်ေ ရပ်စပ်ဒၟံၚ်ဂကောံတံဏံရ။ အခိၚ်သှ်လိက် သွက်ဂီုကၠီုဂှ်တှ်ေ ရပ်စကာဒၟံၚ်ဂကောံဏံဂှ် ဂွံဆဵုကေတ်ရ။ ဂကောံဏံ ရပ်လဝ်လေံ(နံပါတ်တုတ်)တံ ကၟာၚ်တဲတံရ” သာ်ဝွံ သ္ဂးရ။
ကောန်ဂကောံဗ္တိုက်သရိုဟ်ပကီုပရာပ် ကေုာံ ဂီုကၠီုညးဍုၚ်ကွာန် ကံၚ်ဇြဳပၞာန် မဒက်ပ္တန်ကဵုလဝ်ဂှ်ဝွံ လဆောဝ်လဆောဝ် ဂွံပရိုၚ်တုဲ ဒၞါဲဒးဂၠါဲ အကြာကွာန်၊ အကြာအရာပ်တံဂှ် ဒးကေတ်ဒၟံၚ်ဂီုကၠီု ကုကံၚ်ဇြဳပၞာန်လေဝ် နွံဒၟံၚ်ရောၚ် ညးဆက်ဟီုရ။
ဂကောံဗ္တိုက်သရိုဟ်ပွပကီုပရာပ် ကေုာံ ဂီုကၠီုညးဍုၚ်ကွာန်တံဝွံ ဒက်ပ္တန်လဝ် သွက်ဂွံစဵုဒၞါ ဒတုဲမြမောဝ်က္ဍိုပ်သ္ကိုပ်ပၞာန်တံဂှ်ဏောၚ်တုဲ သွက်ဂွံကဵုဒဒိုက် ကုညးဍုၚ်ကွာန် နနဲနာနာသာ်တုဲ ဒှ်ဂကောံဒက်ပ္တန်လဝ်သက်က်မွဲရဏောၚ်ဂှ် ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF နာဲနဂါ ပါ်ပါဲလဝ်ရ။
ဟိုတ်ဂှ်ရ ပရေၚ်ချဳဒရာၚ်ဂကောံဗ္တိုက်သရိုဟ်ပကီုပရာပ် ကေုာံ ဂီုကၠီုညးဍုၚ်ကွာန်တံဂှ် နကဵုညးဍုၚ်ကွာန်တံ သွက်ဂွံကဵုပရိုၚ် ဇရေၚ်ဂကောံပၠန်ဂတးတံအိုတ်ညိဂှ် နာဲနဂါ ဖ္တိုက်ဖ္အောဝ်လဝ်ရ။
“ ဂကောံဗ္တိုက်သရိုဟ်ပွပကီုပရာပ် ကေုာံ ဂီုကၠီုညးဍုၚ်ကွာန်ဏံဝွံ ဖျေံလဝ်ဗ္ဒိုပ် သိုၚ်လဝ်သၞေဟ်ကၚ် ဗ္ဒိုပ်ကၚ်တံ လ္တူဂၠံၚ်ညးဍုၚ်ကွာန်တံ အာကၠုၚ်မံၚ်ဂှ်တုဲ စကဵုဒၟံၚ်ဒဒိုက်ကဵု ညးဍုၚ်ကွာန်တံယျ။ ဒးကဵုဒၟံၚ်အကံက်အခေါန်တံယျဂှ်လေဝ် ပရိုၚ်ဏံဂှ် ပိုယ်တံ ဂွံမိၚ်ကေတ်ရ။ ဟိုတ်ဂှ်ရ နကဵုညးဍုၚ်ကွာန်ဂမၠိုၚ် ဒးဒစဵုဒစးအာဏောၚ်။ သာ်လဵုဒးဒစဵုဒစးရောဟီုဂှ်တှ်ေ ပံၚ်တောဲကဵုဂကောံပၠန်ဂတး ကေုာံ ညးဍုၚ်ကွာန်တံတုဲ သွက်ဂွံကဵုပရိုၚ် ပရေၚ်ချဳဒရာၚ်ဍေံတံဂှ် ပိုယ်တံ မိက်ဂွံဖ္တိုက်ဖ္အောဝ်ရ။ တာလျိုၚ်သှ်ေတံဂှ်တှ်ေ ဂကောံပၠန်ဂတးပိုယ်တံ ဆက်တုဲဂွံကေတ်အာဏောၚ်” သာ်ဝွံ သ္ဂးရ။
ဂကောံဗ္တိုက်သရိုဟ်ပွပကီုပရာပ် ကေုာံ ဂီုကၠီုညးဍုၚ်ကွာန်တံဝွံ ဒှ်ဂကောံသၟဝ်တဲကံၚ်ဇြဳပၞာန်တံဂှ်တုဲ ကေတ်အာအရေဝ် ပိုတ်တ်သ္ကုတ်တ်ဏောၚ်တုဲ ပရေၚ်ပံၚ်တောဲညးဍုၚ်ကွာန်တံဂှ်လေဝ် ပၟိက်ဇၞော်ရောၚ် ညးဆက်ဟီုရ။
