နေဗျဳဒဝ်၊ မာတ် ၂၆
ပ္ဍဲကဵုခရိတ်အရပ်စပ် ဌာနဝန်ဇၞော်ဂမၠိုၚ် သွက်သၞာံဘဏ္ဍာ ၂၀၂၅−၂၀၂၆ ဂှ် ဂလိုၚ်ပ္တိုန်လဝ် ခရိတ်အရပ်စပ်ကာစဵုဒၞါ ကဵု ကာအပ္ဍဲဍုၚ်ရောၚ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုရ။
ပ္ဍဲကဵုကောံဓရီုကမ္မယှေန် စပ်ကဵုပရေၚ်ဘဏ္ဍာ မကၠောန်ဗဒှ်လဝ် ပ္ဍဲနေဗျဳဒဝ် ပ္ဍဲဂိတုမာတ် ၂၄ တေံဂှ် က္ဍိုပ်သ္ကိုပ်ပၞာန် ဒဒှ်ရသၠုၚ်ပ္တိုန်လဝ် ခရိတ်အရပ်စပ်ကာစဵုဒၞါဂှ် ဟီုပ္တိတ်ကၠုၚ်လဝ်ရ။
မ္ၚးနူကဵုခရိတ်အရပ်စပ် ကာစဵုဒၞါကဵု ကာအပ္ဍဲဍုၚ်ဂှ် ဂလိုၚ်ပ္တိုန်လဝ် သီုခရိတ်အရပ်စပ် သွက်ကဏ္ဍပရေၚ်ထတ်ယုက်ကဵု ပရေၚ်ပညာတံဂှ်ရောင် က္ဍိုပ်သ္ကိုပ်ပၞာန် ဟီုလဝ်ကီုလေဝ် လၟိဟ်ပမာဏဍေံ ချိုတ်တ်ပၠိုတ်တ်ဂှ်တှ်ေ ဟီုစုတ်လဝ် ဟွံမွဲရ။
ဆ္ဂး မ္ဒးဂလိုၚ်ပ္တိုန်ရပ်စပ်ကၠုၚ် ခရိတ်အရပ်စပ်ကာစဵုဒၞါဂှ်ဝွံ ပ္ဍဲအရာရေၚ်တၠုၚ် ညံၚ်ဍုၚ်ကွာန်ဂွံၜိုဟ်သြိုဟ်ညိၚ်ဝတ်ဂှ် ဒှ်သွက်ဂွံသၠုၚ်ပ္တိုန်အစောံဇြဟတ် ဂကောံဒပ်စဵုဒၞါတံဏောၚ်ဂှ် ထ္ၜးလဝ်ဟိုတ်ရ။
ဥူကျဳမျေတ် ညးလ္ၚတ်သ္ၚဳဂၠိပ်ပရေၚ်ဍုၚ်ဗၟာဂှ်တှ်ေ ကံၚ်ဇြဳပၞာန်ဝွံ ရပ်စပ်ဒၟံၚ်သြန်ဘဏ္ဍာကၟိန်ဍုၚ် သွက်ကာစဵုဒၞါကဵု သွက်ကာအပ္ဍဲဍုၚ်သၟးရတုဲ ဟိုတ်နူဏံတုဲ ဘဝပရေၚ်မၞိဟ်ညးဍုၚ်ကွာန်တံ ဒးဂိဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ရပ်စပ်ဒၟံၚ် သွက်ကာစဵုဒၞါကဵု သွက်ကာအပ္ဍဲဍုၚ်သၟးရဏောၚ်။ ရပ်စပ်ဒၟံၚ် ဗၞတ်ၜိုတ်လဵုရောဂှ်ဏောၚ် ဒးဟီု။ ရပ်စပ်လဝ် မူစိတၟံကၠံရောဟီုဂှ် ဒးဟီုဏောၚ်။ ဒးဂိသွက်ညးဍုၚ်ကွာန်တံဂှ်တှ်ေ လၟုဟ်တှ်ေ ပၟတ်ဟွံကၠုၚ်ပုဟ်။ မွဲတ္ၚဲ ကဵုဒၟံၚ်ပၟတ် ၄ နာဍဳရဏောၚ်။ ဒးကဵုညးဍုၚ်ကွာန်တံပၟတ်ဏောၚ်။ ဒးကဵုဍာ်ဏောၚ်။ ညံၚ်ၚုဟ်ဖျာဂွံစှ်ေ ဒးကၠောန်ကဵုဏောၚ်။ အရာတံဏံဂှ် ဒှ်ဒၟံၚ်မုမွဲမှ ကဵုဟွံမာန်ပုဟ်။ မုလေဝ် ဟွံမွဲရပုဟ်။ ဟိုတ်နူရပ်စပ်ဒၟံၚ် ပ္ဍဲကာစဵုဒၞါကဵု ကာအပ္ဍဲဍုၚ်သၟးတုဲ ညးဍုၚ်ကွာန်တံ ဒးဂိဂှ် မိက်ဂွံဟီုရ” သာ်ဝွံ သ္ဂးရ။
သ္အာၚ်နူဂှ်ပၠန် သြန်ဘဏ္ဍာကၟိန်ဍုၚ်ဝွံ ဒှ်သြန်ကံက်ဂွံနၚ် နူညးဍုၚ်ကွာန်တံဂှ်တုဲ သြန်မရပ်စပ်လဝ် ပ္ဍဲကဏ္ဍနာနာသာ်တံဂှ် ဒးထ္ၜးပျးထေက်တုဲ ဟွံလဴထ္ၜးမွဲသာ် ဗီုပြၚ်ကၠောန်ဒၟံၚ် ဒၞါဲပိုယ်မိက်ဂွံရပ် ရပ်ဏောၚ်ဂှ်ဝွံ ဒှ်ဒ္ဂေတ်လၟေတ်တၠအဝဵုတံဏောၚ်ဂှ် ညး ပါ်ပါဲလဝ်ရ။
