နေဗျဳဒဝ်၊ မာတ် ၂၅
ပ္ဍဲကဵုကောံဓရီု BIMSTEC ဂကောံပံၚ်တောဲရေၚ်တၠုၚ် ခလံက်ၜဳဗၚ်ဂါ မရနုက်ကဵု ၆ ဝါ ဍုၚ်သေံသ္ကိုပ်သ္ကကၠောန်ဗဒှ်အာ ပ္ဍဲဂိတုဨပရဴဏံဂှ် ကော်ဘိက်လဝ် က္ဍိုပ်သ္ကိုပ်ပၞာန်ဗၟာရောၚ် ပရိုၚ်သေံလ္ၚဵုတံ ထ္မံက်ထ္ၜးလဝ်ရ။
ကောံဓရီုဏံ မကၠောန်ဗဒှ်အာ နူဂိတုဨပရဴ စၟတ်တ္ၚဲ ၃ စဵုကဵု စၟတ်တ္ၚဲ ၄ ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဂွံတိုန်စိုပ်အာနွံဒၟံၚ်တုဲ အပ္ဍဲအခိၚ်သီလဝ်အဝဵုဏံ သ္ဂောံကၠုၚ်စိုပ်ဍုၚ်သေံ အလန်ပထမကိုပ်ကၠာအိုတ် နွံဒၟံၚ်ရ။
ပ္ဍဲကဵုဂကောံပရေၚ်ပံၚ်တောဲ ပ္ဍဲအရာနဲကွတ်ပညာ ကေုာံ ပရေၚ်ပိုန်ဒြပ် ဍုၚ်မၞုံအပ္ဍဲဒေသခလံက်ၜဳဗၚ်ဂါ BIMSTEC ဂှ် ဍုၚ်သေံ၊ ဍုၚ်ဗၟာ၊ ဍုၚ်သဳရိလၚ်္ကာ၊ ဍုၚ်ဗေန်ဂလာဒေတ်၊ ဍုၚ်နဳပဝ် ကေုာံ ဍုၚ်ဗူတာန်တံ ပါလုပ်တုဲ ကော်ဘိက်လဝ် က္ဍိုပ်သ္ကိုပ်ဍုၚ် မလုပ်ဂကောံတံဂှ်ရ။
ဥူအံၚ်ကျဝ် ညးချဳဒရာၚ်ပရေၚ်သၟာကမၠောန်စိုပ်ဍုၚ်သေံဂှ်တှ်ေ ဍုၚ်လဵုမွဲမှ ဟွံသ္ပလဝ်စၟတ်သမ္တီ ကုဒပ်ပၞာန်သီအဝဵု နဒဒှ်အလဵုအသဳလုပ်သၞောဝ် ဍုၚ်ဗၟာဂှ်တုဲ ဒဒှ်မကော်ဘိက်ကၠုၚ်သာ်ဏံဂှ်ဝွံ ဟွံဒးရးပုဟ်ဂှ် ညးဟီုလဴလဝ် လညာတ်ညးရ။
“ဍာံဍာံဂှ်တှ်ေ ဒပ်ပၞာန်သီလဝ်အဝဵု ပန်သၞာံပြၚ်ကၠုၚ်ယျ။ အကြာအကာဲအရာသာ်ဏံဂှ် ဍုၚ်လဵုမွဲမှ သ္ပလဝ်စၟတ်သမ္တီ နဒဒှ်အလဵုအသဳလုပ်သၞောဝ် ဍုၚ်ဗၟာဂှ် ဟွံမွဲပုဟ်။ တုဲပၠန် အခိၚ်အခါညးဍုၚ်ကွာန်တံလေဝ် ဒှ်ဒၟံၚ်ဒဒိုက် ဗွဲမလောန်ဂှ် ကော်ပၠောပ်နၚ် ပ္ဍဲဗွိုၚ်ဍုၚ်သ္အာၚ်တံသာ်ဏံဂှ်တှ်ေ ဒှ်ဟွံထေက်ပုဟ်ဂှ် မိက်ဂွံသ္ၚဳဂၠိပ်ဏာရ” သာ်ဝွံ သ္ဂးရ။
နကဵုက္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် အပ္ဍဲပၞာန်သီအဝဵုပွိုၚ်ပန်သၞာံပြၚ်ဏံ ကၟိန်ဍုၚ်အပ္ဍဲဒေသတံ ကော်ဘိက်ကၠုၚ်လဝ် နဒဒှ်တရဴဍုၚ်သ္အာၚ်ဂှ် ဟွံမွဲကီုလေဝ် ဍုၚ်ကြုက်၊ ဍုၚ်ရုယှာ ကေုာံ ဍုၚ်ဗဴလာရုသ်တံ ကော်ဘိက်ကၠုၚ်လဝ်ဂှ် နွံရ။
အပ္ဍဲလၟေၚ်တရဴအာစိုပ်လဝ်ဍုၚ်ဗဴလာရုသ်ဂှ် က္ဍိုပ်သ္ကိုပ်ပၞာန် ဟီုပ္တိတ်ကၠုၚ်လဝ် ဒဒှ်ရစဳဇန်လဝ် သ္ဂောံကၠောန်ဗဒှ်အာပေါဲရုဲမာဲ ပ္ဍဲကၞောတ်သၞာံဏံ ဟွံသေၚ်မ္ဂး သၞာံဂတတေံမံက်ဂှ်တုဲဂှ် လၟေၚ်တရဴဍုၚ်သေံဏံ မံက်တိတ်ကၠုၚ်လဝ်ရ။