ကံၚ်ဇြဳပၞာန်ဝွံ စဒက်ပ္တန်ကၠုၚ်လဝ် ဂကောံကောပ်ကာဲကဆံၚ်ဗဟဵု ပရေၚ်ဗ္တိုက်သရိုဟ်ပွပကီုပရာပ် ကေုာံ ဂီုကၠီုညးဍုၚ်ကွာန်ဏံ သၞာံတုဲကၠုၚ် ပ္ဍဲဂိတုအဝ်ဂါတ် ၁၆ တေံဂှ်တုဲ ကြဴနူဂှ်တုဲ ဒက်ပ္တန်ကၠုၚ်လဝ် ဂကောံတံဏံ သီုနေဗျဳဒဝ်၊ ရးဒေသဇၞော်၊ တွဵုရး၊ ခရိုၚ်၊ ပွိုၚ်ဍုၚ် ကေုာံ အရာပ်၊ စဵုကဵုကွာန်တံရ။
ကံၚ်ဇြဳပၞာန်ဂှ်တှ်ေ ကုကောန်ဂကောံဗ္တိုက်သရိုဟ်ပွပကီုပရာပ် ကေုာံ ဂီုကၠီုညးဍုၚ်ကွာန်တံဂှ် ကဵုတန်ဗ္တောန်ကွတ်ပၞာန်ကီု၊ ဗ္ဂပ်ကဵုလွဟ်ကီု၊ ထံၚ်ပၚ်ပလံၚ်ဗစိုပ် ကေုာံ သွက်ဂွံကဵုတာလျိုၚ် ဂွံရီုဗၚ်ဟံၚ်ပြာ်ပ္တိတ် ကောန်ဒပ်ကလိဂွံဝပ်တံဂှ်တုဲ ဒက်ပ္တန်လဝ်ရောၚ် သ္ဂးလဝ်ရ။
သ္အာၚ်နူဂှ်ပၠန် ဂွံလုပ်ပေါဲဗ္တိုက် ဗွဲမစိုပ်တရဴဂှ် ပ္ကတ်ပ္ကေၚ်ကဵုနဲဗျူဟာ မကိတ်ညဳကဵု အကာဲအရာတံဂှ်ကီု၊ ကဵုကၠုၚ်တာလျိုၚ်ဂီုကၠီုတိဍာ် ကေုာံ ပရေၚ်စဵုဒၞါ ကုကောန်ဒပ်တံဂှ်သၟးဟွံက စဵုကဵုဂွံကဵုတာလျိုၚ် ပ္ဍဲမုက်ပၞာန်တေံဂှ် ရန်တၟံလဝ်ရ။
ဂကောံပၠန်ဂတးမန်ဂမၠိုၚ် ကံၚ်ဇြဳဖေဝ်ဒရာဍုၚ်မန် ဌာနကာစဵုဒၞါ MSFC-DoD ၊ ဒပ်ပၠန်ဂတးဍုၚ်မန် MSRF ကေုာံ ဒပ်စဵုဒၞါဍုၚ်မန် MSDF တံဂှ်တှ်ေ ပ္ဍဲကဵုဂကောံဗ္တိုက်သရိုဟ် ပွပကီုပရာပ် ကေုာံ ဂီုကၠီုညးဍုၚ်ကွာန် နူကဵုကံၚ်ဇြဳပၞာန် မဒက်ပ္တန်ကဵုလဝ်ဂှ် ညံၚ်ညးဍုၚ်ကွာန်တံ ဟွံဂွံပါလုပ်ဂှ် သၞာံတုဲကၠုၚ် ပ္ဍဲဂိတုသေပ်တေမ်ဗာ ၂ တေံ ကဵုလဝ်သတိရ။
ပ္ဍဲတွဵုရးဍုၚ်မန်ဂှ်တှ်ေ ကောန်ဂကောံဗ္တိုက်သရိုဟ်ပွပကီုပရာပ် ကေုာံ ဂီုကၠီုညးဍုၚ်ကွာန်တံဝွံ ညးအာယုက်မၞုံ အကြာ ၃၅ ကဵု ၆၅ သၞာံ အကြာအရာပ်၊ အကြာကွာန်တံ မပ္တံကဵုကောန်ပၞာန်ရာံတိတ်၊ ဗၠာဲသၟိၚ်ဒေါအ်ဇူ၊ ညးထံက်ဂလာန်ဒပ်ပၞာန်၊ ကောန်ဗော်ကျခိုၚ်ယျေ၊ ကောန်ဂကောံ (မဘသ)၊ ကောန်ဗော် နူကဵုဗော်ပရေၚ်ဍုၚ်ကွာန် ထံက်ဂလာန်ပရေၚ်ပၞာန်သီအဝဵုတံလေဝ် ပါလုပ်ဂှ် ညးဒေသတံ ဟီုအိုတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