ဝါယှေန်တာန်၊ မာတ် ၂၆
ပ္ဍဲဂိတုမာတ် ၂၄ တေံ သ္ၚိဗု ဟီုကၠုၚ် ဒဒှ်ရသၞာဲဒဴအလဵုအသဳထြာမ် ပလံၚ်ဗစိုပ်ဒးလိက်ဗၠေတ်အာ ပ္ဍဲကဵုဂရုပလံၚ် message အ္စာပရိုၚ်မွဲတၠ မပါဒၟံၚ်ဂှ် ပလံၚ်ဒးအာ ပရူအစဳဇန် အမေရိကာန် သ္ဂောံဗ္တိုက်အာဂကောံဟူတဳ မဟာမိတ်အဳရာန် နွံပ္ဍဲဍုၚ်ယဳမေန်ဂှ်ရ။
ဣဏံဝွံ ဒှ်ပွဖံက်ပ္ကဝ်သၞောဝ်ဂီုကၠီုကၟိန်ဍုၚ်အမေရိကာန်ဏောၚ် အမာတ်ဒဳမဝ်ကရေတ်တံ ဟီုလဝ်တုဲ နူကဵုကၠတ်ထဝ် သွက်ဂွံဂၠိုက်ဂၠါဲစၟဳတ်ဂှ် နွံပၟိက်ရောၚ် ဟီုလဝ်ရ။
သ္ကိုပ်အေဝ်ဒဳတာ ဌာန်ပရိုၚ် The Atlantic ဂျက်ဖရဳ ဂိုဝ်ဗက်ဂှ်တှ်ေ ဟွံထေၚ်လဝ်မွဲသာ် ဒးဒုၚ်ကော်ဘိက်ပၠောပ် ပ္ဍဲကဵုဂရု Signal မသဳကၠဳပရူအစဳအဇန် အမေရိကာန် သ္ဂောံဗ္တိုက်ဂကောံဟူတဳဂှ် ဟီုလဝ် ပ္ဍဲဂိတုမာတ် ၂၄ တေံရ။
ဂကောံဟူတဳ ဗ္တိုက်ဒၟံၚ် က္ၜၚ်မတတ်အာကၠုၚ်ၜဳဗ္တေတ်ဂှ်တုဲ အလဵုအသဳထြာမ် စနူဂိတုမာတ် ၁၅ တုဲ ဗ္တိုက်ဒၟံၚ်ပွန်ဂကောံဏံ နွံပ္ဍဲယဳမေန်ဂှ်ရ။
နကဵုအဳရာန် မထံက်ပၚ်ကဵုဒၟံၚ် ဂကောံဟူတဳဂှ်တှ်ေ သွက်ဂွံဒေါအ်ဒေၚ်ကၠေံ ပရေၚ်ထံက်ပၚ်ဒၟံၚ်တံဂှ် နွံပၟိက်ဒၟံၚ်ရောၚ် သမ္မတထြာမ် ကဵုလဝ်သတိရ။
ကၠာပရေၚ်ဗ္တိုက်ဟွံဂွံစဏီ ဝန်ဇၞော်ကာစဵုဒၞါအမေရိကာန် ပါ်ပရအ်ဏာလဝ် အစဳဇန်ပရေၚ်ဗ္တိုက်ဗွဲလစှ်ေ ပ္ဍဲဂရုပလံၚ်လိက်ဂှ်ရ။
ပ္ဍဲအရာပါ်ပရအ်သာ်ဏံဂှ် ပရူပွန်ကေုာံပရူလွဟ် အမေရိကာန် မရပ်စပ်စကာအာတံ ပါလုပ် သောဲသောဲဗြောဲဗြောဲရ။
ပ္ဍဲကဵုဂရုဏံဂှ် ဒုသမ္မတအမေရိကာန် ဂျေဒဳဗာန်၊ ဝန်ဇၞော်ကာဍုၚ်သ္အာၚ် မာကိုဝ် ရူဗဳယိုဝ်၊ သ္ကိုပ်စၞောန်ပ္ညုၚ်သဳအိုၚ်အေ ဂျောန်ရက်ဝှာတ် ကလေဖ်၊ သ္ကိုပ်စၞောန်ပ္ညုၚ် ထံၚ်ပရိုၚ်ကောန်ဂကူ ဂါတ်ဗာတ်၊ ဇၞော်သ္ကိုပ်သ္ၚိဗု ကေုာံ သၞာဲဒဴကဆံၚ်လ္တူတံလေဝ် ပါလုပ်ရ။
ထြာမ်ဂှ်တှ်ေ ဒဒှ်ရညးဟွံဂွံပဒးသတိ ပရူဒဒှ်ဏံဂှ် ဟီုလဝ်ကဵုအ္စာပရိုၚ်ဂမၠိုၚ် ပ္ဍဲကဵုသ္ၚိဗုရ။
ဝန်ဇၞော်ကာစဵုဒၞါဂှ်တှ်ေ ဒဒှ်ရညးဟွံဂွံပါ်ပရအ်လဝ် အစဳဇန်ပေါဲပၞာန် ပ္ဍဲကဵုဂရုပလံၚ်လိက်ဏံဂှ်ပုဟ်ဂှ် ကယျာန်ပါဲလဝ်ကီုလေဝ် သ္ကိုပ်အေဝ်ဒဳတာ ဌာန်ပရိုၚ် The Atlantic ဂျက်ဖရဳ ဂိုဝ်ဗာတ်ဂှ်တှ်ေ ဣဏံဝွံ ဒှ်ပွလီဠာန်ဟီုဂးဒၟံၚ်ရောၚ် ခၠေဝ်ကၠုၚ်လဝ်တုဲ ပ္ဍဲကဵုဂရုဂှ် အကံက်ညးလေဝ်ပါလုပ်ဒၟံၚ်တုဲ ဂွံတီကေတ်လဝ် အစဳဇန်ပေါဲပၞာန် သောဲသောဲဗြောဲဗြောဲဂှ်ရောၚ် ဟီုရ။
Ref: Reuters