တၞၚ်သဳ၊ မာတ် ၂၆
ရးတၞၚ်သဳ ပွိုၚ်ဍုၚ်တၞၚ်သဳ ဗ္ဒါဲကွာန်ချံၚ်လမု ကၠအ်သတ်ဗြဴကၠေၚ်မွဲ ဒးဒုၚ်ထောံမခတိုဟ်ဗ္တိုက်ကဵုက္ၜၚ်ကျာတုဲ ကောန်ကလောန်ၜါတၠ ချိုတ်တုဲ ပန်တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ဒပ်ပၠန်ဂတးတံရ။
ဒပ်ကံၚ်ဇြဳပၞာန်ဝွံ တုဲကၠုၚ်ပ္ဍဲဂိတုမာတ် ၂၄ အခိၚ်ဇိုၚ်သဝ်တ္ၚဲ ၜိုတ် ၄ နာဍဳဂှ် ထောံလဝ်မခတိုဟ် ဗ္ဒါဲကွာန်ချံင်လမု နကဵုက္ၜၚ်ကျာၜါဝါတုဲ ဒတုံဗ္တိုဟ်ထ္ကးအာလဝ် ဗ္ဒါဲသ္ၚိတာဲကောန်ကလောန် ကမ္မဏဳသတ်ဗြဴကၠေၚ် ကျော်မော်−၁၉ ရ။
ဟိုတ်နူပရေၚ်ဗ္တိုက်ပၞာန်ကျာဂှ်တုဲ ကောန်ကလောန်သတ်ဗြဴကၠေၚ် မၞိဟ်တြုံၜါတၠ ချိုတ်တုဲ မၞိဟ်တြုံပိတၠ ကဵု မၞိဟ်ဗြဴမွဲတၠ ဇီုကပိုက်ကလိဂွံလဝ်ဝပ်ရောၚ် သ္ဂးရ။
ပရေၚ်ဗ္တိုက်ပၞာန်ကျာ ကံၚ်ဇြဳပၞာန်ဂှ်ဝွံ ခယျကေတ် ဒပ်ပၠန်ဂတးတံ နွံတုဲ ကၠောန်ဏာလဝ်ရောၚ် ညးတာလျိုၚ် ဒပ်စဵုဒၞါညးဍုၚ်ကွာန်ခရိုၚ်ဗိက်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူပရေၚ်ထောံမခတိုဟ်ဂှ်တုဲ ရေၚ်သ္ၚိတာဲကောန်ကလောန်ဂှ် သရိုဟ်စှ်ေအာတုဲ ကောန်ကလောန်သတ်ဗြဴကၠေၚ် ပွဳပွူ ၅၀ တၠဝွံ ဒးဆုဲပြံၚ်မံၚ်ဒၟံၚ်ဒၞါဲရောၚ် သ္ဂးရ။
ပ္ဍဲဂိတုမာတ် ၃ တုဲကၠုၚ်တေံလေဝ် ဟိုတ်နူဒပ်ကံၚ်ဇြဳပၞာန် ထောံမခတိုဟ်ဗ္တိုက်ကၠုၚ် ပ္ဍဲကွာန်တမဳလှ ပွိုၚ်ဍုၚ်တၞၚ်သဳဂှ်တုဲ ကောန်ၚာ်သၟတ်ၜါတၠ မပါလုပ် ညးဍုၚ်ကွာန်ကောန်အရာပ် ပိတၠ ဇီုကပိုက်ကလိဂွံလဝ်ဝပ်တုဲ သ္ၚိထပှ်မ လီုလာ်အာလဝ်ရ။
ပ္ဍဲကဵုပွိုၚ်ဍုၚ်တၞၚ်သဳ ပ္ဍဲကွာန်(သိန်းခွန်၊ ချောၚ်းလမု၊ ချောၚ်းနှစ်ပေါက်) တံဂှ် ပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ် နူဂိတုမာတ် ၁၃ စဵုကဵု ဂိတုမာတ် ၂၄ ဂှ်တုဲ အပ္ဍဲမွဲသတ္တာဟ လ္ပာ်ကံၚ်ဇြဳပၞာန် ဗ္တိုက်ကၠုၚ်လဝ်ကဵုပၞာန်ကျာ ဟွံအောန်နူကဵုထပှ်ဝါရ။
ပရိုၚ်−သြၚ်လောန်တိုၚ်(မ်)
ဗီု−CJ