လိုၚ်ဗၠဲ၊ မာတ် ၂၆
ဗ္ဒိုပ်(ခလယ့်ဒေး) နွံဗ္ဒါဲပယျဵုသေံ−ဗၟာ ပွိုၚ်ဍုၚ်လိုၚ်ဗၠဲ တွဵုရးကရေၚ်ဂှ် ညံၚ်ဗ္ဒိုပ်ဏံ ဟွံဂွံစှ်ေအာဂှ် ဒပ်ကံၚ်ဇြဳပၞာန် ပန်ပှော်ကဵုဒၟံၚ်ပၞာန်ကျာ ပ္ဍဲဂိတုမာတ် ၂၅ တေံ ဗွဲမသ္ကာတ်မြဟ်ရောၚ် တမ်ရိုဟ်ပရိုၚ်ပယျဵုတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒိုပ်(ခလယ့်ဒေး) ဒပ်ကံၚ်ဇြဳပၞာန် နွံပ္ဍဲပွိုၚ်ဍုၚ်လိုၚ်ဗၠဲ ဒပ်မဟာ ၇ KNU ဂှ် စနူဂိတုမာတ် ၂၃ တုဲ ဒပ်ပံၚ်ကောံ KNLA KNDO တံ စဗိုၚ်ကၟာတ်လဒဵု ဗ္တိုက်ဒၟံၚ်တုဲ ပေါဲဗ္တိုက်ၜါလ္ပာ် က္တဵုဒှ်လဝ် ဗွဲမသ္ကာတ်မြဟ်ရ။
ပ္ဍဲဂိတုမာတ် ၂၅ တေံ ဒပ်ပၞာန်ဗၠးၜးကောန်ဂကူကရေၚ် KNLA, ဒပ်စဵုဒၞါကောန်ဂကူကရေၚ် KNDO တံ ထောံလဝ်မခတိုဟ် ကုဗ္ဒိုပ်(ခလယ့်ဒေး) ဂှ်တုဲ ဗ္တိုက်ဒၟံၚ်တုဲ နူကဵုဗလးတိဏံဂှ်လေဝ် ဗိုၚ်ကၟာတ်လဒဵုလဝ်တုဲ ဗ္တိုက်ဒၟံၚ်ပၞာန်ထ္ပက်တံရ။
လ္ပာ်ဒပ်ကံၚ်ဇြဳပၞာန် ညံၚ်ဗ္ဒိုပ်ဏံဟွံဂွံစှ်ေအာဂှ် ထောံမံၚ်မခတိုဟ် ပန်ပှော်ဒၟံၚ် ပွဳပွူဗ္ဒိုပ်(ခလယ့်ဒေး) ဂှ် နကဵုက္ၜၚ်ကျာဗ္တိုက်တုဲ မွဲဒမြိပ်ပယျဵုဂှ်လေဝ် ဒပ်ပၞာန်သေံ ဖျေံဂလိုၚ်ပ္တိုန်ဂီုကၠီုတုဲ မၚ်ရံၚ်ဒၟံၚ်ရောၚ် တမ်ရိုဟ်ပရိုၚ်ပယျဵုတံ သ္ဂးရ။
ဟိုတ်နူပေါဲဗ္တိုက်(ခလယ့်ဒေး)တုဲ ညးဍုၚ်ကွာန်ဒေသ ၁၀၀ ပြၚ် ဒးဂြိပ်ဒဴပါဲဒလေတ်ဒၟံၚ် လ္ပာ်ဍုၚ်သေံတုဲ သၟိၚ်တၠအဝဵုသေံတံ ကဵုလဝ်အရီုဗၚ်ပရေၚ်ဗ္စာရဏာမၞိဟ်တံတုဲ မၚ်မွဲကဵုလဝ်ရောၚ် သ္ဂးလဝ်ရ။
ဗ္ဒိုပ်(ခလယ့်ဒေး) ဒပ်ကံၚ်ဇြဳပၞာန်ဝွံ နွံဒၟံၚ်ပွဳပွူဗ္ဒါဲပယျဵုသေံ−ဗၟာတုဲ ကဵုဌာန်ဂအုပ်ဗဟဵု ဗော်သွးကောန်ဂကူကရေၚ် KNU ဂှ်လေဝ် ဖျေံလဝ်ဒပ် ကြပ်ပ်တုဲ ဒပ်ကံၚ်ဇြဳပၞာန် ဂွံကဵုအရီုဗၚ်ပၞာန် ဇရေၚ်ဗ္ဒိုပ်ဏံ နူကဵုဗလးတိဏံဂှ် ဟွံလောဲသွာပုဟ်ဂှ် တမ်ရိုဟ်ပရိုၚ်အပ္ဍဲဒေသမွဲတၠ သ္ဂးရ။
တုဲကၠုၚ် ပ္ဍဲဂိတုမာတ် ၁၄ တေံ ဒပ်ပံၚ်ကောံ KNLA KNDO တံ ဗ္တိုက်သီဂွံလဝ် ဗ္ဒိုပ်ပူလူတူ ဗ္ဒိုပ်ကံၚ်ဇြဳပၞာန် ပွိုက် ၁၂၄၈ ပယျဵုသေံ−ဗၟာ ပွိုၚ်ဍုၚ်လိုၚ်ဗၠဲ တိဍာ်ဒပ်မဟာ ၇ KNU ဂှ်တုဲ အပ္ဍဲပေါဲဗ္တိုက်သီဗ္ဒိုပ်ဂှ် ကောန်ဒပ်ကံၚ်ဇြဳပၞာန် ချိုတ်အာလဝ် ဗွဲမဂၠိုၚ်ဂၠေၚ်တုဲ ဂြိပ်တိတ်အာ လ္ပာ်ဍုၚ်သေံတံလေဝ် နွံရ။
ပရိုၚ်−သြၚ်လောန်တိုၚ်(မ်)
ဗီု−KNU