မွဲလ္ပာ်ဂှ်ပၠန် နူကဵုရုၚ်သၞောဝ်ဓဝ်ရာဇဝတ်ဍုၚ်သ္အာၚ် ICC ပ္တိတ်လဝ်ဝါရာန်ရပ်ဂှ် ဒးဒုၚ်ပၠောပ်လဝ်စရၚ်ယၟုတုဲ နူရုၚ်သၞောဝ်ဓဝ်ဍုၚ်အာဂျေန်တဳနာဂှ်လေဝ် ပ္တိတ်လဝ်ဝါရာန်ရပ် ကုက္ဍိုပ်သ္ကိုပ်ပၞာန် ကေုာံ သ္ကိုပ်ဗိုလ်ပၞာန် ၂၃ တၠရ။
အကာဲအရာဒှ်ဒၟံၚ်သာ်ဏံဂှ် ယဝ်က္ဍိုပ်သ္ကိုပ်ပၞာန် ဒှ်တိုန်စိုပ်ကောံဓရီု BIMSTEC ဂှ်မ္ဂး ဟိုတ်နူမဟာမိတ်ပရေၚ်ပၞာန် အကြာဒပ်ပၞာန်ၜါဍုၚ်ဂှ်တုဲ ဒပ်ပၞာန်သေံ ကဵုလဝ်တၚ်ဒုၚ်လျိုၚ်ပရေၚ်ဂီုကၠီုဏောၚ်ဂှ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ် သ္ၚဳဂၠိပ်လဝ်ရ။
“ ဒပ်ပၞာန်ဍုၚ်ဗမာ၊ ကံၚ်ဇြဳပၞာန် ကဵု ဍုၚ်သေံဂှ်ဝွံ ဒက်လဝ်မဟာမိတ်ပရေၚ်ပၞာန်လၟိုန်ရဏောၚ်။ ဟိုတ်ဂှ်ရ ပ္ဍဲဍုၚ်သေံ ယဝ်အလဵုအသဳကောန်အရာပ်တိုန်မ္ဂးလေဝ် ဒပ်ပၞာန်သေံကဵု ဒပ်ပၞာန်ဗၟာဂှ်တှ်ေ ဆက်ဆောံပံၚ်ဒၟံၚ်ညးသ္ကအ် ညံၚ်ရဴကောဒေံအရၚ်ဏောၚ်။ ဒှ်သာ်ဂှ်ရ မေန်အံၚ်လှာၚ် ဂံၚ်အာဍုၚ်သေံဏောၚ်ဂှ် ပိုယ်တံ ဒုၚ်ဂိုၚ်ကေတ်ရ။ ဆ္ဂး ဍုၚ်သေံဂှ်တှ်ေ ကဵုဍုၚ်ယူရောပ် ဍုၚ်အမေရိကာန်တံဂှ်လေဝ် ပရေၚ်ဆက်ဆောံဍုက်ကေဝ်တံ နွံဒၟံၚ်ဏောၚ်။ အေ ဂှ်တှ်ေ မေန်အံၚ်လှာၚ် အာဍုၚ်သေံဏောၚ်ဟီုဂှ် ရံၚ်ကဵုဂီုကၠီုမ္ဂး ဗီုတ္ၚဲဏံ သၟဝ်အလဵုအသဳကောန်အရာပ်ဂှ် တၚ်ဒုၚ်လျိုၚ်ခိုၚ်ၚ်ကၠိုက်က်ဂှ် ဟွံမွဲအှ်ေပုဟ်။ ဆ္ဂး ဟိုတ်နူဒပ်ပၞာန်သေံ ဒုၚ်ကဵုလျိုၚ်တုဲ အာဏောၚ်ဂှ်လေဝ် အဲချိၚ်ခယျကေတ်ရ” သာ်ဝွံ သ္ဂးရ။
စပ်ကဵုလၟေၚ်တရဴက္ဍိုပ်သ္ကိုပ်ပၞာန် အာစိုပ်ဍုၚ်သေံ သွက်ကောံဓရီု BIMSTEC မရနုက်ကဵု ၆ ဝါဂှ်တုဲ လ္ပာ်ကံၚ်ဇြဳပၞာန်ဂှ်တှ်ေ ပြဟ်ဟ်ဏံ လလောၚ်ပ္တိတ်ကဵုလဝ်သမ္တီဂှ် ဟွံမွဲဏီရ။
ကောံဓရီုဏံဝွံ သ္ကိုပ်ဝန်ဇၞော်လၟုဟ် ဗဴဓံၚ်ဓာန် ကေတ်လျိုၚ်နဒဒှ်သဘာပတိ အလန်ကိုပ်ကၠာတုဲ ကၠောန်ဗဒှ်အာဏောၚ်တုဲ က္ဍိုပ်သ္ကိုပ်ဍုၚ်မလုပ်ဂကောံဏံဂမၠိုၚ် တိုန်စိုပ်အာဏောၚ် မဒှ်ရ။
စဒက်ပ္တန်လဝ် ဂကောံ BIMSTEC ပ္ဍဲသၞာံ ၁၉၉၇ ပ္ဍဲဍုၚ်ၜၚ်ကံက် ဍုၚ်သေံတုဲ ရန်တၟံလဝ် သွက်ဂွံသၠုၚ်ပ္တိုန် ပရေၚ်ပံၚ်တောဲရေၚ်တၠုၚ်ပ္ဍဲအရာပရေၚ်ပိုန်ဒြပ် အကြာဍုၚ်ဇိုၚ်ဝုတ်ဒိုဟ် မဆက်စပ်ဒၟံၚ်ကဵုခလံက်ၜဳဗၚ်ဂါရ။
ပရိုၚ်−သြၚ်လောန်တိုၚ်(မ်)
ဗီု−Social Media