ညးဍုၚ်ကွာန်မွဲတၠဂှ်လေဝ် ကံၚ်ဇြဳပၞာန် ရပ်စပ်ဒၟံၚ်ခရိတ်အိုတ်ဂမၠိုၚ် ပ္ဍဲကဵုကာစဵုဒၞါကဵု ကာအပ္ဍဲဍုၚ် ဂၠိုၚ်ကၠုၚ်ဂှ်ဝွံ ရပ်စပ်ဒၟံၚ် သွက်ဒတုဲဖဵုဍေံတံတုဲ ဍေံတံကၠောန်ဒၟံၚ် သွက်အဝဵုဍေံတံ ဂွံတန်ကြန်ဂှ်ရ ညံၚ်ညးဍုၚ်ကွာန်တံ ဂွံကျာတ်တုဲကျာန်ပၠန်ဂှ် ကၠောန်ဒၟံၚ်ဏောၚ် ဟီုရ။
“ညအ်ဂှ် ဍေံတံသုၚ်စောဲကၠုၚ်သြန်ဘဏ္ဍာဂၠိုၚ်ကၠုၚ်ဂှ်တှ်ေ ဍေံတံရပ်စပ်ကၠုၚ်ဒၟံၚ် သွက်ဒတုဲဖဵုတၠအဝဵုပၞာန်ဍေံရဏောၚ်။ ရန်ကဵုညးဍုၚ်ကွာန်တုဲ သုၚ်စောဲလဝ်ဂှ် မုဟွံမွဲပုဟ်။ ညံၚ်အဝဵုဍေံဂွံတန်ကြန် ညံၚ်ဍေံတံဂွံဂွံသြန်ဘဏ္ဍာဂှ် ပ္ဍဲကဵုလ္ပာ်ရးတံဂှ်လေဝ် ပိုယ်တံဂွံမိၚ်ကေတ်ဒၟံၚ် ထောံမခတိုဟ်ကဵုက္ၜၚ်ကျာ လ္တူညးဍုၚ်ကွာန်တံ မုတံ၊ မိက်ဂွံရပ်စပ်ခရိတ်ပၞာန်တံဏံဂၠိုၚ်ၚ်တုဲ ညးတၞဟ်ကၠုၚ်ၜက်ၜေတ်ဗ္တိုက်ဒၟံၚ်ဍုၚ်ဗၟာဂှ်လေဝ် ဟွံသေၚ်ပုဟ်၊ လၟုဟ်ဂှ် ညံၚ်အဝဵုဍေံတံဂွံတန်ကြန် အရာမကၠောန်ဒၟံၚ်သွက်ဍေံတံဂှ် ရပ်စပ်ဒၟံၚ်သြန်ဘဏ္ဍာသာ်ဏံဟီုဂှ် ကၠောန်ဒၟံၚ်ညံၚ်ညးဍုၚ်ကွာန်တံ ဂွံကျာတ်တုဲကျာတ်ပၠန် တုပ်ပ်သာ်ဏံရဏောၚ်ဂှ် ပိုယ်တံ ညာတ်ကေတ်ရ” သာ်ဝွံ သ္ဂးရ။
ကံၚ်ဇြဳပၞာန်ဝွံ ပရေၚ်ရပ်စပ်သြန်ဘဏ္ဍာကၟိန်ဍုၚ်ဂှ် လလောၚ်ပ္တိတ်လဝ် ပ္ဍဲသၞာံဘဏ္ဍာ သၞာံ ၂၀၂၃−၂၀၂၄ လက္ကရဴအိုတ်တုဲ ကြဴနူဂှ်တုဲ လလောၚ်ပ္တိတ်ကၠုၚ်လဝ် ပရေၚ်ရပ်စပ်သြန်ဘဏ္ဍာဂှ် ဟွံမွဲရ။
ပ္ဍဲသၞာံဘဏ္ဍာ ၂၀၂၃−၂၀၂၄ ဂှ် ရပ်ဂလိုၚ်ပ္တိုန်လဝ် ခရိတ်အရပ်စပ်ကာစဵုဒၞါ စဵုကဵု ၅၆၀၀ ဗဳလျာန်ဒ္ကေဝ်ပြၚ်တုဲ လၟိဟ်ပမာဏဏံဝွံ သုၚ်စောဲဂလိုၚ်ပ္တိုန်လဝ် ဗ္ဒါဲ ၂၀၀၀ ဗဳလျာန်ဒ္ကေဝ် ဂၠိုၚ်နူကဵုခရိတ်အရပ်စပ်ကာစဵုဒၞါ လက်ထက်အလဵုအသဳကောန်အရာပ်တေံ မကဵုလဝ်အခေါၚ်ဂှ်ရ။
Blood Money Campaign မၚ်ရံၚ်ဒၟံၚ်ပၞော်သြန်လုပ် ကံၚ်ဇြဳပၞာန်ဂှ်တှ်ေ ကြဴနူသီအဝဵုတုဲဂှ် ဒပ်ပၞာန် ရပ်ဂလိုၚ်ပ္တိုန်ဒၟံၚ် ခရိတ်အရပ်စပ်ပၞာန် ဂၠိုၚ်ကဵုမဳလျာန်ဒဝ်ဠာဏောၚ် ကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)
ဗီု−SAC